ທ້າຍອາທິດທີ່ຜ່ານມານີ້, ທ່ານ ສີເຮັ່ງ ຫອມສົມບັດ ຮອງເລຂາພັກແຂວງສາລະວັນ ພ້ອມ ດ້ວຍພາກສ່ວນທີ່ກ່ຽວຂ້ອງຂັ້ນແຂວງ ແລະ ເມືອງ ໄດ້ລົງຢ້ຽມຢາມ ພ້ອມທັງໄດ້ມອບເຄື່ອງຈຳນວນໜຶ່ງ ແລະ ເງິນສົດ 2 ລ້ານກີບ ໃຫ້ຜູ້ທີ່ໄດ້ຮັບຜົນກະທົບຈາກອັກຄີໄພ (ໄຟໄໝ້ເຮືອນ) ຢູ່ທີ່ບ້ານບຸດຕະພານ ແລະ ບ້ານປາກຕະພານ ເມືອງລະຄອນເພັງ ແຂວງສາລະວັນ, ຄອບຄົວລະ 1 ລ້ານກີບ, ເພື່ອເປັນການ ຊ່ວຍບັນເທົາທຸກ ແລະ ປົວແປງສະພາບຈິດໃຈຂອງຄອບຄົບຜູ້ປະສົບອັກຄີໄພໃຫ້ມີສະພາບຈິດໃຈດີຂຶ້ນ.

ເຫດໄຟໄໝ້ເຮືອນທັງສອງຫຼັງນີ້, ແມ່ນເກີດຂຶ້ນໃນເດືອນກຸມພາທີີ່ຜ່ານມາ ຊຶ່ງສາເຫດແມ່ນເກີດ ຈາກໄຟຟ້າລັດວົງຈອນ ຢູ່ບ້ານບຸດຕະພານ ແມ່ນເປັນເຮືອນທີ່ເຮັດດ້ວຍເສົາປູນ, ປູແປ້ນ, ແອ້ມແປ້ນ ແລະ ມຸງດ້ວຍສັງກະສີ ເປັນເຮືອນຂອງທ່ານ ນາງ ລິດສະໄໝ ແກ້ວກັນຍາ, ເຫດເກີດຂຶ້ນໃນວັນທີ 14 ເດືອນກຸມພາ 2021 ເວລາ 11 ໂມງ 30 ນາທີ, ລວມມູນຄ່າການເສຍຫາຍ ຈາກເຫດການ ໄຟໄໝ້ຄັ້ງນີ້ມີ 151 ລ້ານກວ່າກີບ.

ສ່ວນຢູ່ບ້ານປາກຕະພານ ແມ່ນເປັນເຮືອນຂອງ ທ່ານ ເຕ້ຍ ຜິວບັບພາ ເຫດເກີດຂຶ້ນໃນວັນທີ 19 ເດືອນກຸມພາ 2021 ເວລາ 9 ໂມງ, ເປັນເຮືອນທີ່ປູດ້ວຍແປ້ນ, ແອ້ມດ້ວຍຝາກະຕີ ແລະ ມຸງດ້ວຍສັງກະສີ, ລວມມຸູນຄ່າການເສຍຫາຍ 27 ລ້ານກວ່າກີບ. ລວມມູນຄ່າການເສຍຫາຍທັງສອງຫຼັງ 178 ລ້ານກວ່າກີບ.

ພາບ-ຂ່າວ: ສິດຕາ ເພັດວົງສາ

ກົດຮູບເພື່ອງອ່ານເພີ່ມເຕີມ