ນາງສັງຂານຫລວງພຣະບາງ ນັບແຕ່ມີການຈັດໃຫ້ຈັດພິທີແລະເຮັດຣາຊຣົຖແຫ່ຕາມຫລັງຫວໍ່ຂອງພຣະສົງ-ສາມະເນນ ໃນມື້ບຸນຖະເຫລິງສົກບຸນປີໃຫມ່ລາວມາ ມີປີທີ່ນາງສັງຂານ ນາງເທພທິດາອົງທີ 5 ຂອງພຣະຍາກະບິນຣະພຣົມ ຊົງພຣະນາມວ່າ : “ ກິຣິນີເທວີ ” ຊົງພະຫຸຣັດທັດດອກມົນທາ ອາພອນປະດັບໄປດ້ວຍແກ້ວມໍຣະກົດ (ແກ້ວສີຂຽວ) , ສະເຫວີຍຖົ່ວງາເປັນອາຫານ, ພຣະຫັດຂວາຊົງຖືຂໍຊ້າງ, ພຣະຫັດຊ້າຍຊົງຖືປືນ, ສະເດັດຢືນມາເທິງຫລັງຊ້າງເປັນພາຫະນະນັ້ນ ແມ່ນເຄີຍມີມາໃນຄັ້ງເມື່ອປີ : 1972, 1989, 1994, 2000, 2005, 2011 ແລະ ປີນີ້ 2022 ແມ່ນຈະໝູນວຽນມາຄົບອີກວາຣະໜຶ່ງ

ເຊິ່ງທາງນະຄອນຫລວງພຣະບາງ ເພິ່ນບໍ່ໄດ້ຈັດໃຫ້ມີພິທີແຫ່ຫວໍ່-ແຫ່ນາງສັງຂານ ເພາະບັນຫາເລື່ອງການແຜ່ລະບາດ ຂອງພະຍາດໂຄວິດ-19 ເຮັດໃຫ້ເປັນປີທີ່ 3 ແລ້ວ ທີ່ບໍ່ໄດ້ຈັດໃຫ້ມີການແຫ່ນາງສັງຂານ ( 2020, 2021, 2022 ) ດັ່ງນັ້ນຂ້າພະເຈົ້າຈຶ່ງໄດ້ຄົ້ນເອົາ ລວມເອົາຮູບພາບ ມານຳສະເໜີວ່າມີປີໃດແດ່ ທີ່ນາງສັງຂານນັ່ງເທິງຫລັງຊ້າງ ເພື່ອເປັນຄວາມຮູ້ ເສີມສ້າງປັນຍາ ແລະເກັບກັກຄວາມຊົງຈຳດີໆ ໄວ້ໃຫ້ເປັນອະນຸສອນໃຫ້ລູກຫລານໄດ້ຮັບຮູ້ຂໍ້ມູນນີ້ສຶບໄປ…

ການສະເຫລີມສະຫລອງ ບຸນປີໃຫມ່ລາວປີນີ້ ຄືປີ ຈ.ສ 1384 ( ການນັບສະຫລອງບຸນປີໃຫມ່ລາວ ແມ່ນການນັບການປ່ຽນຂອງ ປີຈຸລະສັງການ ຈາກ ຈສ 1383 ກ້າວເຂົ້າສູ່ ຈສ 1384 ( ກົງກັບປີ ຄ.ສ 2022 ແມ່ນນັບ ວັນທີ່ 1 ເດືອນມັງກອນ ຂອງທຸກໆປີ ສ່ວນວ່າ ພ.ສ 2565 ແມ່ນນັບຈາກການສິ້ນສຸດແລະເລິ່ມຕົ້ນຈາກວັນວິສາຂະບູຊາ ເດືອນ 6 ເພັງຂອງທຸກໆປີ )

ປີນີ້ ຈສ 1384 ຖືກກັບມື້ວັນສັງຂານລ່ວງ = ແມ່ນຖືກກັບວັນພະຫັດ ຂຶ້ນ 13 ຄໍ່າ, ເດືອນ 5, ພ.ສ 2564 – ກົງກັບວັນທີ 14 ເມສາ 2022, ເວລາ 09:52 ໂມງ ກັບ 12 ວິນາທີ.

