ອົງການອາສາສະໝັກນາໆຊາດຍີ່ປຸ່ນ ປະຈຳລາວ (IV-JAPAN) ໄດ້ຈັດພິທີປິດຝຶກອົບຮົມການດູແລເບິ່ງແຍງຜູ້ສູງອາຍຸ ລຸ້ນທີ I ພາຍໃຕ້ໂຄງການຝຶກອົບຮົມວິຊາຊີບ ການດູແລເບິ່ງແຍງຜູ້ສູງອາຍຸ ໃຫ້ຊາວໜຸ່ມ, ແມ່ຍິງ ແລະ ຜູ້ດ້ອຍໂອກາດ.
ພິທີດັ່ງກ່າວ, ໄດ້ຈັດຂຶ້ນໃນວັນທີ 26 ກຸມພາ 2021 ທີ່ສູນຝຶກອົບ ຮົມວິຊາຊີບ ເມືອງນາຊາຍທອງ ນະຄອນຫລວງວຽງວຽງຈັນ.
ທ່ານ ຮິໂຣຍູກິ ຫົວໜ້າໂຄງການ ອົງການອາສາສະໜັກນາໆຊາດຍີ່ປຸ່ນ ປະຈຳລາວ ໄດ້ລາຍງານໃຫ້ຮູ້ວ່າ: ການຝຶກອົບຮົມຄັ້ງນີ້, ໄດ້ເລີ່ມຝຶກອົບຮົມແຕ່ຕົ້ນເດືອນທັນວາ ແລະ ສຳເລັດລົງໃນທ້າຍເດືອນກຸມພາ, ຜ່ານການຮ່ຳຮຽນດັ່ງກ່າວ ສຳມະນາກອນໄດ້ຮຽນຮູ້ກ່ຽວກັບຈະລິຍະທຳ, ການດູແລເບິ່ງແຍງ ແລະ ການຍ່ອມຮັບຜູ້ສູງອາຍຸ; ສິ່ງແວດລ້ອມ, ການປ່ຽນແປງທາງດ້ານຮ່າງກາຍ ແລະ ເຄັດລັບການດູແລເບິ່ງແຍງ; ການກວດຮ່າງກາຍໃນເບື້ອງຕົ້ນ; ການອາບນໍ້າ, ການສະຜົມ ແລະ ການປ່ຽນເຄື່ອງນຸ່ງຢູ່ເທິງຕຽງ; ການປູຕຽງ ແລະ ການອະນາໄມ້ຫລັງຂັບຖ່າຍ; ການປ້ອນອາຫານຜູ້ສູງອາຍຸ; ການລຸກ, ຢືນ, ການນັ່ງ ແລະ ການຍ່າງ; ການຊ່ວຍເຫລືອຜູ້ສູງອາຍຸນັ່ງລໍ້; ການຮັບມືກັບພາວະສຸກເສີນ, ການຊ່ວຍບໍລິຫານຮ່າງກາຍສ່ວນຕ່າງໆ ຂອງຜູ້ສູງອາຍຸ ແລະ ອື່ນໆ.
ໃນໂອກາດນີ້, ທ່ານ ສົມພອນ ສອນດາລາ ຫົວໜ້າພະແນກສຶກສາທິການ ແລະ ກິລາ ນະຄອນ ຫລວງວຽງຈັນ ໄດ້ສະແດງຄວາມຂອບໃຈ ຕໍ່ອົງການອາສາສະໝັກນາໆຊາດຍີ່ປຸ່ນ ປະຈຳລາວ ທີ່ເຫັນໄດ້ເຖິງຄວາມສຳຄັນ ໃນວຽກງານພັດທະນາທາງດ້ານຊັບພະຍາກອນມະນຸດ ແລະ ການຍົກລະດັບສີມືແຮງງານລາວ ໃຫ້ມີຄຸນນະພາບ, ພ້ອມທັງຮຽກຮ້ອງໃຫ້ສຳມະນາກອນ ຈົ່ງນຳເອົາຄວາມຮູ້ທີ່ໄດ້ຮຽນ ນຳກັບໄປພັດທະນາວຽກງານຂອງຕົນໃຫ້ເກີດຜົນປະໂຫຍດສູງສຸດ.
ຂ່າວ: ກິດຕາ