ທ່ານ ນ. ທິບພະກອນ ຈັນທະວົງສາ, ຮອງລັດຖະມົນຕີ,ຮອງຫົວໜ້າຫ້ອງວ່າການສຳນັກງານນາຍົກລັດຖະມົນຕີ, ຮອງຫົວໜ້າຄະນະສະເພາະກິດ, ຜູ້ປະຈຳການ.ໄດ້ຖະແຫລງຂ່າວ, ກ່ຽວກັບ ມາດຕະການປ້ອງກັນ, ຄວບຄຸມ, ສະກັດກັ້ນ ແລະ ແກ້ໄຂການແຜ່ລະບາດ ຂອງພະຍາດ ໂຄວິດ-19ໃນໄລຍະ ວັນທີ 15 ພະຈິກ 2021 ເປັນຕົ້ນໄປ.

ອີງຕາມການປະເມີນສະພາບການລະ ບາດ ແລະ ການຈັດຕັ້ງປະຕິບັດມາດຕະການຕ່າງໆ ຕາມທີ່ລະບຸໃນແຈ້ງການຂອງຫ້ອງວ່າການສໍານັກງານນາຍົກລັດຖະ ມົນຕີ ເລກທີ 1402, ລົງວັນທີ 31 ຕຸລາ 2021 ແລະ ມາດຕະການຕ່າງໆ ທີ່ຄະນະສະເພາະກິດ ເພື່ອປ້ອງກັນ, ຄວບຄຸມ ແລະ ແກ້ໄຂການລະບາດຂອງພະຍາດໂຄວິດ-19 ຂັ້ນສູນກາງ ໄດ້ວາງອອກ ເຫັນວ່າ ໄດ້ຮັບຜົນສຳເລັດດີ ເປັນກ້າວໆ ຊຶ່ງສະແດງອອກບາງດ້ານທີ່ພົ້ນເດັ່ນ ຄື: ການສັກວັກຊີນ ເຂັມທີ 1 ໄດ້ 3.543.688 ຄົນ, ກວມ 48,29%, ສັກຄົບໂດສ 2.995.667 ຄົນ, ກວມ 40,83%, ປິ່ນປົວຫາຍດີ 43.836 ຄົນ ເທົ່າກັບ 80,89% ຂອງຈຳນວນຜູ້ຕິດເຊື້ອ; ອົງການປົກຄອງ ກໍ່ຄືຄະນະສະເພາະກິດ ທຸກຂັ້ນ ຕະຫຼອດຮອດພະນັກງານແພດໝໍ ແລະ ເຈົ້າໜ້າທີ່ ທີ່ກ່ຽວຂ້ອງທຸກພາກສ່ວນ ສືບຕໍ່ປະຕິບັດໜ້າທີ່ ທີ່ການຈັດຕັ້ງມອບໝາຍໃຫ້ ດ້ວຍຄວາມອົດທົນ ຜ່ານຜ່າ ແລະ ຫ້າວຫັນ; ການຈັດຕັ້ງ ກໍ່ຄື ຄອບຄົວ-ບຸກຄົນ ທຸກພາກສ່ວນທຸກຂັ້ນ ສືບຕໍ່ໃຫ້ການສະໜັບສະໜູນ ແລະ ປະກອບເຂົ້າໃນວຽກງານຄວບຄຸມພະຍາດໂຄວິດ-19 ທັງທາງດ້ານວັດຖຸ ແລະ ຈິດໃຈ ຢ່າງເປັນຂະບວນການຟົດຟື້ນ ດີສົມຄວນ.

ເຖິງຢ່າງໃດກໍ່ຕາມ ສະພາບການຕິດເຊື້ອໃນຊຸມຊົນ ມີຂຶ້ນໃນທຸກແຂວງໃນທົ່ວປະເທດ ແລະ ຈຳນວນຜູ້ຕິດເຊື້ອໃໝ່ ແມ່ນສືບຕໍ່ເພີ່ມຂຶ້ນຢ່າງຕໍ່ເນື່ອງ ແລະ ຂະຫຍາຍເປັນວົງກວ້າງ, ຊຶ່ງການຕິດເຊື້ອດັ່ງກ່າວ ສ່ວນຫຼາຍແມ່ນເກີດຢູ່ຕາມສະຖານທີ່ທີ່ມີຊຸມຊົນແອອັດຕ່າງໆ ລວມທັງ ຢູ່ໃນງານສັງຄົມ, ສຳນັກງານ-ອົງການ, ຫົວໜ່ວຍທຸລະກິດ ແລະ ລາມໄປຮອດ ການຕິດເຊື້ອກັນໃນຄອບຄົວ ນັບມື້ຫຼາຍຂຶ້ນ. ສາເຫດຕົ້ນຕໍຂອງການແຜ່ລະບາດດັ່ງກ່າວ ແມ່ນຍ້ອນສັງຄົມຈຳນວນໜຶ່ງ ຍັງບໍ່ທັນປະຕິບັດມາດຕະການປ້ອງກັນການຕິດເຊື້ອ ແລະ ແຜ່ເຊື້ອ ຢ່າງເຂັ້ມງວດ. ຍ້ອນແນວນັ້ນ ຈຶ່ງມີຄວາມຈຳເປັນຕ້ອງໄດ້ສືບຕໍ່ຈັດຕັ້ງປະຕິບັດມາດຕະການຈຳນວນໜຶ່ງ ເລີ່ມແຕ່ເວລາ 00:00 ໂມງ ຂອງວັນທີ 15 ພະຈິກ 2021 ເປັນຕົ້ນໄປ ຄືດັ່ງນີ້:

