ກົດຕິດຕາມເພຈ ປະກາດ Pakaad

ບໍ່ແກ້ວ: ກອງປະຊຸມໃຫ່ຍຜູ້ແທນອົງຄະນະພັກແຂວງບໍ່ແກ້ວ ຄັ້ງທີ VI ໄຂຂື້ນຢ່າງເປັນທາງການໃນຕອນເຊົ້າວັນທີ 5 ຕຸລາ 2020 ພາຍໃຕ້ການເປັນປະທານຂອງ ສະຫາຍ ບົວຄົງ ນາມມະວົງ ກຳມະການສຳຮອງສູນກາງພັກ, ເລຂາຄະນະບໍລິຫານງານພັກແຂວງ ເຈົ້າແຂວງໆບໍ່ແກ້ວ ໂດຍການເຂົ້າຮ່ວມຂອງ ສະຫາຍ ບຸນທອງ ຈິດມະນີ ກຳມະ ການກົມການເມືອງສູນກາງພັກ ຮອງນາຍົກລັດຖະມົນຕີ, ປະທານຄະນະກວດກາສູນກາງພັກ ອົງການກວດກາລັດຖະບານ, ຫົວໜ້າອົງການຕ້ານການສໍ້ລາດບັງຫລວງຂັ້ນສູນກາງ ມີຜູ້ແທນສົມບູນຈຳນວນ 223 ສະຫາຍ ທີ່ເປັນຕົວແທນໃຫ້ແກ່ສະມາຊິກພັກທົ່ວແຂວງ 9.191 ສະຫາຍ ພ້ອມດ້ວຍແຂກຖືກເຊີນເຂົ້າຮ່ວມ.

ສະຫາຍ ບົົວຄົງ ນາມມະວົງ ໄດ້ຍົກໃຫ້ເຫັນວ່າ: ກອງປະຊຸມໃຫ່ຍຜູ້ແທນອົງຄະນະພັກແຂວງບໍ່ແກ້ວ ຄັ້ງທີ VI ແມ່ນຜົນສໍາເລັດລວມຍອດແຫ່ງສະຕິປັນຍາ, ຫົວຄິດປະດິດສ້າງຂອງຄະນະບໍລິຫານງານພັກແຕ່ລະຂັ້ນ ກໍ່ຄືພະນັກງານ, ສະມາຊິກພັກ ທະ ຫານ ຕຳຫລວດ ແລະ ປະຊາຊົນບັນດາເຜົ່າໃນທົ່ວແຂວງບໍ່ແກ້ວ ເພື່ອສືບຕໍ່ພາລະ ກິດປະຕິກວັດໃນໄລຍະໃໝ່ແຫ່ງການປົກປັກຮັກສາ ແລະ ພັດທະນາແຂວງບໍ່ແກ້ວໃຫ້ຮຸ່ງເຮືອງຈະເລີນກ້າວໜ້າຢ່າງບໍ່ຢຸດຢັ້ງ.

