ນະຄອນຫລວງວຽງຈັນ: ໃນກອງປະຊຸມເຊື່ອມຊືມມະຕິຂອງກົມການເມືອງສູນກາງພັກ ແລະ ຜົນສຳເລັດກອງປະຊຸມໃຫຍ່ ຄັ້ງທີ V ຂອງອົງຄະນະພັກ ກອງບັນຊາການ ປກສ ນະຄອນຫຼວງວຽງຈັນ ທີ່ຈັດຂຶ້ນໃນວັນທີ 05 ພະຈິກ 2020, ທີ່ສະໂມສອນ ປກສ ນວ ສະຫາຍ ພັອ ສຸກພະຈັນ ບຸດດາຄໍາ ຄະນະປະຈໍາພັກ ນວ, ເລຂາຄະນະພັກ ຫົວໜ້າກອງບັນຊາການ ປກສ ນວ ໄດ້ມອບໃບຢັ້ງຢືນໜ່ວຍພັກປອດໃສ, ເຂັ້ມແຂງ ແລະ ໜັກແໜ້ນ ປະຈໍາປີ 2019 ໃຫ້ບັນດາ 39 ໜ່ວຍພັກ ທີ່ຂຶ້ນກັບກອງບັນຊາການ ປກສ ນວ, ມີ ສະຫາຍ ພັອ ຈັນຫອມ ແກ້ວສຸລະໄຊ ຄະນະປະຈໍາພັກ ປກສ ນວ ປະທານກວດກາພັກ ຮອງຫົວໜ້າກອງບັນຊາການ ປກສ ນວ, ມີຄະນະພັກ-ຄະນະບັນຊາ, ກອງພັນ, ຄ້າຍຄຸມຂັງ-ດັດສ້າງ ແລະ ປກສ 9 ເມືອງເຂົ້າຮ່ວມ.
ໃນພິທີ ພັທ ນ. ບົວລະພັນ ທິລະສັກ ກໍາມະການພັກ ເລຂາຄະນະພັກຮາກຖານ ຫົວໜ້າຫ້ອງການເມືອງ ປກສ ນວ ໄດ້ຂຶ້ນຜ່ານມະຕິຕົກລົງ ຂອງຄະນະປະຈໍາພັກ ນວ ສະບັບເລກທີ 664/ຄພ.ນວ, ລົງວັນທີ 11 ສິງຫາ 2020 ວ່າດ້ວຍການຮັບຮອງໜ່ວຍພັກປອດໃສ, ເຂັ້ມແຂງ, ໜັກແໜ້ນ ປະຈໍາປີ 2019 ໂດຍໄດ້ຕົກລົງເຫັນດີຮັບຮອງເອົາ 39 ໜ່ວຍພັກ ທີ່ຂຶ້ນກັບກອງບັນຊາການ ປກສ ນວ ເປັນໜ່ວຍພັກປອດໃສ, ເຂັ້ມແຂງ, ໜັກແໜ້ນ;
ໃນນີ້, ມີໜ່ວຍພັກທີ່ຂຶ້ນກັບຮາກຖານພັກຫ້ອງການກອງບັນຊາການ 4 ໜ່ວຍພັກ, ຮາກຖານພັກຫ້ອງການເມືອງ ມີ 6 ໜ່ວຍພັກ, ຮາກຖານພັກກອງພັນປ້ອງກັນເຄື່ອນທີ່ ມີ 3 ໜ່ວຍພັກ, ຮາກຖານພັກຫ້ອງສັນຕິບານ ມີ 8 ໜ່ວຍພັກ, ຮາກຖານພັກຫ້ອງຕໍາຫຼວດ ມີ 5 ໜ່ວຍພັກ, ຮາກຖານພັກຫ້ອງພະລາທິການ ມີ 4 ໜ່ວຍພັກ, ຮາກຖານພັກຫ້ອງຄຸ້ມຄອງສໍາມະໂນຄົວ ມີ 5 ໜ່ວຍພັກ ແລະ ຮາກຖານພັກຄ້າຍຄຸມຂັງດັດສ້າງ ມີ 4 ໜ່ວຍພັກ.
ໃນຕອນທ້າຍ ສະຫາຍ ພັອ ສຸກພະຈັນ ບຸດດາຄໍາ ໄດ້ໂອ້ລົມໂດຍກ່າວເນັ້ນໃຫ້ 39 ໜ່ວຍພັກ ທີ່ໄດ້ຮັບໃບຢັ້ງຢືນໜ່ວຍພັກປອດໃສ, ເຂັ້ມແຂງ, ໜັກແໜ້ນ ໃນຄັ້ງນີ້, ຈົ່ງພ້ອມກັນສືບຕໍ່ຮັກສາມູນເຊື້ອໜ່ວຍພັກເຂັ້ມແຂງ, ໜັກແໜ້ນ, ພ້ອມທັງ ເອົາໃຈໃສ່ພັດທະນາສະມາຊິກພັກພາຍໃນໜ່ວຍພັກຂອງຕົນ ໃຫ້ມີຄວາມຮູ້-ຄວາມສາມາດ ເພື່ອພັດທະນາວຽກງານໃນຂົງເຂດທີ່ຕົນຮັບຜິດຊອບ ໃຫ້ບັນລຸຕາມລະດັບຄາດໝາຍ ແລະ ເພື່ອຕອບສະໜອງຄວາມຮຽກຮ້ອງຕ້ອງການຂອງໜ້າທີ່ການເມືອງ ໃນໄລຍະໃໝ່ຂອງພັກ.
