ໂຄງການສົ່ງເສີມໂພສະນາການໃຫ້ແກ່ນັກຮຽນໃນໂຮງຮຽນ ແລະ ຊຸມຊຸມ ຮ່ວມກັບເມືອງຈອມເພັດໄດ້ຈັດກອງປະຊຸມປຶກສາຫາລື ແລະ ແລກປ່ຽນຄຳຄິດຄຳເຫັນກ່ຽວກັບບົດບັນທຶກການຕົກລົງຮ່ວມກັນ ກອງປະຊຸມດັ່ງກ່າວໄດ້ຈັດຂື້ນເມື່ອວັນທີ 3 ມີນາ 2021 ຜ່ານມາທີ່ພະແນກສຶກສາທິການ ແລະ ກິລາແຂວງຫຼວງພະບາງ ໂດຍການເປັນປະທານຮ່ວມຂອງທ່ານ ອະນຸແພງ ແກ້ວວົງສາ ຮອງຫົວໜ້າພະແນກສຶກສາທິການ ແລະ ກິລາແຂວງຫຼວງພະບາງ, ທ່ານ ນາງ ແສງມະນີ ເພັດສະວົງ ຮອງຫົວໜ້າພະແນກການພົວພັນຕ່າງປະເທດ, ທ່ານ ບຸນເພັງ ທຳມະວົງ ຫົວໜ້າຝ່າຍປະຕິວັດງານ ຈາກອົງການກູດແນ່ເບີ ປະຈໍາລາວ, ມີທ່ານຜູ້ຕ່າງໜ້າ ຈາກກະຊວງການຕ່າງປະເທດ, ກະຊວງສຶກສາທິການ ແລະ ກິລາ, ຫົວໜ້າ-ຮອງຫົວໜ້າຂະແໜງ, ພະນັກງານວິຊາການຈາກພະແນກອ້ອມຂ້າງແຂວງ, ຫ້ອງວ່າການປົກຄອງເມືອງ, ຫ້ອງການສຶກສາທິການ ແລະ ກິລາເມືອງ ແລະ ວິຊາການທີ່ກ່ຽວຂ້ອງເຂົ້າຮ່ວມ.

ໃນກອງປະຊຸມ, ຜູ້ແທນໄດ້ຮັບຟັງການນຳສະເໜີຮ່າງບົດບັນທຶກການຕົກລົງຮ່ວມກັນຂອງໂຄງການສົ່ງເສີມໂພສະນາການໃຫ້ແກ່ນັກຮຽນໃນໂຮງຮຽນ ແລະ ຊຸມຊົນທີ່ເມືອງຈອມເພັດ ແຂວງຫຼວງພະບາງຈາກນັ້ນ ຜູ້ເຂົ້າຮ່ວມທຸກພາກສ່ວນໄດ້ພ້ອມກັນປະກອບຄຳຄິດຄຳເຫັນດ້ວຍຄວາມຮັບຜິດຊອບສູງ ແລະ ກົງໄປກົງມາຕໍ່ກັບຄຳຖາມ ແລະ ຂໍ້ສະ ເໜີແນະຕ່າງໆ ເພື່ອຄວາມເປັນເອກະພາບທາງດ້ານຫຼັງການ ແລະ ສາມາດເປັນມະຕິຂອງກອງປະຊຸມຮ່ວມກັນ ເພື່ອເປັນບ່ອນອີງໃນການຈັດຕັ້ງປະຕິບັດວຽກງານດັ່ງກ່າວໃນຕໍ່ໜ້າ.

ໂອກາດນີ້, ທ່ານ ອະນຸແພງ ແກ້ວວົງສາ ໄດ້ສະເໜີໃຫ້ຄະນະຮັບຜິດຊອບກອງປະຊຸມປັບປຸງຄືນກ່ຽວກັບມະຕິຂອງກອງປະຊຸມເພື່ອເຮັດໃຫ້ມີເນື້ອໃນສົມບູນ,ຖືກຕ້ອງ ແລະ ສອດຄ່ອງກັບການຈັດຕັ້ງປະຕິບັດວຽກງານຕົວຈິງ ແລະ ເປັນນິຕິກຳອ້າງອີງຂອງການຈັດຕັ້ງປະຕິບັດໃນຄັ້ງຕໍ່ໄປ ພ້ອມກັນນັ້ນໃຫ້ທຸກພາກສ່ວນຈົ່ງນໍາເອົາຜົນໄດ້ຮັບ ແລະ ມະຕິກອງປະຊຸມໄປຈັດຕັ້ງສ້າງເປັນແຜນປະຕິບັດໂຄງການ,ສ້າງເປັນແຜນງານບູລິມະສິດຕາມຄວາມຕ້ອງການຕົວຈິງຂອງແຕ່ລະພາກສ່ວນໃຫ້ບັນລຸເປົ້າໝາຍຕາມໂຄງການທີ່ໄດ້ກຳນົດໄວ້ ແລະ ເປັນຮູບປະທຳດີຂື້ນເທືື່ອລະກ້າວ.

ໂດຍ: ແຈັກກີ້ ສກຂ ຫຼວງພະບາງ