 ມາດຕະການລວມ:

– ສືບຕໍ່ປິດດ່ານສາກົນ, ດ່ານທ້ອງຖິ່ນ ແລະ ດ່ານປະເພນີ ທາງບົກ ແລະ ທາງນໍ້າ ສໍາລັບບຸກຄົນທົ່ວໄປ, ຍົກເວັ້ນຜູ້ທີ່ໄດ້ຮັບອະນຸຍາດຈາກຄະນະສະເພາະກິດຂັ້ນສູນກາງ. ສ່ວນການຂົນສົ່ງສິນຄ້າເຂົ້າອອກ ແມ່ນໃຫ້ປະຕິບັດຕາມທີ່ລະບຸໃນຂໍ້ 3.2 ແຈ້ງການຂອງຫ້ອງວ່າການສໍານັກງານນາຍົກລັດຖະມົນຕີ ເລກທີ 1494, ລົງວັນທີ 14 ຕຸລາ 2021;

– ສືບຕໍ່ໂຈະການອອກວີຊາທ່ອງທ່ຽວ ແລະ ການມາຢ້ຽມຢາມຕ່າງໆຢູ່ ສປປ ລາວ ໃຫ້ແກ່ຄົນຕ່າງ ປະເທດ ຍົກເວັ້ນທີ່ໄດ້ຮັບອະນຸຍາດຕາມແຜນທົດລອງນຳເຂົ້ານັກທ່ອງທ່ຽວຕ່າງປະເທດ ຕາມແຈ້ງການຂອງຫ້ອງວ່າການສໍານັກງານນາຍົກລັດຖະມົນຕີເລກທີ 1445, ລົງວັນທີ 5 ພະຈິກ 2021. ສໍາລັບພະນັກງານສະຖານທູດ, ອົງການ ຈັດຕັ້ງສາກົນ, ຊ່ຽວຊານ, ນັກລົງທຶນ, ວິຊາການ ແລະ ແຮງງານຕ່າງປະເທດ ທີ່ມີຄວາມຈໍາເປັນອັນຮີບດ່ວນ ເພື່ອເຂົ້າມາປະຕິບັດວຽກງານຢູ່ສະຖານທູດ, ບັນດາກິດຈະການ ແລະ ໂຄງການຕ່າງໆ ແມ່ນຕ້ອງໄດ້ຮັບອະນຸຍາດຈາກຄະນະສະເພາະກິດ ແລະ ປະຕິບັດຕາມມາດຕະການປ້ອງກັນການຕິດເຊື້ອ ແລະ ແຜ່ເຊື້ອຢ່າງເຂັ້ມງວດ. ສ່ວນການຈຳກັດບໍລິເວນ ແມ່ນອະນຸຍາດໃຫ້ພະນັກງານ ສະຖານທູດ ແລະ ອົງການຈັດຕັ້ງສາກົນ ນຳໃຊ້ທີ່ພັກຂອງຕົນເອງໄດ້, ນອກນັ້ນ ແມ່ນຕ້ອງໄດ້ຈຳກັດບໍລິເວນຢູ່ໂຮງແຮມ ທີ່ຄະນະສະເພາະກິດ ກຳນົດໄວ້ເທົ່ານັ້ນ;

– ສືບຕໍ່ປິດກິດຈະການຮ້ານບັນເທີງ, ຮ້ານຄາຣາໂອເກະ, ຮ້ານກິນດື່ມ, ຮ້ານອິນເຕີເນັດຄາເຟ, ຮ້ານສະນຸກເກີ, ຄາຊີໂນ ແລະ ຮ້ານເກມທຸກປະເພດ ທົ່ວປະເທດ;

– ຫ້າມຈັດງານ ໂຮມຊຸມນຸມ ຫຼື ຈັດກິດຈະກຳຕ່າງໆ ທີ່ມີຜູ້ເຂົ້າຮ່ວມ ຫຼາຍກວ່າ 50 ຄົນ ເປັນຕົ້ນ ກິດຈະກຳທາງສາສະໜາ, ງານບຸນປະເພນີ, ງານດອງ; ກໍລະນີຈໍາເປັນຕ້ອງຈັດກອງປະຊຸມ ແລະ ງານລ້ຽງທາງການ ແມ່ນໃຫ້ຂໍອະນຸຍາດຈາກຄະນະສະເພາະກິດຂັ້ນສູນກາງ ຫຼື ຂັ້ນແຂວງ.

– ຫ້າມຈັດງານສັງສັນ ຫຼື ຊຸມແຊວທຸກຮູບແບບ ຢູ່ທຸກສະຖານທີ່.

