ກະຊວງໂຍທາທິການ ແລະຂົນສົ່ງໄດ້ຕົກລົງໃຫ້ກໍ່ສ້າງຂົວນໍ້າພະນາຍ ບ້ານເກິນກາງ, ເມືອງທຸລະຄົມ, ແຂວງວຽງຈັນ ເປັນຂົວເບຕົງເສີມເຫຼັກແບບແໜ້ນໜາຖາວອນໂດຍການສ້າງຂົວດັ່ງກ່າວຈະນຳໃຊ້ງົບປະມານທັງໝົດເກືອບ 5 ຕື້ກີບ. ໃນວັນທີ 3 ພຶດສະພາ 2021 ນີ້,
![](https://pakaad.com/wp-content/uploads/2021/05/້້ິິິ.jpg)
ຄະນະຮັບຜິດຊອບການກໍ່ສ້າງໂດຍມີ ທ່ານ ບົວຈັນ ອ້ວນສະຫວັນ ຮອງຫົວໜ້າ ກົມຂົວທາງກະຊວງໂຍທາທິການ ແລະຂົນສົ່ງ, ທ່ານ ນາງ ວົງເດືອນ ວັດຕະໂສ ເຈົ້າເມືອງທຸລະຄົມ, ທ່ານ ພຸດສະດຸ ອິນ ທະວົງ ປະທານບໍລິສັດມາລີນີ ຈໍາກັດ ໃນນາມຜູ້ຮັບເໝົາກໍ່ສ້າງ, ພ້ອມດ້ວຍວິຊາການ ແລະພາກສ່ວນກ່ຽວຂ້ອງໄດ້ລົງກວດກາເບິ່ງພື້ນທີ່ຕົວຈິງ. ໂຄງການກໍ່ສ້າງຂົວດັ່ງກ່າວ, ມີມູນຄ່າການກໍ່ສ້າງທັງໝົດ 4,7 ຕື້ກວ່າກີບ ໂດຍແມ່ນທຶນສົມທົບຂອງກອງທຶນທາງ ຫຼວງແຫ່ງຊາດ 80% ເທົ່າກັບ 3,8 ຕື້ກວ່າກີບ ແລະບໍລິສັດມາລີນີ 20% ເທົ່າກັບ 950 ລ້ານກວ່າກີບ, ລວງຍາວຂອງຂົວ 25 ແມັດ, ລວງກວ້າງ 12 ແມັດ, ກໍານົດເວລາໃນການກໍ່ສ້າງ 1 ປີ ໂດຍມອບກົມຂົວທາງເປັນເຈົ້າຂອງໂຄງການ. ຂົວຂ້າມນໍ້າພະນາຍ ບ້ານເກິນກາງ, ເມືອງທຸລະຄົມ, ແຂວງວຽງຈັນ ໄດ້ຫັກພັງລົງຄັ້ງຫຼ້າສຸດໃນວັນທີ 9 ເມສາ 2021 ຜ່ານມາ,
![](https://pakaad.com/wp-content/uploads/2021/05/ຳຳ-768x1024.jpg)
ອົງການປົກຄອງເມືອງທຸລະຄົມສົມທົບກັບພະແນກໂຍທາທິການ ແລະ ຂົນສົ່ງແຂວງວຽງຈັນໄດ້ຮີບຮ້ອນລາຍງານໃຫ້ອົງການປົກຄອງແຂວງວຽງຈັນຮັບຊາບ ແລະມີທິດຊີ້ນໍາເພື່ອວາງແຜນສ້ອມ ແປງຂົວໃຫ້ນໍາໃຊ້ໄດເປັນປົກກະຕິ, ຊຶ່ງນັບແຕ່ຂົວນ້ຳພະນາຍໄດ້ຫັກລົງເຮັດໃຫ້ການສັນຈອນໄປມາມີຄວາມຫຍຸ້ງຍາກໃນການເດີນທາງຜ່ານທາງເວັ້ນສໍາຮອງ, ລົດກໍ່ມີຄວາມແອອັດ, ການໄປມາຊັກຊ້າ.
![](https://pakaad.com/wp-content/uploads/2021/05/ືື້້-1024x768.jpg)
ການນໍາຂອງເມືອງ ແລະພາກສ່ວນກ່ຽວຂ້ອງກໍ່ມີຄວາມເຫັນອົກເຫັນໃຈ, ເຫັນຄວາມຫຍຸ້ງຍາກຂອງຜູ້ເດີນທາງໂດຍສະເພາະແມ່ນປະຊາຊົນບັນດາເຜົ່າຊາວເມືອງທຸລະຄົມ ແລະປະສານງານຢ່າງໃກ້ສິດກັບອົງການປົກຄອງແຂວງເພື່ອດໍາເນີນການເລັ່ງທວງໃຫ້ພາກສ່ວນກ່ຽວຂ້ອງຮັບ ຜິດຊອບການກໍ່ສ້າງຂົວຄືນໃໝ່ໃນເວລາອັນຄວນ, ເນື່ອງຈາກປະຈຸບັນເສັ້ນທາງເລກ 10 ຂອບ ເຂດເມືອງທຸລະຄົມແມ່ນມີລົດໜັກ ແລະລົດເບົາທຽວຜ່ານການເປັນຈໍານວນຫລາຍໃນແຕ່ລະວັນ. ສະນັ້ນ, ມາໃນວັນທີ 31 ມີນາ 2021 ກະຊວງໂຍທາທິການ ແລະຂົນສົ່ງຈຶ່ງໄດ້ຕົກລົງໃຫ້ກໍ່ສ້າງຂົວນໍ້າພະນາຍ ເປັນຂົວເບຕົງເສີມເຫຼັກແບບແໜ້ນໜາຖາວອນ ແລະໄດ້ຕົກລົງໃຫ້ບໍລິສັດ ມາລີນີ ຈໍາກັດຜູ້ດຽວ ຮັບເໝົາການກໍ່ສ້າງ. ຂໍ້ມູນ-ພາບ: ຫ້ອງການ ຖວທ ເມືອງທຸລະຄົມ.