ໃນວັນທີ 5 ສິງຫາ 2021 ທີ່ກະຊວງສາທາລະນະສຸກ, ໄດ້ມີພິທີມອບ-ຮັບວັກຊິນ ອ໋ອກສ໌ຟອດ-ເເອສຕາເຊເນກາ ຈໍານວນ 415.000 ໂດສ ຈາກລັດຖະບານສະຫະລາຊະອານາຈັກ ອັງກິດ ເຊິ່ງມອບໃຫ້ແກ່ ສປປ ລາວ ກໍຄື ກະຊວງສາທາລະນະສຸກ. ຕາງໜ້າມອບໂດຍທ່ານ John Pearson ເອກອັກຄະລາຊະທູດ ອັງກິດປະຈຳ ສປປ ລາວ ແລະ ຕາງໜ້າຮັບໂດຍທ່ານ ກິແກ້ວ ໄຂຄຳພິທູນ ຮອງນາຍຍົກລັດຖະມົນຕີ ແຫ່ງ ສປປ ລາວ.
ວັກຊິນຊຸດນີ້ເປັນຊຸດທໍາອິດ ໃນຈໍານວນ 100 ລ້ານໂດສ ເຊິ່ງໄດ້ໃຫ້ຄໍາໝັ້ນສັນຍາໂດຍ ລັດຖະບານ ແຫ່ງສະຫະລາຊະອານາຈັກອັງກິດ ເພື່ອຊ່ວຍແຜນງານການສັກຢາ ຂອງບັນດາປະເທດທີ່ກໍາລັງພັດທະນາ ໃນຊຸມປີຕໍ່ໜ້າ ໂດຍການຖະແຫລງ ຂອງທ່ານ Dominic Raab ລັດຖະມົນຕີຕ່າງປະເທດ ອັງກິດ ໃນວັນທີ 28 ກໍລະກົດ.
ທ່ານ John Pearson ໄດ້ກ່າວວ່າ: ສະຫະລາຊະອານາຈັກ ອັງກິດ ມີຈຸດປະສົງໃນການເຮັດໃຫ້ວັກຊິນສາມາດເຂົ້າເຖິງໄດ້ໂດຍທຸກຄົນ ເພື່ອວ່າປະຊາຊົນທີ່ມີຄວາມສ່ຽງທີ່ສຸດ ໃນທົ່ວໂລກ ຈະສາມາດຮັບການປົກປ້ອງ ຈາກການຕິດເຊື້ອພະຍາດ ໂຄວິດ-19. ອັງກິດ ແມ່ນປະເທດຜູ້ໃຫ້ທຶນຫລັກໃນໂຄງການ COVAX, ແລະ ຂ້າພະເຈົ້າກໍຮູ້ສຶກຍິນດີ ທີ່ເຫັນວ່າ ໂຄງການ COVAX ໄດ້ສະໜອງວັກຊິນໂຄວິດ ໃຫ້ແກ່ ສປປ ລາວ ຫລາຍກວ່າ 1.500.000 ໂດສ.
ການຊ່ວຍເຫລືອວັກຊິນ ຈໍານວນ 415.000 ໂດສ ຈາກລັດຖະບານແຫ່ງ ສະຫະລາຊະອານາຈັກອັງກິດ ຜ່ານກົນໄກຮ່ວມມືສອງຝ່າຍນີ້ ຈະຊ່ວຍໃຫ້ລັດຖະບານແຫ່ງ ສປປ ລາວ ສາມາດສັກວັກຊິນ ໃຫ້ແກ່ປະຊາກອນຂອງຕົນໃຫ້ໄດ້ 50% ຕາມຄາດໝາຍ ພາຍໃນປີນີ້ ແລະ ຈະຊ່ວຍສະໜັບສະໜູນລັດຖະບານລາວ ຕອບໂຕ້ຕໍ່ພະຍາດລະບາດດັ່ງກ່າວຢ່າງເຂັ້ມແຂງ.
