ໃນວັນທີ 6 ຕຸລາ 2021 ທີ່ສໍານັກງານນາຍົກລັດຖະມົນຕີ, ທ່ານ ພັນຄຳ ວິພາວັນ ນາຍົກລັດຖະມົນຕີ ແຫ່ງ ສປປ ລາວ ໄດ້ພົບປະໂອ້ລົມກັບບັນດາສື່ມວນຊົນ ໃນທົ່ວປະເທດ ຜ່ານລະບົບທາງໄກ ພາຍໃຕ້ຫົວຂໍ້ ການແກ້ໄຂພະຍາດໂຄວິດ-19 ເພື່ອແລກປ່ຽນຄວາມຄິດເຫັນ ແລະ ບາງບັນຫາທີ່ປິ່ນອ້ອມ ກ່ຽວກັບການລະບາດຂອງພະຍາດໂຄວິດ-19 ກັບສື່ມວນຊົນ.

ພ້ອມກັນນີ້, ກໍເພື່ອໃຫ້ສື່ມວນຊົນ ນຳເອົາຂໍ້ມູນຂ່າວສານຕ່າງໆ ເຜີຍແຜ່ໄປຍັງປະຊາຊົນທຸກເຜົ່າຊົນ ໄດ້ຮັບຮູ້ ແລະ ເຂົ້າໃຈສະພາບຄວາມເປັນຈິງ ຂອງການລະບາດຂອງພະຍາດດັ່ງກ່າວ ຢູ່ໃນໂລກ ພາກພື້ນ ກໍຄື ຢູ່ປະເທດເຮົາ ເປັນຕົ້ນ ລະດັບຄວາມຮຸນແຮງຂອງພະຍາດໂຄວິດ-19, ຜົນກະທົບດ້ານຄວາມເສຍຫາຍຕໍ່ມະນຸດ, ການຄວບຄຸມ ສະກັດກັ້ນ ແລະ ຕ້ານກັບພະຍາດດັ່ງກ່າວ ໃນໄລຍະຜ່ານມາ-ປະຈຸບັນ-ໃນຕໍ່ໜ້າ ແລະ ການດໍາລົງຊີວິດປົກກະຕິແບບໃໝ່.

ໃນໂອກາດດັ່ງກ່າວ, ທ່ານ ພັນຄຳ ວິພາວັນ ຍັງໄດ້ຍົກໃຫ້ເຫັນເຖິງສະພາບຄວາມຮຸນແຮງຂອງພະຍາດໂຄວິດ-19 ເຮັດໃຫ້ສົ່ງຜົນກະທົບ ຫລື ສ້າງຄວາມເສຍຫາຍຮ້າຍແຮງໃຫ້ແກ່ມະນຸດ, ໂດຍສະ ເພາະ ເຮັດໃຫ້ມີຜູ້ເສຍຊີວິດຫລາຍລ້ານຄົນ. ພ້ອມກັນນີ້, ຍັງເຮັດໃຫ້ເສດຖະກິດໂລກ, ເສດຖະກິດທຸກປະ ເທດຖົດຖອຍ ແລະ ເຮັດໃຫ້ປ່ຽນແປງຊີວິດການເປັນຢູ່ຂອງມະນຸດ ຈາກໜ້າມືເປັນຫລັງມື.

ໃນຂະນະທີ່ບັນດາປະເທດຕ່າງໆໃນໂລກ ແລະ ວົງຄະນະຍາດສາກົນ ໄດ້ຮ່ວມກັນສະກັດກັ້ນ ແລະ ຕ້ານສຸດຄວາມສາມາດ ແຕ່ກໍ່ຍັງບໍ່ທັນສາມາດປາບປາມໄດ້ສຳເລັດ ແລະ ຍັງມີທີທ່າວ່າຈະສືບຕໍ່ຂະຫຍາຍຕົວຕໍ່ໄປ ຈະເຫັນໄດ້ການຕິດເຊື້ອສະສົມ ເພີ່ມຂຶ້ນແຕ່ລະມື້ຢູ່ໃນແຕ່ລະປະເທດ, ແຕ່ເຖິງຢ່າງໃດກໍຕາມ ວົງຄະນາຍາດສາກົນ ແລະ ບັນດາປະເທດ ກໍ່ໄດ້ສຸມສະຕິປັນຍາຄົ້ນຄວ້າວິໄຈ ວາງມາດຕະການຕ່າງໆ ເພື່ອປ້ອງກັນແກ້ໄຂ ເຊັ່ນ: ຄົ້ນຄວ້າຜະລິດຢາວັກຊິນ ເພື່ອສັກໃຫ້ປະຊາຊົນ, ຄົ້ນຄວ້າຫາວິທີການກວດຫາເຊື້ອ ການຕິດເຊື້ອ, ວິໄຈ ແລະ ຜະລິດຢາປິ່ນປົວ, ກຳນົດມາດຕະການໃນການປິດເມືອງປີດປະເທດ ແລະ ອື່ນໆ.