 ມາດຕະການສະເພາະໃນຈຸດທີ່ມີການລະບາດໃນຊຸມຊົນ:

-ສືບຕໍ່ປິດຮ້ານນວດ, ຮ້ານສະປາ, ຮ້ານເສີມຄວາມງາມ, ຮ້ານຕັດຜົມ, ຮ້ານເສີມສວຍ, ໂຮງສາຍຮູບເງົາ, ສວນອາຫານ ແລະ ສະຖານທີ່ທ່ອງທ່ຽວ;

-ປິດສູນກິລາໃນຮົ່ມ ແລະ ກາງແຈ້ງທຸກປະເພດ ລວມທັງ ຫ້າມຈັດການແຂ່ງຂັນກິລາທຸກປະເພດ ແລະ ຫ້າມອອກກຳລັງກາຍຕາມສວນສາທາລະນະຕ່າງໆ;

-ປິດການສັນຈອນຂອງພາຫະນະສ່ວນຕົວ ຢູ່ນະຄອນຫຼວງວຽງຈັນ ແລະ ບັນດາແຂວງທີ່ມີການລະບາດໃນຊຸມຊົນ ຕັ້ງແຕ່ເວລາ 23:30 ໂມງ – 05:00 ໂມງເຊົ້າ, ຍົກເວັ້ນລົດຂົນສົ່ງສິນຄ້າ, ສະບຽງອາຫານ, ອຸປະກອນການແພດ, ລົດຂົນສົ່ງຄົນເຈັບ, ລົດດັບເພີງ, ລົດກູ້ໄພ, ລົດຄະນະສະເພາະກິດ, ລົດຂອງເຈົ້າໜ້າທີ່ປະຕິບັດງານ ແລະ ລົດທີ່ໄດ້ຮັບອະນຸຍາດຈາກຄະນະສະເພາະກິດ;

-ບັນດາກະຊວງ-ອົງການທຽບເທົ່າ ທີ່ຈະດຳເນີນກອງປະຊຸມໃຫຍ່ ຂອງອົງຄະນະພັກຕົນ ແມ່ນໃຫ້ສະເໜີແຜນປ້ອງກັນ ແລະ ຄວບຄຸມ ພະຍາດໂຄວິດ-19 ໃນໄລຍະດໍາເນີນກອງປະຊຸມ ໂດຍບໍ່ຕ້ອງກວດເກັບຕົວຢ່າງກວດຫາເຊື້ອ, ແລ້ວສະເໜີຫາຄະນະສະເພາະກິດ ພິຈາລະນາເປັນແຕ່ລະກໍລະນີ;

-ໃຫ້ບັນດາກະຊວງ, ອົງການທຽບເທົ່າ, ວິສາຫະກິດ ຢູ່ນະຄອນຫຼວງວຽງຈັນ ແລະ ບັນດາແຂວງ ອະນຸຍາດໃຫ້ພະນັກງານ ແລະ ລັດຖະກອນ ຜັດປ່ຽນກັນມາປະຈຳການ ຫຼື ເຮັດວຽກຢູ່ເຮືອນ ຜ່ານລະບົບເອເລັກໂຕຣນິກ ຕາມສະພາບຕົວຈິງ ແລະ ຄວາມເໝາະຂອງແຕ່ລະສະຖານທີ່. ສຳລັບຜູ້ທີ່ມີຄວາມສ່ຽງ ແລະ ຜູ້ຍິງຖືພາ ທີ່ບໍ່ສາມາດຮັບວັກຊີນໄດ້ ແມ່ນໃຫ້ເຮັດວຽກຢູ່ເຮືອນ.

 ມາດຕະການຜ່ອນຜັນ :

-ບັນດາຫົວໜ່ວຍທຸລະກິດ, ສະຖານທີ່ ກໍຄືກິດຈະການຕ່າງໆ ທີ່ບໍ່ນອນຢູ່ໃນມາດຕະການລວມ ແລະ ມາດຕະການສະເພາະໃນຈຸດທີ່ມີການລະບາດໃນຊຸມຊົນ ແມ່ນອະນຸຍາດໃຫ້ເປີດ ແລະ ດຳເນີນກິດຈະການໄດ້ ໂດຍອີງໃສ່ຜົນຂອງການສັກວັກຊີນຂອງເຈົ້າຂອງກິດຈະການ, ຜູ້ໃຫ້ບໍລິການ ແລະ ຜູ້ເຂົ້າບໍລິການເປັນຕົ້ນຕໍ. ໝາຍວ່າ ຜູ້ໃດສັກວັກຊີນຄົບໂດສ ແມ່ນສາມາດເຂົ້າໃຊ້ບໍລິການໃນສະຖານທີ່ດັ່ງກ່າວໄດ້;

-ສືບຕໍ່ອະນຸຍາດໃຫ້ດຳເນີນການຂົນສົ່ງສິນຄ້າພາຍໃນປະເທດ ແລະ ລະຫວ່າງປະເທດ ໂດຍປະຕີບັດຕາມແຈ້ງການຂອງ ກະຊວງ ໂຍທາທິການ ແລະ ຂົນສົ່ງ ສະບັບເລກທີ 242/ຍທຂ, ລົງວັນທີ 23 ເມສາ 2021 ຊຶ່ງຄົນຂັບລົດ ແລະ ຜູ້ຊ່ວຍຄົນຂັບລົດ ພາຍໃນປະເທດ ແລະ ຄົນຂັບລົດຂົນສົ່ງສິນຄ້າເຂົ້າມາ ສປປ ລາວ ຕ້ອງໄດ້ຮັບວັກຊີນຄົບ;

