ສະຫວັນນະເຂດ: ໃນໂອກາດທີ່ ທ່ານ ບຸນຍັງ ວໍລະຈິດ ເລຂາທິການໃຫຍ່ຄະນະບໍລິຫານງານສູນກາງພັກ ປະທານປະເທດແຫ່ງ ສປປ ລາວ ໄດ້ເດີນທາງມາເຄື່ອນໄຫວຢ້ຽມຢາມ ແລະ ເຮັດວຽກຢູ່ແຂວງສະຫວັນນະເຂດ ໃນຄັ້ງວັນທີ 9 ກໍລະກົດ 2020 ນີ້.
ທ່ານ ບຸນຍັງ ວໍລະຈິດ ກໍ່ໄດ້ລົງເຄື່ອນໄຫວຢ້ຽມຢາມ ແລະ ຕິດຕາມເບິ່ງຄວາມຄືບໜ້າໂຄງການກໍ່ສ້າງຊົນລະປະທານ ອ່າງເກັບນ້ຳຍອດຫ້ວຍທ່າຮາວ ບ້ານນາຄຳ ເມືອງອຸທຸມພອນ. ໂດຍການຮ່ວມພາທາງຂອງທ່ານ ສັນຕິພາບ ພົມວິຫານ ກຳມະການສູນກາງພັກ ເລຂາພັກແຂວງ ເຈົ້າແຂວງສະຫວັນນະເຂດ ພ້ອມດ້ວຍການນຳຂອງເມືອງອຸທຸມພອນ ແລະ ການນຳພະແນກການທີ່ກ່ຽວຂ້ອງຂອງແຂວງກໍ່ໄດ້ຮ່ວມພາທາງນຳດ້ວຍ.
ໃນໂອກາດທີ່ ທ່ານປະທານປະເທດລົງຢ້ຽມຢາມໂຄງການຄັ້ງນີ້ ທ່ານ ນາງ ເພັດສະໝອນ ເພັງສະຫວັດ ປະທານບໍລິສັດເພັດຖາວອນກໍ່ສ້າງເຄຫາຂົວ-ທາງ ແລະ ຊົນລະປະທານ ກໍ່ໄດ້ລາຍງານກ່ຽວກັບຄວາມຄືບໜ້າຂອງການໃຫ້ທ່ານປະທານປະເທດໄດ້ຮັບຮູ້ວ່າ: ໂຄງການກໍ່ສ້າງຊົນລະປະທານ ອ່າງເກັບນໍ້າຍອດຫ້ວຍທ່າຮາວ ບ້ານນາຄຳ ເມືອງອຸທຸມພອນ ແຂວງສະຫວັນນະເຂດ ແມ່ນໄດ້ເລີ່ມລົງມືຈັດຕັ້ງປະຕິບັດໂຄງການໄລຍະທີໜຶ່ງແມ່ນເລີ່ມແຕ່ປີ 2014 – 2016 ກໍ່ໄດ້ມີການກວດກາ ແລະ ໄດ້ຢຸດໂຄງການເປັນເວລາ 4 ປີ
ຫຼັງຈາກນັ້ນກໍ່ໄດ້ສືບຈັດຕັ້ງປະຕິບັດໂຄງການໃໝ່ເປັນໄລຍະທີສອງ ຈຸດປະສົງຂອງໂຄງການແມ່ນເພື່ອແນໃສ່ການພັດທະນາແຫຼ່ງນໍ້າ ແລະ ສ້າງເປັນອ່າງເກັບນໍ້າລະບົບຊົນລະປະທານ ເພື່ອສະໜອງນໍ້າໃຫ້ແກ່ເນື້ອທີ່ການຜະລິດກະສິກຳ ໃຫ້ສາມາດຜະລິດໄດ້ທັງສອງລະດູ ຄື: ລະດູແລ້ງ ແລະ ລະດຸຝົນ ສາມາດເພີ່ມຜົນຜະລິດຂອງຊາວກະສິກອນໃຫ້ໄດ້ຫຼາຍກວ່າເກົ່າ ເຊິ່ງຈະເຮັດໃຫ້ຊີວິດການເປັນຢູ່ຂອງປະຊາຊົນໄດ້ຮັບການປັບປຸງດີຂຶ້ນ. ສຳລັບໜ້າວຽກຕົ້ນຕໍຂອງໂຄງການແມ່ນກໍ່ສ້າງລະບົບຫົວງານເຂື່ອນດິນທີ່ມີລວງຍາວ 1.250 ແມັດ,ກວ້າງ 8 ແມັດເຄິ່ງ ແລະ ກໍ່ສ້າງລະບົບຄອງເໝືອງໃນນັ້ນມີຄອງເໝືອງແມ່ສອງຄອງ ເບື້ອງຊ້າຍມີຄວາມຍາວ 9 ກິໂລແມັດ,ເບື້ອງຂວາມີຄວາມຍາວ 11 ກິໂລແມັດ ແລະ ຄອງຊອຍ 45 ຄອງ ລວມມູນຄ່າໃນການກໍ່ສ້າງທັງໝົດ 191 ຕື້ກີບ.
ໂດຍແມ່ນບໍລິສັດເພັດຖາວອນ ກໍ່ສ້າງເຄຫາຂົວ – ທາງ ແລະ ຊົນລະປະທານເປັນຜູ້ຮັບ ເໝົາກໍ່ສ້າງ. ມາຮອດປະຈຸບັນແມ່ນສາມາດປະເມີນຄວາມຄືບໜ້າຂອງວຽກງານການກໍ່ສ້າງໂຄງການໄດ້ 32,36% ທຽບໃສ່ບໍລິມາດວຽກ ແລະ ມູນຄ່າລວມໂຄງການກໍ່ສ້າງ ສະຫຼຸບຄວາມຄືບໜ້າຂອງວຽກງານການກໍ່ສ້າງໂຄງການທັງສອງໄລຍະ ແມ່ນສາມາດປະເມີນໄດ້ 61,64% ແລະ ຄາດວ່າໂຄງການດັ່ງກ່າວ ແມ່ນຈະລຳເລັດ 100% ໃນປີ 2024 ຕາມແຜນການ ແລະ ຈະໄດ້ສືບຕໍ່ໃສ່ໂຄງການຊົນລະກະເສດເຊິ່ງເປັນໄລຍະທີ 3 ຂອງໂຄງການ.
ທ່ານ ນາງ ເພັດສະໝອນ ເພັງສະຫວັດ ປະທານບໍລິສັດຍັງລາຍງານໃຫ້ຮູ້ຕື່ມອີກວ່າ ພາຍຫຼັງທີ່ສຳເລັດໂຄງການນີ້ແລ້ວ ພາຍໃນອ່າງເກັບນ້ຳຍອດຫ້ວຍທ່າຮາວຈະສາມາດກັກເກັບນ້ຳໄດ້ຫຼາຍເຖິງ 24 ລ້ານແມັດກ້ອນ ແລະ ສາມາດຫົດເນື້ອທີ່ນາປີໄດ້ 1.700 ເຮັກຕາ,ນາແຊງ 1.100 ເຮັກຕາ ແລະ ຈະມີປະຊາຊົນຈຳນວນ 9 ບ້ານທີ່ໄດ້ຊົມໃຊ້ ແລະ ໄດ້ຮັບຜົນປະໂຫຍດຄື: ບ້ານນາຄຳ,ໜອງແປນ, ດົງໃນ,ດົງຂວາງ,ດົງທ່າ,ໂນນປ່າໄລ່,ປ່າໜາມ,ນາໂພ ແລະ ບ້ານນາເກັງເມືອງອຸທຸມພອນ.
ພາບ – ຂ່າວ: ອັກສອນສິນ ພົມມະຈັນ
