ໃນຕອນບ້ານ ວັນທີ 25 ກຸມພາ 2022 ທີ່ ຫໍປະຊຸມແຫ່ງຊາດ, ນະຄອນຫຼວງວຽງຈັນ, ທ່ານ ພັນຄຳ ວິພາວັນ, ນາຍົກລັດຖະມົນຕີ ໄດ້ໃຫ້ກຽດເຂົ້າຮ່ວມໂອ້ລົມ ແລະ ຊີ້ນໍາ ຕໍ່ກອງປະຊຸມວຽກງານໂຍທາທິການ ແລະ ຂົນສົ່ງ ທົ່ວປະເທດ ປະຈຳປີ 2022; ມີລັດຖະມົນຕີກະຊວງໂຍທາທິການ ແລະ ຂົນສົ່ງ; ລັດຖະມົນຕີ, ຫົວໜ້າຫ້ອງວ່າການສຳນັກງານນາຍົກລັດຖະມົນຕີ; ບັນດາທ່ານ ຮອງລັດຖະມົນຕີ, ຮອງເຈົ້າຄອງນະຄອນຫຼວງວຽງຈັນ, ຮອງເຈົ້າແຂວງ, ຜູ້ຕາງໜ້າອົງການຂັ້ນສູນກາງ, ຫົວໜ້າພະແນກໂຍທາທິການ ແລະ ຂົນສົ່ງ ແຂວງ ແລະ ນະຄອນຫຼວງວຽງຈັນ, ພ້ອມດ້ວຍພະນັກງານຫຼັກແຫຼ່ງ ກະຊວງໂຍທາທິການ ແລະ ຂົນສົ່ງ ເຂົ້າຮ່ວມ.
ໃນໂອກາດນີ້, ທ່ານ ວຽງສະຫວັດ ສີພັນດອນ, ລັດຖະມົນຕີກະຊວງໂຍທາທິການ ແລະ ຂົນສົ່ງ ໄດ້ລາຍງານໃຫ້ຊາບ ກ່ຽວກັບຈຸດປະສົງ, ເນື້ອໃນ ແລະ ຜົນຂອງການດຳເນີນກອງປະຊຸມ ໂດຍສະເພາະການສະຫຼຸບຕີລາຄາ ການຈັດຕັ້ງປະຕິບັດແຜນການ ແລະ ບັນດາວຽກພົ້ນເດັ່ນ ໃນໄລຍະປີ 2019-2021 ຂອງກະຊວງ ຍທຂ; ທິດທາງແຜນການລວມ ຂອງແຜນພັດທະນາ 5 ປີ 2021-2025 ແລະ ແຜນວຽກຈຸດສຸມ ປີ 2023 ຕິດພັນກັບການຜັນຂະຫຍາຍວາລະແຫ່ງຊາດ ຂອງກະຊວງ ຍທຂ; ສະຫຼຸບຕີລາຄາ ການຈັດຕັ້ງປະຕິບັດຂໍ້ຕົກລົງ ແລະ ບົດບັນທຶກການແບ່ງຄວາມຮັບຜິດຊອບ ວຽກງານ ຍທຂ ລະຫວ່າງ ຂັ້ນສູນກາງ ແລະ ຂັ້ນທ້ອງຖິ່ນ; ການພັດທະນາຂີດຄວາມສາມາດພະນັກງານ-ລັດຖະກອນຂອງຂະແໜງການ ຍທຂ ໃຫ້ມີ ຄວາມຊໍານານງານ ກາຍເປັນມືອາຊີບເທື່ອລະກ້າວ; ສະຫຼຸບຕີລາຄາວຽກງານການກໍ່ສ້າງປ້ອງກັນຕະຝັ່ງເຈື່ອນຕາມແມ່ນໍ້າຂອງ ແລະ ແມ່ນໍ້າເຫືອງ ທີ່ຕິດພັນກັບການປົກປັກຮັກສາເຂດນໍ້າແດນດິນ ຂອງ ສປປ ລາວ; ການພັດທະນາຕົວເມືອງຕິດພັນກັບການພັດທະນາໂຄງລ່າງທີ່ຄົງທົນ ເປັນມິດກັບສິ່ງແວດລ້ອມ ກ້າວໄປສູ່ຕົວເມືອງໜ້າຢູ່ ແລະ ທັນທະໄໝ; ກົນໄກການຈັດຕັ້ງປະຕິບັດການຂົນສົ່ງຫຼາຍຮູບແບບໃນ ສປປ ລາວ ຕິດພັນກັບການຍົກລະດັບການບໍລິການດ້ານຂົນສົ່ງ; ການຄຸ້ມຄອງຊັບສິນທາງຫຼວງ ໃຫ້ສາມາດຄົງທົນຕໍ່ການປ່ຽນແປງສະພາບດິນຟ້າອາກາດ, ມີຄວາມຍືນຍົງ ແລະ ການແກ້ໄຂສະພາບຄວາມຫຍຸ້ງຍາກທາງດ້ານເສດຖະກິດ-ການເງິນ ແລະ ອື່ນໆ.
