ໃນວັນທີ 13 ພະຈິກ 2020 ທີ່ໜອງສະລວມ ບ້ານອຸດົມມີໄຊ ເມືອງອຸທຸມພອນ ໄດ້ຈັດງານແຂ່ງຂັນຊ່ວງເຮືອປະຈຳປີຂື້ນຢ່າງຄຶກຄື້ນມ່ວນຊື່ນ,ໂດຍການເຂົ້າຮ່ວມຂອງທ່ານ ປະສົງສິນ ຈະເລີນສຸກ ເຈົ້າເມືອງອຸທຸມພອນ.ພ້ອມດ້ວຍບັນດາທ່ານໃນຄະນະພັກ,ຄະນະປົກຄອງເມືອງອຳນາດການປົກຄອງບ້ານ,ຕະຫຼອດຮອດມວນຊົນພາຍໃນເມືອງ ແລະ ເມືອງອ້ອມຂ້າງເຂົ້າຮ່ວມຊົມຢ່າງຫຼວງຫຼາຍ.

ທ່ານ ດຣ ບຸນໂຮງ ແສງອາລຸນ ຫົວໜ້າຫ້ອງການສາທາລະນະສຸກເມືອງ,ທັງເປັນຜູ້ຊີ້ນຳກຸ່ມໄຊສົມບູນ ໄດ້ລາຍງານໃນການຫ້າງຫາກະກຽມຈັດງານວ່າ: ການແຂ່ງຂັນຊ່ວງເຮືອໃນປີນີ້ ກໍ່ຄືທຸກໆປີທີ່ຜ່ານມາ ໄດ້ສືບສານວັດທະນະທຳປະເພນີອັນດີງາມຂອງຊາດ ກໍ່ຄືຂອງທ້ອງຖິ່ນ ອະນຸລັກ ປົກປັກຮັກສາ ໄວ້ໃຫ້ລູກ ໃຫ້ຫຼານສືບຕໍ່ໆກັນໄປ,ອີກຢ່າງກໍ່ເພື່ອສ້າງຄວາມສາມັກຄີລະຫວ່າງປະຊາຊົນບັນດາເຜົ່າໃຫ້ມີຄວາມແໜ້ນແຟ້ນ

ເຊິ່ງມີທີມນັກກິລາສີພາຍເຮືອຊ່ວງ ທີ່ສົ່ງເຂົ້າຮ່ວມແຂ່ງຂັນທັງໝົດ 17 ທີມ,ທີ່ມາຈາກເມືອງພະລານໄຊ, ຈຳພອນ ແລະ ເມືອງອຸທຸມພອນເຈົ້າພາບ,ການແຂ່ງຂັນແມ່ນເລີ່ມແຕ່ວັນທີ 13 – 14 ພະຈິກ 2020 ຈິ່ງສຳເລັດ,ໂດຍມີລາງວັນຕັ້ງໄວ້,ຖ້າທີມໃດໄດ້ທີໜຶ່ງແມ່ນໄດ້ຮັບເງິນ 1 ລ້ານກີບ,ທີສອງໄດ້ 7 ແສນກີບ ແລະ ທີສາມໄດ້ 5 ແສນ,ນອກຈາກນີ້ກໍ່ຍັງມີການຈັດແຂ່ງຂັນຂີ່ກະຊາມ ແລະ ຊົກມວຍຊົກມວຍເທິງໄມ້ລຳດຽວຕື່ມອີກ.

ນັກຂ່າວເມືອງອຸທຸມພອນ| ບຸນຊູ ພົພົມມະເທບ