ຄະນະສະເພາະກິດແຂວງຫຼວງພະບາງຢືນຢັນຊາວຈີນທີ່ມາແຕ່ແຂວງອຸດົມໄຊ ໄດ້ຜ່ານກັກກັນຕາມລະບຽບແລ້ວ ແຕ່ຈະມີການກວດຫາເຊື້ອໂຄວິດ 19 ຕື່ມອີກ
ກ່ຽວກັບບັນຫາພະນັກງານໂຄງການກໍ່ໍ່ສ້າງທາງລົດໄຟ ທີ່ເປັນຄົນຈີນໄດ້ເດີນທາງມາແຕ່ ແຂວງອຸດົມໄຊ ແລ້ວຄະນະສະເພາະກິດແຂວງອຸດົມໄຊ ໄດ້ນຳມາຮັບຄືນໄປແຂວງອຸດົມໄຊຈຳນວນໜື່ງ ໃນຄ່ຳຄືນຂອງວັນທີ 15 ພຶດສະພາ 2021 ອັນໄດ້ເຮັດໃຫ້ສັງຄົມແຕກຕື່ນ ໂດຍສະເພາະແມ່ນຊາວຫຼວງພະບາງ ຈາກຂ່າວລືວ່າມີກໍລະນີຕິດເຊື້ອພະຍາດ ໂຄວິດ-19 ໂດຍລວມບໍ່ມີມູນຄວາມຈິງ.
ເຊີ່ງວັນທີ 16 ພຶດສະພາ 2021 ນີ້ ດຣ ວິຣະສັກ ບານຸວົງ ຫົວໜ້າຂະແໜງຄວບຄຸມພະຍາດຕິດຕໍ່ ພະແນກສາທາລະນະສຸກແຂວງ ຫົວໜ້າກອງເລຂາ, ຄະນະສະເພາະກິດປ້ອງກັນ, ຄວບຄຸມ ແລະແກ້ໄຂການລະບາດພະຍາດ ໂຄວິດ-19 ແຂວງຫຼວງພະບາງ ໄດ້ໃຫ້ສຳພາດຕໍ່ສື່ມວນຊົນແຂວງ ວ່າ:
ພະນັກງານຄົນຈີນ ທີ່ເຮັດວຽກກັບໂຄງການທາງລົດໄຟ ໄດ້ເດີນທາງມາຈາກແຂວງອຸດົມໄຊ ມີຈຳນວນ 10 ຄົນ, ພະນັກງານຂັບ 2 ຄົນ, ໄດ້ໄດ້ເຂົ້າພັກຢູ່ໂຮງແຮມຫາຍໂສກ ບ້ານພະບາດ ນະຄອນ ຫຼວງພະບາງ ໂດຍມີພະນັກງານວິຊາການ ຢູ່ແຂວງຫຼວງພະບາງອີກ 6 ຄົນ, ທີ່ເຂົ້າພັກຢູ່ໂຮງແຮມດຽວກັນ, ສຳລັບຄົນຈີນ ທີ່ເດີນທາງມາແຕ່ ແຂວງອຸດົມໄຊ ໄດ້ຜ່ານການກັກຕົວ ຢູ່ແຂວງຫຼວງນໍ້າທາ ຕາມກຳນົດ 14 ວັນ ແລະໄດ້ກວດຫາເຊື້ອໂຄວິດ-19 ແລ້ວ ແຕ່ບໍ່ພົບຜູ້ຕິດເຊື້ອຈັກກໍລະນີ, ພາຍຫຼັງໄດ້ເດີນຈາກແຂວງຫຼວງນໍ້າທາ ມາແຂວງອຸດຸມໄຊ ຄະນະສະເພາະກິດແຂວງອຸດົມໄຊ ໄດ້ກວດຫາເຊື້ອໂຄວິດ-19 ອີກຄັ້ງ, ເຊີ່ງຜົນກວດແມ່ນມີ 1 ກໍລະນີ ບໍ່ທັນຊັດເຈນ ຄະນະສະເພາະກິດ ໄດ້ແນະນຳໃຫ້ພວກກ່ຽວລໍຖ້າກວດຊໍ້າຄືນຕື່ມ ເພື່ອເປັນການຢືນຢັນ, ແຕ່ພວກກ່ຽວພັດເດີນທາງເຂົ້າມາແຂວງຫຼວງພະບາງກ່ອນ ໂດຍທີ່ຍັງບໍ່ຮູ້ຜົນຊັດເຈນ
ຄະນະສະເພາະກິດແຂວງອຸດົມໄຊ ຈື່ງໄດ້ນຳມາສົມທົບກັບ ຄະນະສະເພາະກິດແຂວງຫຼວງພະບາງ ເພື່ອດຳເນີນການກວດຫາເຊື້ອ ພ້ອມທັງກັດກັນພວກກ່ຽວ ຈົນກ່ວາຜົນກວດຈະບພົບເຊື້ອ. ປະຈຸບັນ ຄະນະສະເພາະກິດແຂວງຫຼວງພະບາງ ສຳເລັດການສຳຫຼວດເກັບກຳຂໍ້ມູນກັບພວກກ່ຽວ ທັງໄດ້ເກັບຕົວຢ່າງໄປກວດທັງໝົດ 18 ກໍລະນີ ໃນນັ້ນ ມີພະນັກງານຄົນຈີນ ທີ່ທາງເດີນມາ 10 ຄົນ, ພະນັກງານຂັບລົດ 2 ຄົນ ແລະພະນັກງານວິຊາການຢູ່ໂຮງແຮມຫາຍໂສກອີກ 6 ຄົນ.
ທັງໄດ້ມອບໃຫ້ເຈົ້ໜ້າທີ່ ແລະອົງການປົກຄອງບ້ານ ປະຈຳການຢູ່ໜ້າໂຮງແຮມຫາຍໂສກ ເພື່ອຈຳກັດບໍລິເວນພວກກ່ຽວ ຖ້າຫາກຜົນກວດ ບໍ່ພົບກໍລະນີຕິດເຊື້ອ ໂຄວິດ-19 ຈື່ງຈະໃຫ້ພວກກ່ຽວ ສືບຕໍ່ຈຳກັດບໍລິເວນ ເພື່ອຕິດຕາມອາການຂອງຕົນເອງຕື່ມ ຫາກບໍ່ມີອາການເຂົ້ານິຍາມຂອງພະຍາດໂຄວິດ ຈື່ງຈະໃຫ້ໄປເຮັດວຽກງານໄດ້. ໂອກາດນີ້ ດຣ ວິລິສັກ ບານຸວົງ ໄດ້ຮຽກຮ້ອງໃຫ້ທຸກຄົນໃນທົ່ວສັງຄົມ ຢ່າໄດ້ແຕກຕື່ນກັບຂ່າວທີ່ບໍ່ມີມູນຄວາມຈິງ ຈົ່ງຕິດຕາມຂໍ້ມູນຂ່າວສານຈາກສື່ມວນຊົນຂອງແຂວງເທົ່ານັ້ນ ເຊີ່ງຄະນະສະເພາະກິດຂອງແຂວງ ຈະມີການຖະແຫຼງຂ່າວ ແລະໃຫ້ຂໍໍ້ມູນທີ່ຊັດເຈນເປັນປົກກະຕິ.
ລາຍງານໂດຍ: ອາພຸດເດດ ບຸບຜາ
