ພິທີສະເຫລີມສະຫລອງວັນສ້າງຕັ້ງວິທະຍຸກະຈາຍສຽງແຫ່ງຊາດລາວ (ວສລ), ກະຊວງຖະແຫລງຂ່າວ, ວັດທະນະທໍາ ແລະ ທ່ອງທ່ຽວ ຄົບຮອບ 60 ປີ (13.8.1960-13.8.2020) ຈັດຂຶ້ນຢ່າງເປັນທາງການໃນຕອນເຊົ້າວັນທີ 19 ສິງຫາ 2020 ທີ່ຫ້ອງປະຊຸມໃຫຍ່ ວສລ
ໂດຍມີ ທ່ານ ກິແກ້ວ ໄຂຄໍາພິທູນ, ຄະນະເລຂາທິ ການສູນກາງພັກ, ລັດຖະມົນຕີກະຊວງ ຖະແຫລງຂ່າວ, ວັດທະນະທໍາ ແລະ ທ່ອງທ່ຽວ, ພ້ອມດ້ວຍບັນດາຮອງລັດຖະມົນຕີ, ທ່ານ ໂພສີ ແກ້ວມະນີວົງ, ກໍາມະການໃນຄະນະພັກກະຊວງ, ເລຂາຄະນະພັກຮາກຖານ, ຜູ້ອໍານວຍການໃຫຍ່ວິທະຍຸກະຈາຍສຽງແຫ່ງຊາດລາວ, ບັນດາຫົວ ໜ້າກົມ-ຮອງກົມພາຍໃນກະຊວງ, ຜູ້ຕາງໜ້າສື່ມວນຊົນຈາກພາກສ່ວນຕ່າງຯ ແລະ ພະນັກງານ-ລັດຖະກອນພາຍໃນ ວສລ ເຂົ້າຮ່ວມ.
ໃນພິທີ, ທ່ານ ໂພສີ ແກ້ວມະນີວົງ ໄດ້ຂຶ້ນເລົ່າຄືນມູນເຊື້ອການກໍາເນີດ ແລະ ເຕີບໃຫຍ່ຂະຫຍາຍຕົວຂອງ ວສລ ຕະຫລອດໄລຍະ 60 ປີ ຜ່ານມາ. ທ່ານຍົກໃຫ້ເຫັນວ່າ: ວສລ ໄດ້ຮັບການສ້າງຕັ້ງຂຶ້ນໃນວັນທີ 13 ສິງຫາ 1960 ທີ່ເມືອງວຽງໄຊ, ແຂວງຫົວພັນ, ເມື່ອກ່ອນເອີ້ນວ່າວິທະຍຸກະຈາຍສຽງຝ່າຍປະເທດລາວ ໄດ້ກາຍເປັນກະບອກສຽງອັນແຫຼມຄົມ ແລະ ມີປະສິດທິພາບສູງຂອງສູນກາງພັກ ກໍຄື ແນວລາວອິດສະຫຼະ ຫລື ແນວລາວສ້າງຊາດໃນປັດຈຸບັນ, ໂດຍໄດ້ເຮັດໜ້າທີ່ຂົນຂວາຍປຸກລະດົມປະຊາຊົນລາວບັນດາເຜົ່າເຂົ້າຮ່ວມການປະຕິວັດຕ້ານການຮຸກຮານຂອງພວກລ່າເມືອງຂຶ້ນແບບໃໝ່ ແລະ ລູກແຫລ່ງຕີນມືຂອງພວກເຂົາຢ່າງພິລະອາດຫານ, ໄດ້ກະຈາຍຂ່າວໄຊຊະນະໃນບັ້ນຮົບຕ່າງໆ, ບົດວິຈານ, ບົດຄວາມ, ປຸກລະ ດົມຈິດໃຈຮັກຊາດຄຽດແຄ້ນ ແລະ ຕໍ່ສູ້ກັບສັດຕູ, ລວມເຖີງຂ່າວການພັດທະນາເຂດປົດປ່ອຍໄປເຖິງປະຊາຊົນໄດ້ຢ່າງກວ້າງຂວາງທັງຢູ່ເຂດປົດປ່ອຍ ແລະ ເຂດຂອງຝ່າຍສັດຕູ ອັນໄດ້ປະກອບສ່ວນຢ່າງໃຫຍ່ຫຼວງໃນພາລະກິດປົດປ່ອຍປະເທດຊາດຈົນໄດ້ຮັບຜົນສຳເລັດຢ່າງສະຫງ່າຜ່າເຜີຍໃນວັນທີ 2 ທັນວາ ປີ 1975.
