ໃນວັນທີ 16 ມີນາ ຜ່ານມາ, ກອງບັນຊາການ ປກສ ເມືອງໄຊທານີ ນະຄອນຫລວງວຽງຈັນ ໄດ້ລົງມ້າງເຄືອຂ່າຍຄະດີຢາເສບຕິດລາຍໃຫຍ່ ຢູ່ເຂດບ້ານຕານມີໄຊ ຈັບໄດ້ 3 ຄົນ ພ້ອມຂອງກາງຢາບ້າແລະ ຢາໄອສ໌ ແລ້ວສືບຕໍ່ມ້າງຕາມການຊັດທອດ ຫາຜູ້ຮ່ວມຂະບວນການດຽວກັນໄດ້ອີກ 5 ກຸ່ມລວມຂອງກາງຢາບ້າ 471.465 ເມັດ, ຢາໄອສ໌ 6 ຖົງໃຫຍ່ກັບ 3 ຖົງນ້ອຍ, ເຮໂຣອິນ 1 ຖົງນ້ອຍ, ປືນສັ້ນ 1 ກະບອກ, ເງິນສົດ, ລົດໃຫຍ່ ແລະ ລົດຈັກ.
ທ່ານ ພັທ ສຸລິວັນ ແກ້ວມະນີວົງ ຮອງຫົວໜ້າກອງບັນຊາການ ປກສເ ມືອງໄຊທານີ, ຜູ້ຊີ້ນໍາວຽກງານຕໍາຫລວດ ໄດ້ຖະແຫລງຕໍ່ສື່ມວນຊົນ ປກສ ໃນວັນທີ 21 ເມສາ 2022 ວ່າ: ເພື່ອປະຕິບັດຕາມແຜນງານຂອງວາລະແຫ່ງຊາດ ວ່າດ້ວຍການແກ້ໄຂຢາເສບຕິດ, ກອງບັນຊາການ ປກສ ເມືອງໄຊທານີ ຈຶ່ງສ້າງແຜນລະອຽດໃນການແກ້ໄຂບັນຫາຢາເສບຕິດຢູ່ພາຍໃນເມືອງ ພາຍຫລັງໄດ້ຮັບຂໍ້ມູນຈາກແຫລ່ງຂ່າວວ່າຈະມີການຊື້-ຂາຍຢາເສບຕິດ, ພະແນກຕໍາຫລວດກອງບັນຊາການ ປກສ ເມືອງໄຊທານີ ຈຶ່ງແຕ່ງຕັ້ງກໍາລັງວິຊາສະເພາະລົງແກ້ໄຂເປົ້າໝາຍໃນເວລາ 10:00 ໂມງຂອງວັນທີ 16 ມີນາ ຢູ່ເຂດບ້ານຕານມີໄຊ ສາມາດຈັບຕົວໄດ້ 3 ຄົນຍິງ 1 ຄົນຢຶດຢາບ້າໄດ້ 465 ເມັດ, ຢາໄອສ໌ 1 ຖົງນ້ອຍນໍາມາສືບສວນຂະຫຍາຍຜົນ. ຜ່ານການສືບສວນພວກກ່ຽວ ຈຶ່ງຊັດທອດຫາຜູ້ຮ່ວມຂະບວນການດຽວກັນ,
ຈາກນັ້ນ, ຮອດເວລາ 11:00 ໂມງ ຂອງວັນດຽວກັນ ຈຶ່ງລົງມ້າງຢູ່ເຂດບ້ານໜອງພະຍາ ກັກຕົວເປົ້າໝາຍໄດ້ 1 ຄົນ, ມີຂອງກາງເຮໂຣອິນ 1 ຖົງນ້ອຍ, ຕໍ່ມາເວລາ 13:00 ໂມງ ໄດ້ເຂົ້າມ້າງກຸ່ມແກ້ງດຽວກັນຢູ່ເຂດບ້ານດົງໂດກ ກັກຕົວເປົ້າໝາຍໄດ້ 2 ຄົນຍິງ 1 ຄົນ, ຮອດເວລາ 15:00 ໂມງ ໄດ້ລົງແກ້ໄຂກຸ່ມເປົ້າໝາຍດຽວກັນ ຢູ່ເຂດບ້ານຫ້ວຍຫົງ ເມືອງຈັນທະບູລີ, ກັກຕົວເປົ້າໝາຍໄດ້ 1 ຄົນຍິຶດຢາບ້າໄດ້ 38 ແພັກກັບ 5 ຖົງເທົ່າກັບ 229. 