ສຳລັບ ຢູ່ ສປປ ລາວ ລັດຖະບານ ກໍໄດ້ວາງແນວທາງ ແລະ ມາດຕະການທີ່ສອດຄ່ອງແຕ່ຫົວທີ ໂດຍຖືເອົາການສະກັດກັ້ນ, ປ້ອງກັນເປັນຕົ້ນຕໍ, ການປິ່ນປົວແກ້ໄຂເປັນສຳຄັນ, ຖືການນຳພາຢ່າງລວມສູນ ເປັນເອກະພາບຂອງພັກ ແລະ ບັນຊາບໍລິຫານງານຂອງລັດຖະບານ ແລະ ການເປັນເຈົ້າການເຂົ້າຮ່ວມຂອງປະຊາຊົນ ເປັນປັດໄຈຕັດສິນຜົນສຳເລັດ ພ້ອມນັ້ນກໍ່ອີງໃສ່ການຮ່ວມມືຊ່ວຍເຫລືອ ຂອງບັນດາປະເທດເພື່ອນມິດ ແລະ ອົງການຈັດຕັ້ງສາກົນ.

ນອກຈາກນີ້, ລັດຖະບານ ມີກົນໄກສະດຸ້ງໄວສົມຄວນ ໃນການປັບປຸງແກ້ໄຂບັນຫາ ແຕ່ລະໄລຍະ ແຕ່ລະກໍ່ລະນີ ເປັນຕົ້ນ ການສ້າງຕັ້ງສູນກັກກັນ, ໂຮງໝໍ ຫລື ສູນປິ່ນປົວຊົ່ວຄາວ (ໂຮງໝໍພາກສະໜາມ), ການສັກຢາວັກຊິນ ແລະ ອື່ນໆ.

ໂອກາດນີ້, ທ່ານນາຍົກລັດຖະມົນຕີ ໄດ້ສະແດງຂອບໃຈ ແລະ ຍ້ອງຍໍຊົມເຊີຍ ຕໍ່ສື່ມວນຊົນທຸກພາກສ່ວນ, ພ້ອມຕີລາຄາສູງຕໍ່ທີ່ຕັ້ງ, ບົດບາດ ແລະ ຄວາມສຳຄັນຂອງສື່ມວນຊົນ, ຊຶ່ງເປັນຂົວຕໍ່ໃນການນຳເອົາຂໍ້ມູນຂ່າວສານ ຄວາມເປັນຈິງຕ່າງໆ ກ່ຽວກັບແນວທາງນະໂຍບາຍຂອງພັກ, ກໍ່ຄືແຜນນະໂຍບາຍ ແລະ ລະບຽບກົດໝາຍຂອງລັດ ໄປສູ່ປະຊາຊົນ,

ພ້ອມກັນນັ້ນ ກໍ່ນຳເອົາຄວາມເປັນຈິງ, ຄວາມຄິດຄວາມເຫັນ ຕະຫລອດຮອດຄວາມມຸ້ງມາດປາຖະໜາຂອງປະຊາຊົນ ສ່ອງແສງໃຫ້ແກ່ການນໍາພັກ-ລັດ ໄດ້ຮັບຊາບ ເພື່ອນຳໄປພິຈາລະນາ ກຳນົດປັບປຸງໃຫ້ສົມບູນຂຶ້ນຕື່ມ ທາງດ້ານແນວທາງ ກໍ່ຄືແຜນພັດທະນາເສດ ຖະກິດ-ສັງຄົມຂອງຊາດ ເພື່ອຜົນປະໂຫຍດຂອງຊາດ-ຂອງປະຊາຊົນເຮົາ.

ພ້ອມກັນນັ້ນ, ສື່ມວນຊົນ ກໍ່ຍັງເປັນຂົວຕໍ່ ລະຫວ່າງ ປະຊາຊົນກັບປະຊາຊົນ ໃຫ້ໄດ້ຮັບຮູ້ສະພາບຂໍ້ມູນຂ່າວສານ ຊຶ່ງກັນ ແລະ ກັນ.ທ່ານນາຍົກລັດຖະມົນຕີ ຍັງໄດ້ເນັ້ນໃຫ້ບັນດາສື່ມວນຊົນໃນການໂຄສະນາ ແລະ ຜັນຂະຫຍາຍ ກ່ຽວກັບການດຳລົງຊີວິດປົກກະຕິແບບໃໝ່ໃຫ້ສັງຄົມ ກໍຄືພໍ່ແມ່ປະຊາຊົນໄດ້ຮັບຮູ້ ແລະ ເຂົ້າໃຈຢ່າງເລິກເຊິ່ງ ເຮັດແນວໃດ ເພື່ອປະຊາຊົນພົນລະເມືອງເຮົາ ຕ້ອງດຳລົງຊີວິດຢູ່ໃຫ້ໄດ້ ໃຫ້ມີຄວາມປອດໄພດ້ານຊີວິດ ໃນເງື່ອນໄຂໂຄວິດ-19 ທີ່ຍັງລະບາດຢູ່ນີ້.

ພວກເຮົາຕ້ອງຮຽນຮູ້ ແລະ ປັບຕົວໃຫ້ສອດຄ່ອງ, ມີຊີວິດ, ທຳການຜະລິດ, ຄ້າຂາຍ, ການໄປມາຫາສູ່, ທຳກິດຈະກຳທາງສັງຄົມ ຮີດຄອງປະເພນີຕ່າງໆ ໃຫ້ສອດຄ່ອງ ແລະ ເໝາະສົມ ກັບເງື່ອນໄຂໂຄວິດ-19.

ຂ່າວ: ມະນີທອນ