ພະແນກກະສິກໍາ ແລະ ປ່າໄມ້ແຂວງຈໍາປາສັກ ຈັດພິທີປູກຕົ້ນໄມ້ສະເຫຼີມສະຫຼອງວັນປູກຕົ້ນໄມ້ແຫ່ງຊາດ 1 ມິຖຸນາ ທັງແມ່ນວັນເດັກນ້ອຍສາກົນ ທີ່ປ່າສະຫງວນແຫ່ງຊາດດົງຫົວສາວ (ຈຸດບ້ານນໍ້າພາກ) ກຸ່ມ 1 ຫຼັກ 19 ເມືອງປະທຸມພອນ ແຂວງຈໍາປາສັກ ໃນວັນທີ 5 ມິຖຸນາຜ່ານມາ ໂດຍໃຫ້ກຽດເຂົ້າຮ່ວມຂອງ ທ່ານ ວິໄລວົງ ບຸດດາຄໍາ ກໍາມະການສູນກາງພັກ ເລຂາພັກແຂວງ ເຈົ້າແຂວງຈໍາປາສັກ, ທ່ານ ວຽງສະໄໝ ສີລິພອນພັນ ເລຂາພັກເມືອງ ເຈົ້າເມືອງປະທຸມພອນ, ທ່ານ ສົມລິດ ວິລະວົງ ວ່າການຫົວໜ້າພະແນກກະສິກຳ ແລະ ປ່າໄມ້ແຂວງ ມີບັນດາທ່ານການນໍາແຂວງ, ພະແນກການ, ຂະ ແໜງການກ່ຽວຂ້ອງ, ອົງການປົກຄອງເມືອງ, ກຸ່ມບ້ານ, ບ້ານ, ນັກຮຽນ ແລະ ປະຊາຊົນເຂົ້າຮ່ວມ.
ພິທີປູກຕົ້ນໄມ້ໃນໂອກາດວັນປູກຕົ້ນໄມ້ແຫ່ງຊາດ ແລະ ສະເຫຼີມສະຫຼອງວັນເດັກນ້ອຍສາກົນວັນທີ 1 ມິຖຸນາ ປີ 2021 ນີ້ ແມ່ນມີຄວາມໝາຍຄວາມສໍາຄັນຫຼາຍ, ທັງໝົດນັ້ນ ແມ່ນເພືີ່ອເປັນການຄຸ້ມຄອງຊັບພະຍາກອນປ່າໄມ້ໃຫ້ຍືນຍົງ, ປົກປັກຮັກສາສິ່ງແວດລ້ອມ, ເພືີ່ອໃຫ້ບັນລຸເປົ້າໝາຍ, ຍົກລະດັບເນື້ອທີີ່ປ່າໄມ້ປົກຫຸ້ມໃຫ້ໄດ້ 70% ແລະ ສອດຄ່ອງກັບເປົ້າໝາຍການພັດທະນາແບບຍືນຍົງ ຕາມທິດການເຕີບໂຕສີຂຽວ.
ການປູກຕົ້ນໄມ້ຄັ້ງນີ້ໄດ້ປູກໃນເນື້ອທີ່ທັງໝົດ 6,46 ເຮັກຕາ ມີເບ້ຍໄມ້ນໍາມາປູກ ຈໍານວນ 6.050 ເບ້ຍ; ໃນນັ້ນທັງໝົດແມ່ນມີຊະນິດເບ້ຍໄມ້ອຸດສາຫະກໍາ ຊຶ່ງປະກອບມີ ໄມ້ແຕ້ຂ່າ 4.000 ເບ້ຍ, ໄມ້ດູ່ 2.000 ເບ້ຍ ແລະ ໄມ້ໝາກຈອງ 50 ເບ້ຍ. ໃນພິທີບັນດາທ່ານທີ່ເຂົ້າຮ່ວມໄດ້ຮັບຟັງຄວາມເປັນມາຂອງວັນປູກຕົ້ນໄມ້ແຫ່ງຊາດທີ 1 ມິຖຸນາ, ເພື່ອປຸກລະດົມໃຫ້ທົ່ວສັງຄົມຮັບຮູ້ເຂົ້າໃຈ ແລະ ຮ່ວມກັນປູກ, ຮັກສາປ່າໄມ້ ແລະ ສິ່ງແວດລ້ອມ, ມີການມອບຂອງຂວັນໃຫ້ລູກຫຼານນັກຮຽນ ແລະ ພ້ອມກັນປູກຕົ້ນໄມ້ຢ່າງເປັນຂະບວນ.
ຂ່າວ-ພາບ: ຈັນທະວີສັກ