-ອະນຸຍາດໃຫ້ດຳເນີນການຂົນສົ່ງໂດຍສານທາງບົກ, ທາງນໍ້າ ແລະ ທາງອາກາດ ພາຍໃນປະເທດ ໂດຍບໍ່ຈໍາເປັນຕ້ອງມີໃບຢັ້ງຢືນຈາກຕົ້ນທາງ ແລະ ປາຍທາງ, ບໍ່ໃຫ້ມີການ ຈໍາກັດບໍລິເວນ ແລະ ບໍ່ຈໍາກັດເວລາໃນການສັນຈອນຂອງລົດຂົນສົ່ງໂດຍສານ ແລະ ສິນຄ້າ ທຸກປະເພດໃນຂອບເຂດທົ່ວປະເທດ, ແຕ່ໃຫ້ມີການຢັ້ງຢືນການຮັບວັກຊີນຄົບ ທັງຜູ້ໃຫ້ບໍລິການ ແລະ ຜູ້ໂດຍສານ (ຍົກເວັ້ນ ຜູ້ຖືພາ ແລະ ຜູ້ທີ່ບໍ່ທັນເຖິງອາຍຸກະສຽນສັກວັກຊີນ). ນອກຈາກນັ້ນ, ຜູ້ປະກອບການຂົນສົ່ງ ແລະ ຜູ້ໂດຍສານ ຕ້ອງປະຕິບັດມາດຕະການການປ້ອງກັນການຕິດເຊື້ອ ແລະ ແຜ່ເຊື້ອ ຢູ່ຕາມສະຖານີ, ພາຫະນະທີ່ນໍາໃຊ້ໃນການຂົນສົ່ງ ແລະ ໃນຊ່ວງໄລຍະການເດີນທາງ ຢ່າງເຂັ້ມງວດ;

-ບັນດາຫົວໜ່ວຍທຸລະກິດທຸກປະເພດ ຫາກມີການລະບາດຢູ່ພາຍໃນຫົວໜ່ວຍທຸ ລະກິດຕົນ ແມ່ນໃຫ້ປິດການດໍາເນີນກິດຈະການຊົ່ວຄາວ ເພື່ອອະນາໄມ, ຂ້າເຊື້ອ ແລະ ປະຕິບັດມາດຕະການກັ່ນກອງ, ຄັດແຍກກຸ່ມສ່ຽງຕາມທີ່ຄະນະສະເພາະກິດວາງອອກ, ຈາກນັ້ນ ຈຶ່ງກັບມາເປີດດໍາເນີນກິດຈະການຂອງຕົນໄດ້, ຖ້າຫາກຫົວໜ່ວຍ ທຸລະກິດໃດ ບໍ່ປະຕິບັດຕາມມາດຕະການປ້ອງກັນ, ຄວບຄຸມ ແລະ ແກ້ໄຂສະພາບການລະບາດ ຂອງພະຍາດໂຄວິດ-19 ທີ່ຄະນະສະເພາະກິດຂັ້ນຕ່າງໆວາງອອກ ຕ້ອງໄດ້ດໍາເນີນມາດຕະການ ຕາມກົດໝາຍ ແລະ ລະບຽບການທີ່ກ່ຽວຂ້ອງ; ເພື່ອເປັນບ່ອນອີງໃຫ້ແກ່ການຕິດຕາມ ກວດກາ ຂອງຄະນະສະເພາະກິດກ່ຽວຂ້ອງ ໃຫ້ບັນດາຫົວ ໜ່ວຍທຸລະກິດ ສ້າງແຜນການປ້ອງກັນການແຜ່ລະບາດ ຂອງພະຍາດ ໂຄວິດ-19 ໃຫ້ລະອຽດ ແລ້ວສົ່ງໃຫ້ຄະນະສະເພາະກິດຂັ້ນທີ່ຕົນເອງເຄື່ອນໄຫວທຸລະກິດນັ້ນ ຮັບຊາບ ເພື່ອຕິດຕາມ.

-ອະນຸຍາດໃຫ້ເປີດການຮຽນ-ການສອນທຸກຊັ້ນ ແບບເຊິ່ງໜ້າປົກກະຕິ ຢູ່ນະຄອນຫຼວງວຽງຈັນ, ບັນດາແຂວງທົ່ວປະເທດ. ມອບໃຫ້ກະຊວງສຶກສາທິການ ແລະ ກິລາ ຮີບຮ້ອນສົມທົບກັບ ກະຊວງສາທາລະນະສຸກ ແລະ ພາກສ່ວນທີ່ກ່ຽວຂ້ອງ ກຳນົດເງື່ອນໄຂ ແລະ ມາດຕະການປ້ອງກັນ ແລະ ຄວບຄຸມໃຫ້ລະອຽດ ແລ້ວມອບໃຫ້ຄະນະສະເພາະກິດແຕ່ລະທ້ອງຖິ່ນ ສົມທົບກັບຂະແໜງສຶກສາທິການ ແລະ ກິລາ ອະນຸຍາດເປັນແຕ່ລະກໍລະນີ.

