ເມືອງທຸລະຄົມຕະລຸມບອນສັກວັກຊິນຮອດເຮືອນໃຫ້ປະຊາຊົນ

ສາທາລະນະສຸກເມືອງທຸລະຄົມສືບຕໍ່ລົງສັກວັກຊິນແບບຕະລຸມບອນໃຫ້ປະຊາຊົນ

ເພື່ອສືບຕໍ່ປະຕິບັດຕາມທິດຊີ້ນໍາຂອງການນໍາເມືອງທຸລະຄົມ ແຂວງວຽງຈັນ, ຄະນະສະ ເພາະກິດເມືອງ, ກໍ່ຄືການຕົກລົງຂອງຄະນະສະເພາະກິດແຂວງວຽງຈັນ, ໂດຍສະເພາະການຈັດ ຕັ້ງປະຕິບັດຄຳສັ່ງເລກທີ 24/ນຍ, ລົງວັນທີ 10 ພະຈິກ 2021 ວ່າດ້ວຍການເພີ່ມທະວີສັກວັກຊິນປ້ອງກັນພະຍາດໂຄວິດ- 19;

ສະນັ້ນ ແພດໝໍຄະນະຮັບ ຜິດຊອບວຽກງານສັກຢາຂອງຫ້ອງການສາທາລະນະສຸກເມືອງ ຈຶ່ງໄດ້ສືບຕໍ່ເລັ່ງລົງມືສັກວັກຊິນປ້ອງກັນພະຍາດໂຄວິດ -19 ແບບຕະລຸມບອນ ຕາມແຜນການ ແລະ ລາຍຊື່ທີ່ໄດ້ຂຶ້ນແຜນເກັບກໍາສັງລວມໄວ້, ໂດຍຈັດຕັ້ງກັນລົງໄປສັກໃຫ້ປະຊາຊົນຢູ່ກັບເຮືອນ, ເປັນຕົ້ນ ຜູ້ເຖົ້າ, ຄົນພິການໄປມາຍາກ ທີ່ມີເງື່ອນໄຂສາມາດສັກໄດ້, ຊຶ່ງຜ່ານການຈັດຕັ້ງປະຕິບັດຕົວຈິງມາເຖິງປັດຈຸບັນ ທົ່ວເມືອງສາມາດສັກວັກຊິນເຂັມທີໜຶ່ງໄດ້ 30.391 ຄົນ ເທົ່າກັບ 52%, ເຂັມທີສອງ ໄດ້ 25.296 ຄົນ ເທົ່າກັບ 43% ຂອງຈຳນວນພົນລະເມືອງທັງໝົດ ຈຳນວນ 58.390 ຄົນ, ໄດ້ລົງສັກຢູ່ 9 ບ້ານ ຄື: ບ້ານນໍ້າຫຍາມ, ພູເຂົາຄວາຍ, ນາເງິນ, ນານົກຂຸ້ມ, ບ້ານດົງ, ໜອງພົງ, ສຸກສາລາ ແລະ ບ້ານຫາດສວນ;

ອີງຕາມການລາຍງານຂອງ ທ່ານ ດິ້ງ ເລືອງໄຊ ກຳມະການພັກເມືອງ, ຫົວໜ້າຫ້ອງການສາທາລະນະສຸກເມືອງທຸລະຄົມ ໃນວັນທີ 27 ພະຈິກ 2021 ໃຫ້ຮູ້ວ່າ: ໃນສະເພາະໜ້ານີ້ ຄະນະສະເພາະກິດເມືອງ ກໍ່ຄືຫ້ອງການສາທາ ລະນະສຸກເມືອງ ໄດ້ກະກຽມຄວາມພ້ອມ ສືບຕໍ່ສັກວັກຊິນໃຫ້ກຸ່ມເປົ້າໝາຍທີ່ມີອາຍຸແຕ່ 12 ຫາ ອາຍຸ 17 ປີ ແນໃສ່ຮັບປະກັນໃຫ້ອັດຕາປົກຄຸມຂອງຜູ້ໄດ້ຮັບການສັກວັກຊິນບັນລຸຕາມຈຸດປະສົງ ແລະ ສຳເລັດຕາມແຜນການ, ຕິດພັນກັບການສ້າງຂະບວນ ການກະກຽມຄວາມພ້ອມເປີດປະເທດເທື່ອລະກ້າວ ເພື່ອແກ້ໄຂຜົນກະທົບທາງດ້ານເສດຖະກິດ ແລະ ຊີວິດການເປັນຢູ່ຂອງປະ ຊາຊົນບັນດາເຜົ່າ, ແຕ່ຕ້ອງຮັບ ປະກັນໃຫ້ປະຊາຊົນ-ລູກຫລານມີຄວາມປອດໄພ ຄ່ອຍໆຫ່າງໄກຫລີກເວັ້ນຈາກເຊື້ອພະຍາດໂຄວິດ 19, ປຸກລະດົມປະຊາຊົນທຸກຊັ້ນຄົນໃນສັງຄົມ ເປັນເຈົ້າການຕອບໂຕ້ ແລະ ປະຕິບັດມາດຕະການປ້ອງກັນຕົນເອງຢ່າງເຂັ້ມງວດ.

ປັດຈຸບັນໄດ້ເອກະພາບກັບຄະນະສະເພາະກິດເມືອງ, ປະ ສານງານກັບຄະນະກຸ່ມບ້ານ ແລະ 42 ບ້ານ ພາຍ ໃນເມືອງ ເພື່ອເກັບກຳລາຍ ຊື່ຜູ້ມີອາຍຸແຕ່ 12 ປີ ຫາອາຍຸ 17 ປີ ວາງແຜນສັກໃຫ້ສຳເລັດ, ເຊິ່ງຄາດຄະເນຈະໄດ້ຈັດຕັ້ງປະຕິບັດໃນຕົ້ນເດືອນທັນວາ 2021ນີ້ .ປັດຈຸບັນທົ່ວເມືອງມີຕົວເລກຜູ້ຕິດເຊື້ອພະຍາດໂຄວິດ-19 ສະສົມທັງໝົດ 582 ຄົນ, ກໍາລັປິ່ນປົວ 202 ຄົນ, ປິ່ນປົວດີ 380 ຄົນ, ເສຍຊິວິດສະສົມ 3 ຄົນ

ຂ່າວ: ຖວທ ເມືອງທຸລະຄົມ.