ຄະນະເສດຖະສາດ ແລະ ບໍລິຫານທຸລະກິດ ມະຫາວິທະຍາໄລແຫ່ງຊາດລາວ(ມຊ) ແລະ ຄະນະວິຊານະໂຍບາຍພາກລັດ ມະຫາວິທະຍາໄລໂຕກຽວ ປະເທດຍີ່ປຸ່ນ ຈັດກອງປະຊຸມຄົ້ນ ຄວ້ານະໂຍບາຍ ລາວ-ຍີ່ປຸ່ນ ເພື່ອກ້າວໄປສູ່ຕົວແບບດ້ານການພັດທະນາແບບມີສ່ວນຮ່ວມ ສາມາດປັບຕົວ ແລະ ຍືນຍົງ ຄັ້ງທີ V ໃນວັນທີ 7 ມີນາ 2023 ທີ່ນະຄອນຫລວງວຽງຈັນ ໂດຍມີ ທ່ານ ພູທະນູເພັດ ໄຊສົມບັດ ຮອງລັດຖະມົນຕີກະຊວງການເງິນ, ທ່ານເອກອັກຄະຣາຊະທູດຍີ່ປຸ່ນ ປະຈຳລາວ, ມີບັນດາຊ່ຽວຊານຈາກຄະນະເສດຖະສາດ ແລະ ບໍລິຫານທຸລະກິດ ມຊ, ມະຫາວິທະຍາໄລໂຕກຽວ ແລະມະຫາວິທະຍາໄລ ໂກເບະ ຈາກຍີ່ປຸ່ນ ເຂົ້າຮ່ວມ ໂດຍໄດ້ຮັບການສະໜັບສະໜູນຈາກ ມູນນິທິສາກົນໂຕຊິບາ.
ກອງປະຊຸມຄັ້ງນີ້, ເປັນການແລກປ່ຽນ ແລະ ຖອດຖອນບົດຮຽນກ່ຽວກັບ ການຄົ້ນຄວ້າທາງດ້ານນະໂຍບາຍຕ່າງໆ ເພື່ອເປັນບ່ອນອີງໃນການວາງແຜນແກ້ໄຂບັນຫາທາງດ້ານເສດຖະກິດ, ການເງິນໂດຍສະເພາະແມ່ນຢູ່ ສປປ ລາວ ໃຫ້ແທດເໝາະໃນປັດຈຸບັນ ທີ່ປະເທດລາວ ພົບກັບຄວາມຫຍຸ້ງຍາກທາງດ້ານເສດຖະກິດ ແລະ ການເງິນ ໂດຍກອງປະຊຸມ, ໄດ້ເຊື້ອເຊີນເອົານັກວາງແຜນນະໂຍບາຍຂອງພາກລັດ ແລະ ພາກສ່ວນທີ່ກ່ຽວຂ້ອງ, ນັກຄົ້ນຄວ້າຢູ່ຫລາຍສະຖາບັນ ເພື່ອມາປຶກສາຫາລືແລກປ່ຽນບົດຮຽນນຳກັນທາງດ້ານວິຊາການ ເພື່ອຈະຊອກຫາວິທີການ ແລະ ນະໂຍບາຍແນວໃດ ເພື່ອກແກ້ໄຂກັບບັນຫາທາງດ້ານເສດຖະກິດ-ການເງິນຢູ່ໃນລາວ.
ສຳລັບ ຜົນຂອງການຄົ້ນຄວ້າຈະໄດ້ນຳມາເປັນບ່ອນອີງ ໃນການຄົ້ນຄວ້າຂອງນັກຄົ້ນຄວ້າຝ່າຍລາວ ພ້ອມທັງໄດ້ປະສານສົມທົບກັບຊ່ຽວຊານ, ນັກວາງແຜນນະໂຍບາຍຈາກຝ່າຍຍີ່ປຸ່ນ ທີ່ມີປະສົບການໃນການວາງແຜນໃນໄລຍະຜ່ານມາ ເພື່ອມາເປັນບົດຮຽນໃນການຄົ້ນຄວ້ານະໂຍບາຍ ລາວ-ຍີ່ປຸ່ນ ໃຫ້ກ້າວໄປສູ່ຕົວແບບດ້ານການພັດທະນາແບບມີສ່ວນຮ່ວມ ສາມາດປັບຕົວ ແລະ ຍືນຍົງໃນອະນາຄົດ.