ບັນດາທ່ານ ທີ່ນັບຖື ແລະ ຮັກແພງ,
ທີ່ໄດ້ກ່າວມານັ້ນ ແມ່ນມາດຕະການຕ້ອງເພີ່ມທະວີການຈັດຕັ້ງປະຕິບັດ ໃນນັ້ນ ມີມາດຕະການລວມ 5 ຂໍ້ ແລະ ມາດຕະການສະເພາະໃນຈຸດທີ່ມີການລະບາດໃນຊຸມຊົນ 5 ຂໍ້, ພ້ອມທັງ ໄດ້ກໍານົດມາດຕະການຜ່ອນຜັນ 5 ຂໍ້. ທີ່ທຸກຄົນ, ທຸກພາກສ່ວນໃນສັງຄົມຕ້ອງໄດ້ຈັດຕັ້ງປະຕິບັດ.

ພ້ອມກັນນີ້, ໃຫ້ທຸກຄົນທີ່ອາໃສຢູ່ ສປປ ລາວ ແລະ ບຸກຄົນທີ່ເດີນທາງເຂົ້າມາ ສປປ ລາວ ຕາມການອະນຸມັດຂອງຄະນະສະເພາະກິດຂັ້ນສູນກາງ ດຳເນີນການຕິດຕັ້ງ ແລະ ລົງທະບຽນ ໂປຣແກຣມ (ແອັບ) LaoKYC ໃນໂທລະສັບມືຖືຂອງຕົນ ເພື່ອໃຊ້ບໍລິການ “ລາວ ສູ້ສູ້” ແລະ ສະໝັກສ້າງລະຫັດວັກຊີນ (Vaccine ID) ເພື່ອໃຊ້ເປັນບັດຢັ້ງຢືນການສັກວັກຊີນ ແລະ ສະຖານະຄວາມສ່ຽງຂອງຕົນ ໃນເວລາເຄື່ອນໄຫວ, ເດີນທາງ, ເຂົ້າໄປສຳນັກງານຂອງລັດ, ໂຮງງານ, ຮ້ານຄ້າ, ຮ້ານອາຫານ ແລະ ສະຖານທີ່ຕ່າງໆ .

ໃຫ້ບັນດາດ່ານຊາຍແດນ, ຈຸດກວດລະຫວ່າງແຂວງຕໍ່ແຂວງ, ບັນດາສຳນັກງານຂອງລັດ, ໂຮງງານ, ຮ້ານຄ້າ, ຮ້ານອາຫານ ແລະ ສະຖານທີ່ບໍລິການຕ່າງໆ ທີ່ອະນຸຍາດໃຫ້ເປີດບໍລິການ ດຳເນີນການຄື: (1) ສ້າງ QR-Code ສະຖານທີ່ຕົນ ຕິດໃສ່ທາງເຂົ້າ, ໂຕະປະຊຸມ ຫຼື ຈຸດທີ່ເປັນບ່ອນຊຸມນຸມ ເພືື່ອໃຫ້ຜູ້ເດີນທາງເຂົ້າ-ອອກ ແລະ ຜູ້ໃຊ້ບໍລິການ ໄດ້ສະແກນ QR-Code ເພື່ອແຈ້ງເຂົ້າ (Check-in) ແລະ ກ່ອນເຂົ້າໃຊ້ບໍລິການ; (2) ມີພະນັກງານອໍານວຍຄວາມສະດວກ, ແນະນໍາການນໍາໃຊ້, ພ້ອມທັງນຳໃຊ້ແອັບກວດບັດຂຽວ (iVerifier) ສະແກນ QR-Code ລະຫັດວັກຊີນ ຂອງຜູ້ເຂົ້າມາໃຊ້ບໍລິການທຸກຄັ້ງ ເພື່ອຕິດຕາມ ແລະ ພິຈາລະນາອະນຸຍາດ ຫຼື ບໍ່ອະນຸຍາດ ໃຫ້ຜ່ານ ຫຼື ເຂົ້າ-ອອກສະຖານທີ່.

ສຳລັບບຸກຄົນ, ນິຕິບຸກຄົນ ແລະ ອົງການຈັດຕັ້ງທີ່ລະເມີດມາດຕະການປ້ອງກັນ, ຄວບຄຸມ, ສະກັັດກັ້ນ ແລະ ແກ້ໄຂການລະບາດ ຂອງພະຍາດໂຄວິດ-19 ທີ່ລັດຖະບານ ກໍຄືຄະນະສະເພາະກິດແຕ່ລະຂັ້ນ ວາງອອກ ຕ້ອງຖືກດໍາເນີນມາດຕະການຕ່າງໆ ຕາມກົດໝາຍ ແລະ ລະບຽບການກ່ຽວຂ້ອງ ຢ່າງເຂັ້ມງວດ ແລະ ຕາມກໍລະນີໜັກ ຫຼື ເບົາ.

