ມູນນິທິກອງທຶນ ແບ່ງປັນຊຶ່ງກັນ ແລະ ກັນ (GX Foundation) ໄດ້ນຳເອົາອຸປະກອນການແພດ ປະກອບມີ ຊຸດເຄື່ອງຊ່ວຍຫາຍໃຈ, ຜ້າອັດປາກ-ດັງ, ຖົງມື ແລະ ຊຸດເຄື່ອງນຸ່ງປ້ອງກັນ ຂອງແພດໝໍ ມູນຄ່າ 1 ລ້ານກວ່າໂດລາ (ລວມທັງຄ່າຂົນສົ່ງ) ມອບໃຫ້ແກ່ລັດຖະບານ ສປປ ລາວ ເພື່ອໃຊ້ເຂົ້າໃນປ້ອງກັນ ແລະ ຄວບຄຸມການລະບາດພະຍາດ ໂຄວິດ-19 ໃນ ສປປ ລາວ.

ພິທີມອບ-ຮັບ ເຄື່ອງຊ່ວຍເຫຼືອຄັ້ງນີ້, ໄດ້ຈັດຂຶ້ນໃນວັນທີ 4 ມິຖຸນາ 2021 ທີ່ສໍານັກງານນາຍົກລັດຖະມົນຕີ ຕາງໜ້າມອບໂດຍ ທ່ານ ຫຼຽງ ເຈິນ ຢິງ ຮອງປະທານສະພາທີ່ປຶກສາການເມືອງ ແຫ່ງ ສປ ຈີນ, ປະທານ ມູນນິທິ GX Foundation ແລະ ກ່າວຮັບໂດຍ ທ່ານ ກິແກ້ວ ໄຂຄຳພິທູນ ຮອງນາຍົກລັດຖະມົນຕີ ແຫ່ງ ສປປ ລາວ ມີ ທ່ານ ຈຽງຈ້າຍຕົງ ເອກອັກຄະລັດຖະທູດ ແຫ່ງ ສປ ຈີນ ປະຈຳ ສປປ ລາວ, ພ້ອມດ້ວຍພະນັກງານ ທັງສອງຝ່າຍເຂົ້າຮ່ວມ ເປັນສັກຂີພິຍານ.

ໂອກາດນີ້, ທ່ານ ກິແກ້ວ ໄຂຄຳພິທູນ ໄດ້ກ່າວສະແດງຄວາມຂອບໃຈ ມາຍັງມູນນິທິດັ່ງກ່າວ ທີ່ໄດ້ໃຫ້ການຊ່ວຍເຫຼືອ ດ້ານອຸປະກອນການແພດໃນຄັ້ງນີ້ ແລະ ຂໍສັນຍາວ່າ ຈະນຳໃຊ້ເຄື່ອງຊ່ວຍເຫຼືອດັ່ງກ່າວ ໃຫ້ເກີດປະໂຫຍດສູງສຸດ.

ຂ່າວ-ພາບ: ນາງ ແສງຈັນ