000 ເມັດ, ຢາໄອສ໌ 4 ຖົງໃຫຍ່ ແລະ 1 ຖົງນ້ອຍ, ປືນສັ້ນ 9 ມມ 1 ກະບອກພ້ອມລູກປືນ 7 ລູກ;
ຕໍ່ມາເວລາ 17:00 ໂມງ ໄດ້ລົງແກ້ໄຂຕາມການຊັດທອດຢູ່ເຂດບ້ານໄຊສະຫວ່າງ ສາມາດກັກຕົວເປົ້າໝາຍໄດ້ 5 ຄົນຍິງ 3 ຄົນ ພ້ອມຂອງກາງຢາບ້າ 7 ມັດ ເທົ່າກັບ 14.000 ເມັດ, ຢາໄອສ໌ 2 ຖົງໃຫຍ່, ລົດໃຫຍ່ 1 ຄັນ ແລະລູກປືນສັ້ນ 6 ລູກ, ຈາກນັ້ນ ເວລາ 22:00 ໂມງ ໄດ້ລົງແກ້ຕາມຄໍາຊັດທອດຢູ່ເຂດບ້ານຫົວຊຽງ ກັກຕົວເປົ້າໝາຍໄດ້ 4 ຄົນ ພ້ອມຂອງກາງຢາບ້າ 38 ແພັກເທົ່າກັບ 228.000 ເມັດ.
ຈາກການລົງແກ້ໄຂເປົ້າໝາຍຢາເສບຕິດໃນຄັ້ງນີ້, ເຈົ້າໜ້າທີ່ ປກສ ເມືອງໄຊທານີ ສາມາດກັກຕົວເປົ້າໝາຍໄດ້ທັງໝົດ 16 ຄົນ, ຍິງ 5 ຄົນ. ຜ່ານການສືບສວນ-ສອບສວນ ຜູ້ມີສ່ວນກ່ຽວພັນກັບຢາເສບຕິດແທ້ 6 ຄົນ, ສ່ວນອີກ 10 ຄົນເຫັນວ່າບໍ່ກ່ຽວພັນກັບຢາເສບຕິດ, ເປັນພຽງຜູ້ມົ້ວສຸມເສບຢາເສບຕິດ ເຈົ້າໜ້າທີ່ຈຶ່ງໄດ້ສຶກສາອົບຮົມ ແລ້ວມອບໃຫ້ຜູ້ປົກຄອງ ແລະ ການຈັດຕັ້ງບ້ານສຶກສາອົບຮົມກ່າວເຕືອນ.
ສໍາລັບຂອງກາງທີ່ກ່ຽວຂ້ອງກັບຄະດີ, ນອກຈາກຢາເສບຕິດແລ້ວຍັງມີລົດໃຫຍ່ 2 ຄັນ, ລົດຈັກ 3 ຄັນ, ເງິນກີບ 6.400.000 ກີບ, ເງິນບາດ 82.000 ບາດ, ເງິນໂດລາ 1.000 ໂດລາ, ສາຍແຂນຄ້າຍຄືຄໍາ 1 ເສັ້ນ, ແຫວນຄ້າຍຄືຄໍາ 1, ວົງ, ສາຍຄໍຄ້າຍຄືຄໍາ 1 ເສັ້ນ, ໂທລະສັບ 7 ໜ່ວຍທີ່ເຈົ້າໜ້າທີ່ອາຍັດໄວ້.
ຂ່າວ-ພາບ: ໜັງສືພິມ ປກສ.
