ແຂວງອຸດົມໄຊ ທຳລາຍເຄື່ອງມືທີ່ນຳໃຊ້ເຂົ້າໃນການທຳລາຍຊັບພະຍາກອນປ່າໄມ້ ແລະ ການລ່າ ສັດນ້ຳ-ສັດປ່າ
![](https://laothai.org/wp-content/uploads/2021/08/fb_img_16281517231206921707355729279723-1024x768.jpg)
ຕອນບ່າຍວັນທີ 4 ສິງຫານີ້ ທີ່ທາງເວັ້ນຕົວເມືອງ ເຂດບ້ານນາໝີ ເມືອງໄຊ ແຂວງອຸດົມໄຊ ໄດ້ຈັດພິທີທຳລາຍ ອຸປະກອນ ແລະ ເຄື່ອງມື ທີ່ນຳໃຊ້ເຂົ້າໃນການທຳລາຍຊັບພະຍາກອນປ່າໄມ້ ແລະ ການລ່າ ສັດນ້ຳ-ສັດປ່າ ທີ່ຢຶດໄດ້ຢູ່ພາຍໃນແຂວງອຸດົມໄຊ.
![](https://laothai.org/wp-content/uploads/2021/08/fb_img_16281517274131322545136398895218.jpg)
ອຸປະກອນ ແລະ ເຄື່ອງມື ຈຳນວນດັ່ງກ່າວ ແມ່ນໄດ້ມາຈາກການລົງເຄື່ອນໄຫວເຮັດວຽກກວດຍືດຂອງກອງກວດກາປ່າໄມ້, ຫ້ອງການກະສິກຳ ແລະ ປ່າໄມ້ 7 ເມືອງ, ກອງກວດກາພາສີ ປະຈຳດ່ານພູຫຼັກຄຳ ແລະ ການເຄື່ອນໄຫວຂອງເຈົ້າໜ້າທີ່ ປກສ ແຂວງອຸດົມໄຊ ຈາກການລັກລອບນຳເຂົ້າ ແລະ ຜູ້ກະທຳຜິດ ຢູ່ພາຍໃນແຂວງອຸດົມໄຊ ລວມມີ: 9 ລາຍການ ໃນນີ້ ມີ:
![](https://laothai.org/wp-content/uploads/2021/08/fb_img_16281517331845911876880948777190.jpg)
ຈັກສະຕິ່ນ (ຈັກຕັດໄມ້) 357 ເຄື່ອງ, ໝໍ້ຊ໋ອດປາ 92 ເຄື່ອງ, ປືນແກັບ 194 ກະບອກ, ເລົາປືນແກັບ 143 ເລົາ, ແກັບ 1 ພັນກ່ວາກັບ, ລູກຂີ້ຊ່າ 1 ພັນກວ່າກິໂລກະລາມ, ໝື້ຫຼາຍກ່ວາ 200 ກິໂລກະລາມ, ມາດ 22 ກິໂລກະລາມ ແລະ ຂີ້ເຈຍ 147 ກິໂລກະລາມ ການທຳລາຍໂດຍນຳໃຊ້ລົດຈົກ ຫລື (ລົດແບັກໂຄ) ເຂົ້າໃນການທັບດັນທຳລາຍ.
![](https://laothai.org/wp-content/uploads/2021/08/fb_img_16281517254406506508407981126769.jpg)
ພິທີມີ ທ່ານ ຄຳພອນ ມຸນລະໄມ ກຳມະການພັກແຂວງ, ຫົວໜ້າພະແນກກະສິກຳ ແລະ ປ່າໄມ້ ແຂວງ, ມີຕາງໜ້າຈາກພະແນກການ, ອົງການຈັດຕັ້ງທີ່ກ່ຽວຂ້ອງ ຕະຫຼອດຮອດພະນັກງານວິຊາການພາຍໃນກອງກວດກາປ່າໄມ້ ແຂວງອຸດົມໄຊ ເຂົ້າຮ່ວມຢ່າງພ້ອມພຽງ.
![](https://laothai.org/wp-content/uploads/2021/08/fb_img_16281517210901946479549200376199.jpg)
ພາບແລະຂ່າວ: ສີຈັນ ເກດວົງສາ
ກວດແກ້: ອ່ຽງຄຳ ວິລະສັກ