ມອບໃຫ້ຄະນະສະເພາະກິດໂຄວິດ-19 ຂັ້ນສູນກາງ ເປັນເຈົ້າການໃນການຊີ້ນໍາ, ແນະນຳທາງດ້ານເນື້ອໃນ ກໍຄື ວິທີການໃນການຖະແຫຼງຂ່າວປະຈຳວັນໃຫ້ຫຼາກຫຼາຍ ເຂົ້າໃຈງ່າຍ, ເພື່ອໃຫ້ສັງຄົມ ຮັບຮູ້ ເຂົ້າໃຈຢ່າງທົ່ວເຖິງ, ມີສະຕິລະວັງຕົວ ແລະ ເປັນເຈົ້າການເຂົ້າຮ່ວມການປະຕິບັດບັນດາມາດຕະການຕ່າງໆ ທີ່ຄະນະສະເພາະກິດແຕ່ລະຂັ້ນ ວາງອອກ.

ພ້ອມກັນນີ້, ມອບໃຫ້ຄະນະສະເພາະກິດໂຄວິດ-19 ແຕ່ລະຂັ້ນ ສືບຕໍ່ຊີ້ນໍາພາກສ່ວນກ່ຽວຂ້ອງ ເອົາໃຈໃສ່ວຽກງານຈໍານວນໜຶ່ງ ດັ່ງນີ້:ສືບຕໍ່ຊີ້ນຳ ພາກສ່ວນກ່ຽວຂ້ອງ ໂຄສະນາ, ເຜີຍແຜ່ ແລະ ປຸກລະດົມ ໃຫ້ປະຊາຊົນ ແລະ ຜູ້ປະກອບການ ເຂົ້າໃຈ ແລະ ມີສ່ວນຮ່ວມໃນການປະຕິບັດມາດຕະການຕ່າງໆ ທີ່ລັດຖະບານ ແລະ ອົງການທ້ອງຖິ່ນວາງອອກຢ່າງເຄັ່ງຄັດ, ຄຽງຄູ່ກັນນັ້ນ ກໍໃຫ້ພະຍາຍາມອະທິບາຍໃຫ້ປະຊາຊົນບັນດາເຜົ່າ ມີວີທີການປ້ອງກັນຕົນເອງ ທັງຮຽນຮູ້ການດຳລົງຊິວິດແບບປົກກະຕິໃໝ່ ໃນເງື່ອນໄຂທີ່ມີການລະບາດ ຂອງພະຍາດໂຄວິດ-19 ຫຼື ເວົ້າອີກຢ່າງໜຶ່ງ ແມ່ນຮຽນຮູ້ທີ່ຈະຢູ່ຮ່ວມກັບພະຍາດໂຄວິດ-19 ໂດຍຜ່ານສື່ຕ່າງໆ (ໂທລະພາບ, ວິທະຍຸ, ໂທລະໂຄ່ງ, ໜັງສືພິມ ແລະ ສື່ສັງຄົມອອນລາຍອື່ນໆ). ພ້ອມທັງປະສານສົມທົບກັບພາກສ່ວນຕ່າງໆ ເພື່ອປະເມີນສະພາບການຈັດຕັ້ງປະຕິບັດວຽກງານດັ່ງກ່າວ, ຖ້າມີຄວາມຈຳເປັນ ກໍຕ້ອງໄດ້ສະເໜີຂໍການສະໜັບສະໜູນເອົາອາສາສະໝັກ ຈາກອົງການຈັດຕັ້ງຕ່າງໆ ໂດຍສະເພາະແມ່ນ ກຳລັງຊາວໜຸ່ມ ເພື່ອປະກອບສ່ວນເຂົ້າໃນວຽກງານນີ້ຢ່າງທັນການ ແລະ ຮັບປະກັນຄວາມສະຫງົບປອດໄພ;

ສືບຕໍ່ກະກຽມສູນກັກກັນ ແລະ ສູນປິ່ນປົວໃຫ້ພຽງພໍ ຕິດພັນກັບກະກຽມງົບປະມານສຳຮອງໄວ້ ເພື່ອຊື້ອຸປະກອນການແພດ, ວັກຊີນ, ຢາປົວພະຍາດ, ນໍ້າຢາກວດຫາເຊື້ອ ແລະ ອຸປະກອນຈຳເປັນຕ່າງໆ, ພ້ອມທັງປະຕິບັດນະໂຍບາຍ ໃຫ້ພະນັກງານແພດໝໍ ແລະ ເຈົ້າໜ້າທີ່ ທີ່ກ່ຽວຂ້ອງທີ່ພວມປະຕິບັດໜ້າທີ່ວຽກງານດັ່ງກ່າວ ທັງໃຫ້ກຳລັງໃຈ ດ້ວຍຮູບການຕ່າງໆ. ໃນເວລາຈັດຕັ້ງປະຕິບັດວຽກງານຕົວຈິງ, ຖ້າມີບັນຫາຫຍຸ້ງຍາກ ຄະນະສະເພາະກິດ ກໍຄື ການຈັດຕັ້ງກ່ຽວຂ້ອງບ່ອນນັ້ນໆ ຮີບຮ້ອນປະສານກັບພາກສ່ວນກ່ຽວຂ້ອງ ແລະ ໃຫ້ແກ້ໄຂທັນການ;