ຜູ້ອໍານວຍການໃຫຍ່ ວສລ ຍົກໃຫ້ເຫັນຕື່ມວ່າ: ພາຍ ຫລັງປະເທດຊາດໄດ້ຮັບການປົດປ່ອຍ ວິທະຍຸກະຈາຍ ສຽງ ຝ່າຍປະເທດລາວ ໄດ້ຍົກຍ້າຍສໍານັກງານມາຢູ່ວຽງ ຈັນ ແລະ ປ່ຽນຊື່ມາເປັນວິທະຍຸກະຈາຍສຽງແຫ່ງຊາດລາວຈົນເຖີງປັດຈຸບັນນີ້. ເວົ້າລວມແລ້ວ, ນັບແຕ່ມື້ປົດ ປ່ອຍມາຮອດປັດຈຸບັນ, ວິທະຍຸກະຈາຍສຽງແຫ່ງຊາດລາວຍັງເປັນສື່ທີ່ນຳໜ້າໃນການເຮັດໜ້າທີ່ໂຄສະນາເຜີຍ ແຜ່ແນວທາງຂອງພັກ, ການປົກປັກຮັກສາ ແລະ ພັດທະ ນາປະເທດຊາດຂອງປວງຊົນລາວ ດ້ວຍການລາຍງານຂ່າວທີ່ມີທັງພາສາລາວ ແລະ ພາສາຊົນເຜົ່າ ຄື: ພາສາມົ້ງ ແລະ ພາສາກຶມມຸ.
ນອກນີ້ ຍັງມີອີກ 6 ພາສາຕ່າງປະເທດ ຄື: ຫວຽດນາມ, ຂະແມ, ໄທ, ຝຣັ່ງ, ອັງກິດ ແລະພາສາຈີນ, ພ້ອມທັງໄດ້ຍົກລະດັບຄວາມແຮງຂອງເຄື່ອງສົ່ງລະບົບ AM ຄື້ນກາງຈາກ 10 ມາເປັນ 150 ກິໂລວັດ ແລະ ຈາກ 150 ມາເປັນ 200 ກິໂລວັດ ຕາມ ລໍາດັບ, ຍົກກໍາລັງສົ່ງຄື້ນສັ້ນຈາກ 25 ມາເປັນ 50 ກິໂລວັດ, ສ່ວນຄື້ນ FM ມາຮອດປັດຈຸບັນມີທັງໝົດ 5 ຄື້ນ, ສົ່ງລາຍການວິທະຍຸຜ່ານດາວທຽມ,ສ້າງເວບໄຊ ເປັນຂອງຕົນເອງ ເຊີ່ງສາມາດລົງຂ່າວ, ລົງການເຄື່ອນວຽກສໍາຄັນຕ່າງໆ ຂອງຕົນ, ອອກອາກາດແບບອອນລາຍຜ່ານວິທະຍຸອິນເຕີເນັດ ແລະອອນລາຍຜ່ານສື່ໃໝ່ທີ່ສາມາດຮັບຟັງໄດ້ທົ່ວໂລກ. ມີສະຖານີເຄືອຂ່າຍສົ່ງສັນຍານຕໍ່ຢູ່ແຂວງຫຼວງພະບາງ ແລະ ປາກຊ່ອງ, ແຂວງຈຳປາສັກ ແລະ ພວມສືບຕໍ່ຂະຫຍາຍອີກ 02 ແຫ່ງຢູ່ແຂວງອຸດົມໄຊ ແລະ ແຂວງສະຫວັນນະເຂດ ດ້ວຍການຊ່ວຍເຫຼືອຂອງລັດຖະບານ ສສ ຫວຽດນາມ.