ຕະຫລອດໄລຍະ 5 ປີຜ່ານມາ ຄະນະບໍລິຫານງານພັກແຂວງ ກໍ່ຄືອົງການປົກຄອງແຂວງທຸກຂັ້ນ ໄດ້ສຸມໃສ່ຈັດຕັ້ງຜັນຂະຫຍາຍມະຕິກອງປະຊຸມໃຫ່ຍຄັ້ງທີ 5, ແຜນພັດທະນາເສດຖະກິດສັງ ຄົມແຫ່ງຊາດ 5 ປີ ຄັ້ງທີ 8 ຂອງແຂວງຢ່າງຕັ້ງໜ້າ ໂດຍໄດ້ຫັນເປັນ 7 ແຜນງານ, 52 ໂຄງການ, ສ້າງແຜນດຳເນີນງານຂອງຄະນະບໍລິຫານງານພັກແຂວງສະໄໝທີ 5 ແລະ ບັນດານິຕິກຳຕ່າງໆຢ່າງກ້ວາງຂວາງ ແຕ່ຂັ້ນແຂວງລົງຮອດຮາກຖານບ້ານ ປະກອບສ່ວນສ້າງເງື່ອນໄຂສຳຄັນໃຫ້ແຂວງບໍ່ແກ້ວໄດ້ຮັບການພັດທະນາກ້າວຂື້ນ ສາມາດຍາດ ໄດ້ຜົນສຳເລັດພົ້ນເດັ່ນຫລາຍດ້ານ ສະແດງອອກດ້ານການພັດທະນາເສດຖະກິດມີການຂະຫຍາຍຕົວຢ່າງຕໍ່ເນື່ອງ ສະເລັ່ຍລວມຍອດຜະລິດຕະ ພັນພາຍໃນ ຫລື GDP 7,4 ສ່ວນຮ້ອຍຕໍ່ປີ ລາຍຮັບຕໍ່ຫົວຄົນບັນລຸໄດ້ຫລາຍກວ່າ 17 ລ້ານ ຫລື ປະມານ 1.900 ໂດລາສະຫະລັດຕໍ່ຄົນຕໍ່ປີ, ສ້າງບ້ານພັດທະນາໄດ້ 98 ບ້ານ, ສ້າງບ້ານນໍ້າເກີ່ງ, ເມືອງຕົ້ນເຜີ້ງ ເປັນຕົວເມືອງໃນຊົນນະບົດ, ລຶບລ້າງບ້ານທຸກຍາກໄດ້ 17 ບ້ານ ແລະ ລຶບລ້າງຄອບຄົວທຸກຍາກໄດ້ 1.870 ຄອບ ຄົວ ປະຈຸບັນທົ່ວແຂວງຍັງເຫລືອເມືອງທຸກຍາກ 3 ເມືອງ, ບ້ານທຸກຍາກ 78 ບ້ານ ກວມເອົາ 30 ກວ່າສ່ວນຮ້ອຍຂອງຈໍານວນບ້ານທັງຫມົດ.

ກອງປະຊຸມໃຫ່ຍຜູ້ແທນອົງຄະນະພັກແຂວງບໍ່ແກ້ວ ຄັ້ງທີ VI ຜູ້ແທນຈະໄດ້ພ້ອມກັນສັງເກດຕີລາຄາຄືນຜົນການຈັດຕັ້ງປະຕິບັດມະຕິກອງປະຊຸມໃຫ່ຍຜູ້ແທນອົງຄະ ນະພັກແຂວງບໍ່ແກ້ວ ຄັ້ງທີ V ໃນໄລຍະ 5 ປີຜ່ານມາ ນັບແຕ່ 2016 – 2020 ແລະ ຜ່ານຮ່າງແຜນພັດທະນາເສດ ຖະກິດສັງຄົມ 5 ປີ ຄັ້ງທີ 9 ນັບແຕ່ 2021 – 2025 ລວມທັງບົດສຳຫລວດການນໍາພາລວມຂອງຄະນະບໍລິ ຫານງານພັກແຂວງ ສະໄໝທີ V ນອກຈາກນີ້ກອງປະຊຸມຍັງຈະໄດ້ດຳເນີນການປ່ອນບັດຄັດເລືອກເອົາຄະນະບໍລິຫານງານພັກແຂວງບໍ່ແກ້ວຊຸດທີ VI ພ້ອມທັງປ່ອນບັດຄັດເລືອກເອົາຜູ້ແທນໄປຮ່ວມກອງປະຊຸມໃຫ່ຍ ຄັ້ງທີ 11 ຂອງພັກ ພິເສດກອງປະຊຸມຍັງຈະໄດ້ຮັບຟັງການໂອ້ລົມຈາກ ສະຫາຍ ບຸນທອງ ຈິດມະນີ ກຳມະການກົມການເມືອງສູນກາງພັກ ຮອງນາຍົກລັດຖະມົນຕີ, ປະທານຄະນະກວດກາສູນກາງພັກ ອົງການກວດກາລັດຖະບານ, ຫົວໜ້າອົງການຕ້ານການສໍ້ລາດບັງຫລວງຂັ້ນສູນກາງ ຕື່ມອີກ.

Cr: ຈັນທະສອນ ສີຫານາດ

ກົດຕິດຕາມເພຈ ປະກາດ Pakaad