ສືບຕໍ່ຂະຫຍາຍຮູບແບບເອົາໂຮງແຮມເປັນສະຖານທີ່ປິ່ນປົວ ແລະ ສະຖານທີ່ປິ່ນປົວກັບທີ່ສຳລັບຜູ້ຕິດເຊື້ອທີ່ບໍ່ສະແດງອາການ ແລະ ມີເງື່ອນໄຂທາງດ້ານເສດຖະກິດ ຄອບຄົວ. ຜູ້ຕິດເຊື້ອທີ່ບໍ່ມີອາການ ຫຼື ມີອາການເບົາບາງ ທັງມີເງື່ອນໄຂທາງດ້ານສະຖານທີ່ຂອງຄອບຄົວ ຫຼື ກົມກອງຕ່າງໆ ແມ່ນສາມາດປິ່ນປົວຢູ່ກັບທີ່ໄດ້ ໂດຍຕ້ອງປະຕິບັດຕາມຄູ່ມືແນະນຳ ທີ່ກະຊວງສາທາລະນະສຸກ ວາງອອກຢ່າງເຂັ້ມງວດ;

ໃຫ້ສືບຕໍ່ປະສານສົມທົບກັບພາກສ່ວນກ່ຽວຂ້ອງ ທັງຢູ່ຂັ້ນສູນກາງ ແລະ ຂັ້ນທ້ອງຖິ່ນ ໃນການລະດົມຊ່ຽວຊານ, ແພດໝໍ ແລະ ເຈົ້າໜ້າທີ່ວິຊາສະເພາະດ້ານຕ່າງໆ ເພື່ອຊ່ວຍຮັບມືກັບການລະບາດ ຂອງພະຍາດດັ່ງກ່າວ ຕາມເງື່ອນໄຂຕົວຈິງ ຂອງແຕ່ລະທ້ອງຖິ່ນ.

ຄຽງຄູ່ກັນນີ້, ໃຫ້ອົງການປົກຄອງນະຄອນຫຼວງວຽງຈັນ ແລະ ບັນດາແຂວງ ໃນທົ່ວປະເທດ ຊີ້ນຳພາກສ່ວນກ່ຽວຂ້ອງຂັ້ນຕົນ ສືບຕໍ່ເລັ່ງການສັກວັກຊີນໃຫ້ເປົ້າໝາຍຕ່າງໆ ຕາມຄໍາສັ່ງ ຂອງນາຍົກ ລັດຖະມົນຕີ ສະບັບເລກທີ 24/ນຍ, ລົງວັນທີ 10 ພະຈິກ 2021 ວ່າດ້ວຍການເພີ່ມທະວີສັກວັກຊີນກັນພະຍາດໂຄວິດ-19.

ລັດຖະບານ ຮຽກຮ້ອງໃຫ້ພະນັກງານ, ນັກຮົບ, ປະຊາຊົນລາວບັນດາເຜົ່າ, ທຸກຊັ້ນຄົນ ຕະຫຼອດຮອດຊາວຕ່າງປະເທດ ທີ່ພວມປະຕິບັດໜ້າທີ່ ກໍຄືດຳລົງຊີວິດ ຢູ່ ສປປ ລາວ ຈົ່ງສືບຕໍ່ຮ່ວມແຮງຮ່ວມໃຈກັນ ປະຕິບັດມາດຕະການທີ່ຄະນະສະເພາະກິດແຕ່ລະຂັ້ນ ວາງອອກຢ່າງເຂັ້ມງວດ ດ້ວຍການເປັນຫູເປັນຕາ ຕິດຕາມສະພາບການຕ່າງໆ ໃນກໍລະນີພົບເຫັນມີຜູ້ລັກລອບເຂົ້າເມືອງ ແລະ ມີການລະເມີດມາດຕະການຕ່າງໆ ທີ່ຄະນະສະເພາະກິດວາງອອກ ກໍໍ່ໃຫ້ຮີບຮ້ອນລາຍງານຕໍ່ຄະນະສະເພາະກິດ ກໍຄືອົງການປົກຄອງທ້ອງຖິ່ນໃນຂັ້ນນັ້ນ ໂດຍໄວ ເພື່ອໃຫ້ການ ຈັດຕັ້ງກ່ຽວຂ້ອງດັ່ງກ່າວ ມີວິທີການແກ້ໄຂ ໃຫ້ທັນການ.

ມອບໃຫ້ບັນດາກະຊວງ, ອົງການທຽບເທົ່າ, ອົງການປົກຄອງທ້ອງຖິ່ນ ແລະ ຄະນະສະເພາະກິດທຸກຂັ້ນ ຜັນຂະຫຍາຍ ແລະ ຈັດຕັ້ງປະຕິບັດແຈ້ງການສະບັບນີ້ ໃຫ້ຖືກຕ້ອງ, ເຂັ້ມງວດ ແລະ ເປັນເອກະພາບໃນຂອບເຂດທົ່ວປະເທດ. ພໍ່ແມ່ ພີ່ນ້ອງ ທີ່ຮັກແພງທັງຫຼາຍ,

ມາດຕະການທີ່ໄດ້ກ່າວມາທັງໝົດນັ້ນ ໄດ້ກຳນົດໃນແຈ້ງການຂອງຫ້ອງວ່າການສໍານັກງານນາຍົກລັດຖະມົນຕີ ເລກທີ 1494, ລົງວັນທີ 14 ພະຈິກ 2021 ແລະ ມີຜົນສັກສິດ ຕັ້ງແຕ່ວັນທີ 15 ພະຈິກ 2021 ເປັນຕົ້ນໄປ ຈົນກວ່າຈະມີແຈ້ງການສະບັບໃໝ່, ພວກເຮົາ ຈະສືບຕໍ່ປະເມີນສະພາບການ, ທົບທວນ ແລະ ດັດປັບມາດຕະການ ໃຫ້ເໝາະສົມກັບສະພາບຕົວຈິງຕື່ມ, ກໍລະນີມີການປ່ຽນແປງ ລັດຖະບານ ຈະແຈ້ງໃຫ້ຊາບເປັນແຕ່ລະໄລຍະ.