ຜ່ານຮັບຟັງການລາຍງານ, ທ່ານ ນາຍົກລັດຖະມົນຕີ ໄດ້ເຫັນດີເປັນເອກະພາບໂດຍພື້ນຖານ ຕໍ່ການສະຫຼຸບຕີລາຄາ ການຈັດຕັ້ງປະຕິບັດວຽກງານ ຂອງຂະແໜງໂຍທາທິການ ແລະ ຂົນສົ່ງ ໃນໄລຍະຜ່ານມາ ແລະ ທິດທາງແຜນການໃນຕໍ່ໜ້າ, ພ້ອມທັງ ຕີລາຄາສູງ ຕໍ່ຜົນສໍາເລັດຂອງການຈັດກອງປະຊຸມຄັ້ງນີ້ ຊຶ່ງໄດ້ຄົ້ນຄວ້າ, ລົງເລິກຫົວຂໍ້ ຢ່າງມີຈຸດສຸມ, ຕີລາຄາບັນຫາ ກົງໄປກົງມາ, ພາວະວິໄສ ໂດຍສ່ອງແສງໃຫ້ເຫັນເຖິງ ຫົວຄິດປະດິດສ້າງ, ຄວາມສະດຸ້ງໄວ, ຄວາມຮັບຜິດຊອບສູງ ແລະ ຄວາມເປັນເຈົ້າການແທ້ ຂອງທົ່ວຂະແໜງໂຍທາທິການ ແລະ ຂົນສົົົ່ງ; ຄຽງຄູ່ກັນນັ້ນ ກໍ່ໄດ້ສະແດງຄວາມຍ້ອງຍໍຊົມເຊີຍ ຕໍ່ຜົນສຳເລັດອັນພົ້ນເດັ່ນ ທີ່ສາມາດປະຕິບັດໄດ້ ໃນໄລຍະຜ່ານມາ ເປັນຕົ້ນ
ຜົນສຳເລັດຂອງໂຄງ ການກໍ່ສ້າງເສັ້ນທາງລົດໄຟລາວ-ຈີນ, ໂຄງການກໍ່ສ້າງເສັ້ນທາງດ່ວນ ວຽງຈັນ-ວັງວຽງ, ໂຄງການກໍ່ສ້າງເຂດໂລຈິດສຕິກ ທ່າບົກ-ທ່ານາແລ້ງ, ການກຳນົດແຜນໂຄງການກໍ່ສ້າງທ່າເຮືອຫວຸງອ່າງ, ໂຄງການກໍ່ສ້າງເສັ້ນທາງ ວຽງຈັນ-ໂພນໂຮງ, ລວມທັງ ການແກ້ໄຂປະກົດການຫຍໍ້ທໍ້ຕ່າງໆ ແລະ ອື່ນໆ, ຊຶ່ງຜົນສຳເລັດເຫຼົ່ານັ້ນ ລ້ວນແຕ່ໄດ້ຮັບຄວາມຍ້ອງຍໍຊົມເຊີຍ ຈາກພາຍໃນ ແລະ ຕ່າງປະເທດ, ເປັນທີ່ຮັບຮູ້ ແລະ ຍອມຮັບ ຈາກສາກົນ, ທັງປະກອບສ່ວນ ເຮັດໃຫ້ການຄົມມະນາຄົມຂົນສົ່ງ ຂອງປະເທດເຮົາ ສະດວກຫຼາຍຂຶ້ນເປັນກ້າວໆ, ສາມາດບຸກທະລຸໄດ້ ຈາກປະເທດ ທີ່ບໍ່ມີທາງອອກສູ່ທະເລ ກາຍເປັນປະເທດເຊື່ອມໂຍງ-ເຊື່ອມຈອດ;
ນອກຈາກນັ້ນ, ທ່ານນາຍົກລັດຖະມົນຕີ ຍັງຍົກໃຫ້ເຫັນ ຂໍ້ຄົງຄ້າງ ແລະ ບົດຮຽນທີ່ຖອດຖອນໄດ້ຈຳນວນໜຶ່ງ ເພື່ອໃຫ້ຜູ້ເຂົ້າຮ່ວມກອງປະຊຸມ ນຳໄປຄົ້ນຄວ້າຜັນຂະຫຍາຍ ແລະ ຈັດຕັ້ງປະຕິບັດ.