ປັດຈຸບັນ ຄື້ນສັນຍານຂອງວິທະຍຸລະບົບສົ່ງທາງພາກພື້ນດິນສາມາດປົກຄຸມພື້ນທີ່ໄດ້ຫລາຍກ່ວາ 90% ຂອງພື້ນທີ່ທົ່ວປະເທດ, ສ່ວນລະບົບດາວທຽມ, ລະບົບອິນເຕີແນັດແລະລະບົບສື່ໃໝ່ສາມາດ ກວມເອົາ 100% ຂອງພື້ນທີ່ທົ່ວປະ ເທດ ແລະ ໃນໂລກ. ສໍາລັບດ້ານເນື້ອໃນລາຍການ ໄດ້ຮັບການປັບປຸງໃຫ້ມີຫລາກຫລາຍລາຍການທີ່ມີເນື້ອຫາສາລະດີ, ສາມາດໃຫ້ຂໍ້ມູນຂ່າວສານ,ໃຫ້ຄວາມຮູ້ແກ່ສັງຄົມໄດ້ດີ.
ປັດຈຸບັນ ມີ 100 ກ່ວາລາຍການ, ກະຈາຍອອກອາກາດ 70 ຊົ່ວ ໂມງຕໍ່ວັນ. ສໍາລັບລາຍການທີ່ໄດ້ຮັບຄວາມນິຍົມຫລາຍ ນອກ ຈາກພາກຂ່າວທົ່ວໄປ ຍັງມີລາຍການຜັນຂະຫຍາຍມະຕິກອງປະຊຸມໃຫຍ່ຂອງພັກ, ລາຍການຂັບຂີ່ປອດໄພ, ລາຍ ການຮອບບ້ານຜ່ານເມືອງ, ລາຍການຍົກບັນຫາມາສົນທະ ນາ, ລາຍການລົມທົ່ວທິດຮັບອາລຸນ, ລາຍການເປົ້າໝາຍໃຫ້ສາລະໜ້າຮູ້ ແລະ ການບັນເທີງອື່ນໆ. ນອກຈາກນີ້ ຜູ້ອໍານວຍການໃຫຍ່ ວສລ ຍັງໃຫ້ຮູ້ເຖີງຈຸດອ່ອນຂໍ້ຄົງຄ້າງ ແລະ ແຜນການໃນຕໍ່ໜ້າຂອງ ວສລ ຕື່ມອີກ ເພື່ອແນໃສ່ເຮັດໃຫ້ເປັນສື່ໜຶ່ງທີ່ນໍາໜ້າໃນການໃຫ້ຂໍ້ມູນຂ່າວສານແກ່ສັງຄົມ ໃຫ້ສົມຄໍາຂວັນຂອງພວກເຮົາທີ່ວ່າ “ ວິທະຍຸກະຈາຍສຽງແຫ່ງຊາດລາວ ໃຫ້ຂໍ້ມູນຂ່າວສານ ທັນຍຸກທັນເຫດການ ໃຫ້ຄວາມສຸກສໍາລານ ແກ່ທຸກໆທ່ານ ”.
