ໃນວັນທີ 11 ພຶດສະພາ 2021 ນີ້, ສະຫາຍ ພັນໂທ ທອງໄຂ ສີຍາລາດ ຮອງເລຂາຄະນະພັກ ຫົວໜ້າການທະຫານ ກອງບັນຊາການທະຫານແຂວງບໍ່ແກ້ວ ແລະ ສະຫາຍ ພັນເອກ ຈັນທະລາ ໄຊຍະວົງ ຮອງຫົວໜ້າກອງບັນຊາການ ປກສ ແຂວງ ລົງກວດກາໂຄງການກໍ່ສ້າງສະໜາມບິນສາກົນ ເຂດເສດຖະກິດພິເສດ ສາມຫຼ່ຽມຄຳ ໂດຍຕິດພັນກັບການສະກັດກັ້ນການລັກລອບເຂົ້າ-ອອກເຂດ.
ເປັນກຽດເຂົ້າຮ່ວມຂອງ ສະຫາຍ ຄຳແຍງ ຄອນໄຊຍະກິດ ເລຂາພັກເມືອງ ເຈົ້າເມືອງໆຕົ້ນເຜິ້ງ ມີ ປກຊ-ປກສ ແຂວງ, ປກສ-ປກຊ ເມືອງ, ປກຊ ເຂດເສດຖະກິດ, ລປພ ເຂດ, ຄະນະຄຸ້ມຄອງເຂດ ຕະຫຼອດຮອດວິຊາການປະຈໍາບ່ອນກໍ່ສ້າງເຂົ້າຮ່ວມ.
ເພື່ອຕອບຕ້ານ ແລະ ປ້ອງກັນການແຜ່ລະບາດຂອງພະຍາດລະບາດໂຄວິດ-19 ຫຼາຍພາກສ່ວນໄດ້ເປັນເຈົ້າການປະຕິບັດຕາມມາດຕະການຕ່າງໆ ທີ່ຂັ້ນເທິງວາງອອກ ເວົ້າລວມ ເວົ້າສະເພາະ ຢູ່ເຂດກໍ່ສ້າງສະໜາມບິນສາກົນເຂດເສດຖະກິດພິເສດສາມຫຼ່ຽມຄຳ ແມ່ນມີຄວາມເຂັ້ມງວດ.
ການຈັດຕັ້ງປະຕິບັດມາດຕະການຕ່າງໆ ທີ່ຂັ້ນເທິງວາງອອກໃນການສະກັດກັ້ນ ແລະ ຕອບຕ້ານກັບພະຍາດໂຄວິດ-19 ຢູ່ເຂດດັ່ງກ່າວໄດ້ຈັດຕັ້ງກວດກາຄົນເຂົ້າ-ອອກ ເຊິ່ງໃນໄລຍະຜ່ານມາການຈັດຕັ້ງປະຕິບັດແມ່ນມີຄວາມສະຫງົບໂດຍພື້ນຖານ. ການສັນຈອນໄປມາແມ່ນມີຄວາມເປັນລະບຽບຮຽບຮ້ອຍສາມາດຮັບປະກັນໄດ້ຕາມມາດຕະການປ້ອງກັນພະຍາດໂຄວິດ-19 ແຕ່ເຖິງຢ່າງໃດກໍ່ຕາມ ການເຂົ້າ-ອອກ ເຂດຕ້ອງໄດ້ຮັບອະນຸຍາດຈາກຜູ້ຊີ້ນຳເຂດດັ່ງກ່າວໂດຍໄດ້ນຳໃຊ້ມາດຕະການຢ່າງເດັດຂາດຫ້າມເຂົ້າ-ອອກເຂດ ຖ້າບໍ່ໄດຮັບອະນຸຍາດ.
ສະນັ້ນ, ຄະນະຮັບຜິດຊອບດ່ານດັ່ງກ່າວ ຈຶ່ງຮຽກຮ້ອງມາຍັງພະນັກງານລັດທຸກພາກສ່ວນ ແລະ ຫົວໜ່ວຍທຸລະກິດຕະຫຼອດຮອດເຖິງພໍ່ແມ່ປະຊາຊົນ ຕ້ອງເປັນເຈົ້າການນຳກັນ ເພື່ອພ້ອມ ກັນປະຕິບັດມາດຕະການຕ່າງໆທີ່ຂັ້ນເທິງວາງອອກ ແນໃສ່ເຮັດໃຫ້ການສະກັດກັ້ນ ແລະ ຕອບຕ້ານພະຍາດໂຄວິດ-19 ໃຫ້ຫຼຸດໜ້ອຍຖອຍລົງ ແລະ ໃຫ້ໝົດໄປຈາກປະເທດຂອງພວກເຮົາ.
ໂດຍ: ວໍລະສິດ ພິດສະຫາຍ.
ຫນັງສືພິມບໍ່ແກ້ວ