ອັນສຳຄັນ, ທ່ານ ໄດ້ມີຄຳເຫັນເນັ້ນໜັກ ໃຫ້ເອົາໃຈໃສ່ວຽກງານຈຳນວນໜຶ່ງ ເປັນຕົ້ນ ວຽກງານການກໍ່ສ້າງປ້ອງກັນຕະຝັ່ງເຈື່ອນຕາມແມ່ນໍ້າຂອງ ແລະ ແມ່ນໍ້າເຫືອງ ໃຫ້ຈັດລຽງບູລິມະສິດ ແລະ ກໍານົດລະອຽດຈະແຈ້ງ ບັນດາຈຸດຕ່າງໆ ທີ່ຈະດຳເນີນການກໍ່ສ້າງ (ຈຸດໃດຈະສ້າງກ່ອນ-ສ້າງຫຼັງ). ກ່ຽວກັບການພັດທະນາຕົວເມືອງ ຕິດພັນກັບການພັດທະນາໂຄງລ່າງທີ່ທົນທານ ເປັນມິດກັບສິ່ງແວດລ້ອມ ກ້າວໄປສູ່ການສ້າງຕົວເມືອງ ທີ່ໜ້າຢູ່ ແລະ ທັນສະໄໝ ໃຫ້ເອົາໃຈໃສ່ ການຄົ້ນຄວ້າວາງແຜນ, ກໍານົດສ້າງບັນດານິຕິກຳ ແລະ ຄຸ້ມຄອງການພັດທະນາດັ່ງກ່າວ ໃຫ້ດີ, ຫຼີກລ້ຽງການສ້າງສຳເລັດແລ້ວ ໄດ້ທັບມ້າງ ຫຼື ປັບປຸງໃໝ່ເລື້ອຍໆ, ແຜນພັດທະນາ ຕ້ອງກົມກຽວກັນ (ເສັ້ນທາງ, ໄຟຟ້າ, ນໍ້າປະປາ…).
ກ່ຽວກັບ ການພັດທະນາຕານ່າງເສັ້ນທາງລົດໄຟ ແລະ ການໜູນໃຊ້ທ່າແຮງຂອງຕາໜ່າງເສັ້ນທາງລົດໄຟ ໃນການພັດທະນາເສດຖະກິດແຫ່ງຊາດ ຕ້ອງໄດ້ຄົ້ນຄວ້າ ຈະນໍາໃຊ້ທ່າແຮງແນວໃດ ໃຫ້ເກີດປະໂຫຍດສູງສຸດ ຈາກການຂົນສົ່ງ ແລະ ການບໍລິການ; ເອົາໃຈໃສ່ ສ້າງບຸກຄະລາກອນ ເພື່ອສາມາດຮັບປະກັນ ສືບຕໍ່ວຽກງານໃນຕໍ່ໜ້າ; ນຳເອົາຄວາມຮູ້ ແລະ ບົດຮຽນຈາກການພັດທະນາລົດໄຟລາວ-ຈີນ ເປັນບົດຮຽນ ໃນການປັບປຸງ ແລະ ຖອດຖອນບົດຮຽນ ໃນການພັດທະນາຂະຫຍາຍຕານ່າງເສັ້ນທາງລົດໄຟ ທີ່ພວກເຮົາຈະພັດທະນາ ໃນອະນາຄົດ.
