ໃນຕອນເຊົ້າມື້ນີ້ ວັນທີ 2 ຕຸລາ 2020 ກົງກັບມື້ຂຶ້ນ 15 ຄໍ່າເດືອນ11 ຊາວພຸດໄດ້ຮ່ວມກັນທໍາບຸນຕັກບາດສືບທອດຮີດຄອງປະເພນີບຸນອອກພັນສາປະວໍລະນາ ຢູ່ທີ່ວັດແຫ່ງຕ່າງໆ ໂດຍສະເພາະຢູ່ວັດຫຼວງ ປາກເຊ ນະຄອນປາກເຊ ແຂວງຈໍາປາສັກ ເຂົ້າຮ່ວມມີທ່ານ ປອ ວິໄລວົງ ບຸດດາຄໍາ ເລຂາພັກແຂວງ ເຈົ້າແຂວງໆຈໍາປາສັກ ພ້ອມດ້ວຍການນໍາແຂວງ,ມີທ່ານ ດຣ ນາງ ພົວພັນ ວິລະພັນ ຮອງເລຂາພັກນະຄອນປາກເຊ,ມີທ່ານຮອງເຈົ້ານະຄອນປາກເຊ,ບັນດາອອກຕົນຍາດໂຍມຄົນລາວຊາວພຸດອີກຢ່າງຫຼວງຫຼາຍ.
ໃນພິທີອອກຕົນຍາດໂຍມໄດ້ຮ່ວມກັນທໍາບຸນຕັກບາດ,ຖວາຍສັງຄະທານ,ໄຫ້ວພຣະ,ຮັບສິນ,ຟັງທັມມະເທສະໜາຈາກພະສົງ ແລະຮ່ວມກັນຖວາຍປັດໄຈທານຕ່າງໆເພື່ອອຸທິດບຸນກຸສົນໄປຍັງຍາດພີ່ນ້ອງທີ່ລ່ວງລັບໄປແລ້ວ,ທັງປະກອບສ່ວນບູລະນະວັດວາອາຮາມ ໃຫ້ຈະເລີນຮຸ່ງເຮືອງ ກໍຄືເພື່ອເປັນສີລິມຸງຄຸນໃຫ້ແກ່ຊີວິດ ແລະຄອບຄົວຂອງຕົນໃຫ້ຢູ່ເຢັນເປັນສຸກ.
ພຣະ ອາຈານ ມະຫາ ສຸວັນ ຈັນທະຣາຊ ປະທານອົງການພຸດທະສາສະໜາສໍາພັນລາວ ແຂວງຈໍາປາສັກຍັງໄດ້ເປັນປະທານພິທີທາງສາສະໜາ ແລະເທສະໜາໃຫ້ຜູ້ເຂົ້າຮ່ວມທໍາບຸນຍືດຖື ແລະປະຕິບັດຫຼັກທໍາຄໍາສອນສິນ 5 ຂອງອົງສໍາມາສໍາພຸດທະເຈົ້າ,ລະເວັ້ນຄວາມຊົ່ວ,ກະທໍາແຕ່ຄວາມດີ ກໍຄືບໍ່ຝ່າຝືນຕໍ່ລະບຽບກົດໝາຍ ຈິ່ງຈະເຮັດໃຫ້ກາຍໃຈມີຄວາມສຸກຄວາມຈະເລີນ.
ສ່ວນຜູ້ເຂົາຮ່ວມທໍາບຸນຕັກບາດໃຜໆຕ່າງກໍ່ມີຄວາມພາກພູມໃຈທີ່ໄດ້ປະກອບສ່ວນໃນການອະນຸລັກຮັກສາຮີດຄອງປະເພນີວັດທະນະທໍາອັນດີງາມຂອງຊາດ ກໍຄືຮັກສາພຸດທະສາສະໜາໄວ້ຄຽງຄູ່ກັຍຄົນລາວເຮົາຕະຫຼອດໄປ.
ເກດສະໜາ ແກ້ວສຸວັນນະແສງ
