ຫຼວງພະບາງ: ຕອນເຊົ້າຂອງວັນທີ 20 ກໍລະກົດ 2020 ນີ້, ຢູ່ແຄມຖະໜົນໄກສອນພົມວິຫານ ການນຳຂອງແຂວງ ແລະຊາວນະຄອນຫຼວງພະບາງ ໄດ້ຮ່ວມກັນອອກມາໃສ່ບາດ ເພື່ອອຸທິດສ່ວນບຸນກູສົນ ໄປໃຫ້ ການນໍາທີ່ເຄົາລົບຮັກ ແລະບັນດານັກຮົບ ທີ່ໄດ້ເສຍສະຫຼະເລືອດເນື້ອ ໃນພາລະກິດປົດປ່ອຍຊາດ ໂອກາດວັນສ້າງຕັ້ງສະຫະພັນແມ່ຍີງລາວ ວັນທີ່ 20 ກໍລະກົດ ຄົບຮອບ 65 ປີ.
![](https://pakaad.com/wp-content/uploads/2020/07/fb_img_15953423510846220850096211986139.jpg)
ຈາກນັ້ນ ໄດ້ຮ່ວມກັນບໍລິຈາກເລືອດແບບສະໝັກໃຈ ເພື່ອຊ່ວຍເຫຼືອສັງຄົມ ຢູ່ຫ້ອງການສະຫະພັນແມ່ຍີງແຂວງ.
![](https://pakaad.com/wp-content/uploads/2020/07/fb_img_15953423585243254591081408504416.jpg)
ທ່ານ ນາງ ອີນທະວອນ ພົມມະຈັນ ປະທານສະຫະພັນແມ່ຍິງແຂວງ ໄດ້ມີຄຳເຫັນວ່າ: ການບໍລິຈາກເລືອດ ແມ່ນການຊ່ວຍເຫຼືອເພື່ອນມະນຸດ ເຊີ່ງປະຈຸບັນ ຄົນເຈັບທີ່ຕ້ອງການເລືອດ ເພື່ອຄ້ຳຊູຊີວິດຂອງຕົນໃຫ້ຍືນຍາວອອກໄປອີກ ແມ່ນມີຈຳນວນບໍ່ໜ້ອຍ ຍ້ອນສະພາບການລະບາດຂອງພະຍາດໂຄວິດ 19 ແລະພະຍາດໄຂ້ຍຸງລາຍ ຈື່ງຮຽກຮ້ອງໃຫ້ທຸກຄົນ ຮ່ວມໃຈກັນບໍລິຈາກເລືອດໃຫ້ຫຼາຍ ເພື່ອຕອບສະໜອງຄວາມຕ້ອງການຂອງການນຳໃຊ້ເລືອດໃຫ້ກັບຄົນເຈັບທີ່ຍັງນອນປີ່ນປົວ ທັງເປັນການເຮັດບຸນກຸສົນອັນໃຫຍ່ຫຼວງ.
ການບໍລິຈາກເລືອດແບບສະໝົກໃຈໃນຄັ້ງນີ້ ໄດ້ມີຜູ້ສະໝັກໃຈຮ່ວມບໍລິຈາກເລືອດເປັນຈຳນວນຫຼາຍ ໄດ້ເລືອດຫຼາຍກ່ວາ 100 ຖົງ ເກີນແຜນການທີ່ກຳນົດໄວ້.
![](https://pakaad.com/wp-content/uploads/2020/07/fb_img_15953423632529028647603109545295.jpg)
ຂ່າວ,ພາບ: ອາພຸດເດດ ບຸບຜາ