– ວັນສັງຂານເນົາ = ແມ່ນຖືກກັບວັນສຸກ ຂຶ້ນ 14 ຄໍ່າ, ເດືອນ 5, ພ.ສ 2564 – ກົງກັບ ວັນທີ 15 ເມສາ 2022.

– ວັນສັງຂານຂຶ້ນ ແມ່ນຖືກກັບວັນເສົາ ຂຶ້ນ 15 ຄໍ່າ, ເດຶອນ 5, ພ.ສ 2564 – ກົງກັບວັນທີ 16 ເມສາ 2022, ເວລາ 13:49:48 ໂມງ, ປ່ຽນວັນຖະເຫລີງສົກປີໃໝ່ລາວ ຈຸນລະສັກກະຣາຊ ເປັນ 1384.

* ນາງສັງຂານ = ນາງເທພທິດາ ອົງທີ 5 ຂອງພຣະຍາກະບິນຣະພຣົມ ຊົງພຣະນາມວ່າ : “ ກິຣິນີເທວີ ” ຊົງພະຫຸຣັດ ທັດດອກມົນທາ ອາພອນປະດັບໄປດ້ວຍ ແກ້ວມໍຣະກົດ (ແກ້ວສີຂຽວ) , ສະເຫວີຍຖົ່ວງາເປັນອາຫານ, ພຣະຫັດຂວາຊົງຖືຂໍຊ້າງ, ພຣະຫັດຊ້າຍຊົງຖືປືນ, ສະເດັດຢືນມາເທິງຫລັງຊ້າງເປັນພາຫະນະ.

* ເກນພິຣຸນນະສາດ = ພຣະອາທິດເປັນອະທິບໍດີ, ນາຄຫລິ້ນນໍ້າ 4 ຕົນ, ບັນດານໃຫ້ຝົນຕົກ 400 ຫ່າ, ຕົກໃນຂອບຈັກກະວານ 160 ຫ່າ, ຕົກໃນປ່າຫິມະພານ 120 ຫ່າ, ຕົກໃນມະຫາສະໝຸດ 80 ຫ່າ, ຕົກໃນມະນຸດໂລກ 40 ຫ່າ.

– ເກນທາຣາທິຄຸນ = ຕົກຣາສີເຕໂຊ, ນໍ້າຈະໜ້ອຍ, ຝົນຕົ້ນປີຈະຕົກພໍດີ – ກາງປີຈະຕົກໜ້ອຍ – ປາຍປີຈະຕົກຫລາຍ, ນາລຸ່ມຈະດີ ແຕ່ນາດອນຈະບໍ່ດີ, ຈະມີລົມພັດແຮງທີ່ສຸດມາຈາກທິດທັງ 4 ຕາມຣະດູການ.

– ເກນທັນຍາຫານ = ຊື່ວ່າ : ປັຈສິມະ, ເຂົ້າກ້າໄຮ່ນາຈະໄດ້ແຕ່ 1 ສ່ວນ ເສຍໄປ 5 ສ່ວນ, ໂພຊະນີຍາຫານມີພໍຄວນ, ປະຊາຊົນພົນລະເມືອງຈະສຸຂແດ່ ທຸກແດ່ປະປົນກັນໄປ.

– ເກນຜະລາມັດສະມັງສາຫານ = ໝາກໄມ້ຈະເປັນດ້ວງເປັນແມງຈຳນວນຫລາຍ, ພຶດພັນຈະແພງ, ຊີ້ນປາອາຫານຈະມີພໍຄວນ.

– ເກນຣຸກຂະຊາດ : ໄມ້ງິ້ວເປັນພະຍາ, ບ້ານເມືອງຈະສະຫງົບສຸກດີ ແຕ່ຟ້າຝົນບໍ່ສູ້ດີປານໃດ.

– ເກນກາລະໂຍກ : ວັນພຸດເປັນທຸງໄຊ, ວັນອັງຄານເປັນອະທິບໍດີ, ວັນອາທິດເປັນອຸບາດ, ວັນພະຫັດເປັນໂລກາວິນາດ.

ຮຽງຮຽງໂດຍ: Houmphet Manisouk