ໃນພິທີຍັງໄດ້ຮັບຟັງການສະແດງຄວາມຄິດເຫັນ ແລະ ຄວາມຊົງຈໍາໃນອາດີດຂອງພະນັກງານອາວຸໂສບໍານານ 2 ທ່ານ ຄື: ທ່ານ ອຸໄດ ສີສະແຫວງ ເວົ້າກ່ຽວກັບປະສົບການ ແລະ ຄວາມຊົງຈໍາໃນການເຮັດວຽກຢູ່ວິທະຍຸກະຈາຍ ສຽງຝ່າຍປະເທດລາວ ແລະ ທ່ານ ສີພາ ນົງລາດ ເວົ້າກ່ຽວກັບປະສົບການ ແລະ ຄວາມຊົງຈໍາໃນການເຮັດວຽກໄລຍະຈຸດເຊື່ອມຕໍ່ລະຫວ່າງວິທະຍຸກະຈາຍສຽງຝ່າຍປະເທດລາວ ແລະ ວິທະຍຸກະຈາຍສຽງແຫ່ງຊາດ (1975-1980). ຫລັງຈາກນັ້ນ, ທ່ານ ກິແກ້ວ ໄຂຄໍາພິທູນ, ຄະນະເລຂາທິການສູນກາງພັກ, ລັດຖະມົນຕີກະຊວງ ຖະແຫລງຂ່າວ, ວັດທະນະທໍາ ແລະ ທ່ອງທ່ຽວ ໄດ້ໃຫ້ກຽດໂອ້ລົມ, ເຊີ່ງກ່ອນອື່ນທ່ານໄດ້ສະແດງຄວາມຍ້ອງຍໍສັນລະເສີນ ນັກຂ່າວ-ໂຄສົກ, ນັກຈັດລາຍການ, ນາຍຊ່າງເຕັກນິກ ແລະ ພະນັກງານເຮັດວຽກຈັດຕັ້ງບໍລິຫານທຸກຄົນ ທີ່ໄດ້ຜ່ານຜ່າທຸກຄວາມຫຍຸ້ງຍາກ ສຸມທຸກເຫື່ອແຮງມັນສະ ໝອງເພື່ອຜະລິດຂ່າວ-ບົດ ແລະລາຍການທີ່ມີຄຸນນະພາບນັບມື້ນັບສູງ ແລະ ເຮັດໃຫ້ກະແສສຽງໄປເຖິງຜູ້ຟັງທັງພາຍ ໃນແລະນອກປະເທດຢ່າງຊັດເຈນເສາະໃສ ເພື່ອຮັບໃຊ້ພາລະກິດທີ່ມີກຽດສະຫງ່າຂອງພັກ ຕະຫລອດໄລຍະ 60 ປີ ຜ່ານມາ,
ພ້ອມນີ້ ທ່ານຍັງໄດ້ເນັ້ນໜັກໃຫ້ ວສລ ສືບຕໍ່ປັບປຸງຫລາຍວຽກງານໃຫ້ດີຂຶ້ນ ເປັນຕົ້ນ: ການເອົາໃຈໃສບຳລຸງຍົກລະດັບທິດສະດີການເມືອງ, ແນວທາງນະໂຍ ບາຍຂອງພັກ ແຜນພັດທະນາເສດຖະກິດສັງຄົມຂອງລັດໃນແຕ່ລະໄລຍະ ລວມທັງລະບຽບກົດໝາຍຕ່າງໆໃຫ້ ນັກຂ່າວ-ໂຄສົກ ໃຫ້ຫຼາຍຂຶ້ນອີກ, ເນື້ອໃນຂອງຂ່າວ, ບົດ ແລະ ລາຍການ ຕ້ອງໜັກແໜ້ນແຫຼມຄົມ, ໜ້າສົນໃຈຕື່ມ, ວ່ອງ ໄວ ແລະຖືກຕ້ອງເຊື່ອຖືໄດ້, ຄຽງຄູ່ກັນນີ້ ຕ້ອງນຳໃຊ້ທັງສື່ດັ້ງເດີມ ແລະສື່ໃໝ່ໄປຄຽງຄູ່ກັນເພື່ອໂຄສະນາຕອບຕ້ານຂ່າວລື ຂ່າວປອມຂ່າວໃສ່ຮ້າຍປ້າຍສີຕ່າງໆ, ສ້າງພະນັກ ງານສືບທອດທີ່ເກັ່ງມີຄຸນນະພາບສູງ, ສືບຕໍ່ສ້ອມແປງອຸ ປະກອນເຕັກນິກທີ່ໃຊ້ງານມາດົນໃຫ້ສາມາດໃຊ້ງານໄດ້ ແລະ ຮັບປະກັນ ແລະ ບັນຫາອື່ນຯ ຕື່ມອີກ.
ຂ່າວ: ບຸນຕຽງ ຈັນທະວົງ
ພາບ: ຄໍາກອງ ກິດຕິຄຸນ