ກ່ຽວກັບການພັດທະນາ ການຂົນສົ່ງຫຼາຍຮູບແບບ ພາຍໃນປະເທດ ຕ້ອງເປັນເຈົ້າການ ໃນການກຳນົດກົນໄກການຈັດຕັ້ງປະຕິບັດການຂົນສົ່ງຫຼາຍຮູບແບບ, ຫຼາຍວິທີ ໃຫ້ມີຄວາມກົມກຽວ ແລະ ໂລ່ງລ່ຽນ ໂດຍມີການສົມທົບແໜ້ນ ກັບຂະແໜງການ ແລະ ທ້ອງຖິ່ນທີ່ກ່ຽວຂ້ອງ ເພື່ອວາງແຜນພັດທະນາ ໃຫ້ສອດຄ່ອງກັບຄວາມຮຽກຮ້ອງຕ້ອງ ການອັນຈຳເປັນ ແລະ ເກີດຜົນປະໂຫຍດ ທາງດ້ານເສດຖະກິດ-ສັງຄົມ, ສ້າງແລ້ວ ມີປະສິດທິພາບ ແລະ ປະສິດທິຜົນ,ໄດ້ຮັບຜົນຕອບແທນ ທີ່ກຸ້ມຄ່າກັບການລົງທຶນ;
ເອົາໃຈໃສ່ພັດທະນາ 9 ທ່າບົກ ຕາມຈຸດຕ່າງໆ ທີ່ໄດ້ກຳນົດໄວ້ ໃຫ້ເປັນຮູບປະທຳ, ມີຄວາມທັນສະໄໝ, ບໍລິການ ເຕົ້າໂຮມ, ແຈກຢາຍ ແລະ ບໍລິການສິນຄ້າ ສົ່ງອອກພາຍນອກ ໂລ່ງລ່ຽນ, ສະດວກ, ມີປະສິດທິພາບ ແລະ ປະສິດທິຜົນວ່ອງໄວ. ກ່ຽວກັບການຄຸ້ມຄອງຊັບສິນ ແລະ ການບູລະນະສ້ອມແປງຕາໜ່າງເສັ້ນທາງ ຕ້ອງເພີ່ມທະວີການຕິດຕາມກວດກາການຄຸ້ມຄອງນໍາໃຊ້ພື້ນຖານໂຄງລ່າງ ເປັນປົກກະຕິ ແລະຕໍ່ເນື່ອງ, ສໍາຄັນຕ້ອງສ້າງໃຫ້ໄດ້ເຈົ້າໜ້າທີ່ ຜູ້ທີ່ມີຄວາມຮູ້ຄວາມສາມາດ ແລະມີຄວາມຮັບຜິດຊອບສູງໃນການປະຕິບັດໜ້າທີ່.
ກ່ຽວກັບການສືບຕໍ່ປັບປຸງກົງຈັກການຈັດຕັ້ງ ຕາມທິດກະທັດຮັດ ແລະ ເຂັ້ມແຂງ, ພັດທະນາຂີດຄວາມສາມາດພະນັກງານ-ລັດຖະກອນ ຂອງຂະແໜງການ ຍທຂ ໃຫ້ມີຄວາມຊໍານານງານກາຍເປັນມືອາຊີບເທື່ອລະກ້າວ ຕ້ອງຫຼີກລ້ຽງແນວຄິດ ແລະ ພຶດຕິກຳ ທີ່ອັດຕະວິໄສ ຫຼື ອາລົມຈິດ ໃນການຈັດວາງພະນັກງານ ແລະ ປັບປຸງການຈັດຕັ້ງ;
ສືບຕໍ່ເອົາໃຈໃສ່ ປັບປຸງຍົກລະດັບຄວາມສາມາດ ໃນການປະຕິບັດໜ້າທີ່ການເມືອງ ຕໍ່ກັບວຽກງານແນວຄິດການເມືອງໃຫ້ແກ່ພະນັກງານຂອງຕົນສູງຂຶ້ນຢ່າງບໍ່ຢຸດຢັ້ງ; ເພີ່ມທະວີການປະຕິບັດວຽກງານຂອງຕົນຢ່າງ ມີຄວາມຮັບຜິດຊອບສູງ, ມີຈັນຍາບັນ ແລະ ມີຄວາມຊື່ສັດຕໍ່ວິຊາຊີບຂອງຕົນຢ່າງແທ້ຈິງ;
ຕ້ານ, ສະກັດກັ້ນ ແລະ ແກ້ໄຂປະກົດການຫຍໍ້ທໍ້ຕ່າງໆ ໃນຂອບເຂດຄວາມຮັບຜິດຊອບຂອງຕົນ ໃຫ້ນັບມື້ຫຼຸດໜ້ອຍຖອຍລົງ ໂດຍສະເພາະ ບັນຫາການສໍ້ລາດບັງຫຼວງ.
ຂ່າວ; ພາບ: ກົມປະຊາສຳພັນ ສຳນັກງານນາຍົກລັດຖະມົນຕີ