ຂ້າພະເຈົ້າ ຂໍຮຽກຮ້ອງມາຍັງ ທຸກອົງການຂອງພັກ, ລັດ, ທຸກການຈັດຕັ້ງ ແລະ ທຸກຄົນໃນສັງຄົມ ຍົກສູງສະຕິຄວາມຮັບຜິດຊອບ ແລະ ເປັນເຈົ້າການຮ່ວມກັນ ໃນການປະຕິບັດບັນດາມາດຕະການ ທີ່ລັດຖະບານ ວາງອອກ ຢ່າງເປັນເອກະພາບ, ເອົາຈິງເອົາຈັງ ແລະ ເຂັ້ມງວດ ຂຶ້ນກວ່າເກົ່າ ພ້ອມທັງ ເອົາໃຈໃສ່ປະຕິບັດມາດຕະການປ້ອງກັນການຕິດເຊື້ອ ແລະ ແຜ່ເຊື້ອ ທີ່ເປັນພື້ນຖານໃຫ້ໄດ້ ເປັນຕົ້ນ: ໃສ່ຜ້າອັດປາກ-ດັງ, ໝັ່ນລ້າງມືດ້ວຍນໍ້າສະອາດ ໃສ່ສະບູ ຫຼື ເຈວລ້າງມື, ຮັກສາໄລຍະຫ່າງ ຢ່າງໜ້ອຍ 1 ແມັດ, ພ້ອມທັງ ໄປຮັບວັກຊີນໃຫ້ຄົບ.

ສຳລັບຜູ້ສຳຜັດໃກ້ຊິດ ກໍໃຫ້ປະຕິບັດຕາມມາດຕະການຈຳກັດບໍລິເວນ ຢ່າງເຂັ້ມງວດ ເພື່ອຊ່ວຍໃນການຕັດວົງຈອນການຕິດເຊື້ອ, ສ່ວນຜູ້ຕິດເຊື້ອ ທີ່ມີອາການເບົາບາງ ຫຼື ບໍ່ສະແດງອາການ ທີ່ໄດ້ຮັບອະນຸຍາດໃຫ້ປິ່ນປົວກັບທີ່ໄດ້ ກໍໃຫ້ປະຕິບັດ ຕາມຄູ່ມືແນະນຳ ຂອງກະຊວງສາທາລະນະສຸກ ຢ່າງເຂັ້ມງວດ. ສໍາຄັນທີ່ສຸດແມ່ນ ຂໍຮຽກຮ້ອງມາຍັງທຸກທ່ານ ຈົ່ງຊ່ວຍກັນຊຸກຍູ້ໃຫ້ສະມາຊິກໃນຄອບຄົວ ແລະ ເພື່ອນບ້ານໃກ້ຄຽງ ໄປຮັບວັກຊີນຕາມທີ່ນາຍົກລັດຖະມົນຕີ ໄດ້ມີຄໍາສັ່ງ ເລກທີ 24, ລົງວັນທີ 10 ພະຈິກ 2021 ເພື່ອສ້າງພູມຄຸ້ມກັນໃຫ້ຕົນເອງ ແລະ ຄອບຄົວ ກໍ່ຄືສັງຄົມ,ຫາກປະຕິບັດໄດ້ແນວນີ້ ກໍ່ຈະຊ່ວຍໃຫ້ເຮົາຫຼຸດຜ່ອນຄວາມສ່ຽງໃນການຕິດເຊື້ອ ແລະ ແຜ່ເຊື້ອໄດ້ຫຼາຍທີ່ສຸດ, ເຮັດໃຫ້ການແກ້ໄຂການລະບາດ ມີປະສິດທິພາບ ແລະ ປະສິດທິຜົນ, ສ້າງເງື່ອນໄຂໃຫ້ແກ່ການດຳລົງຊີວິດ ແລະ ການທໍາມາຫາກິນ ປົກກະຕິແບບໃໝ່ ໂດຍໄວ, ກ້າວໄປສູ່ການເປີດປະເທດເທື່ອລະກ້າວ ຕາມນະໂຍບາຍຂອງລັດຖະບານ. ສຸດທ້າຍນີ້, ຂ້າພະເຈົ້າ ຂໍອວຍພອນໃຫ້ທຸກໆທ່ານ ຈົ່ງມີສຸຂະພາບແຂງແຮງ, ມີຜົນສໍາເລັດ ໃນໜ້າທີ່ວຽກງານຂອງຕົນ ແລະ ປອດໄພ ຈາກເຊື້ອພະຍາດທຸກຊະນິດ.