ກອງປະຊຸມສະໄໝສາມັນເທື່ອທີ 9 ຂອງສະພາປະຊາຊົນແຂວງຫຼວງພະບາງ ຊຸດທີ I ໄດ້ສຳເລັດ ໃນວັນທີ່ 31 ກໍລະກົດ 2020 ພາຍຫຼັງດຳເນີນມາເປັນເວາລາ 1 ວັນເຄີ່ງ ຢູ່ຫ້ອງປະຊຸມໃຫຍ່ ຫ້ອງວ່າການປົກຄອງແຂວງ ໂດຍເປັນປະທານຂອງ ທ່ານ ສາຍສະໝອນ ຄົມທະວົງ ຮອງເລຂາພັກແຂວງ ປະທານສະພາປະຊາຊົາແຂວງ ພ້ອມດ້ວຍຄະນະ, ມີ ທ່ານ ຄຳຂັນ ຈັນທະວີສຸກ ກຳມະການສູນກາງພັກ ເລຂາພັກແຂວງ ເຈົ້າແຂວງຫຼວງພະບາງ, ພ້ອມດ້ວຍສະມາຊິກສະພາແຫ່ງຊາດ ປະຈຳເຂດເລືອກຕັ້ງ, ສະມາຊິກສະພາປະຊາຊົນແຂວງ, ການນຳຂອງພະແນກການກົມກອງຂອງແຂວງ ແລະແຂກຮັບເຊີນເຂົ້າຮ່ວມ.
ກອງປະຊຸມຄັ້ງນີ້ ຈະໄດ້ຮັບຟັງ ການລາຍງານກ່ຽວກັບ ການຈັດຕັ້ງປະຕິບັດວຽກງານຮອບດ້ານ ຂອງອົງການປົກຄອງແຂວງ ປະຈຳ 6 ເດືອນຕົ້ນປີ ແລະທິດທາງແຜນການ 6 ເດືອນທ້າຍປີ 2020 ການສະເໜີດັດປັບເນື້ອໃນ ແຜນພັດທະນາເສດຖະກິດ-ສັງຄົມ ແລະການດັດແກ້ຕົວເລກລາຍຮັບ-ລາຍຈ່າຍລວມ ລວມຂອງແຂວງ, ການຈັດຕັ້ງປະຕິບັດ ແຜນພັດທະນາເສດຖະກິດ-ສັງຄົມ, ແຜນງົບປະມານ ປະຈຳ 6 ເດືອນຕົ້ນປີ ແລະທິດທາງແຜນການ 6 ເດືອນທ້າຍປີ 2020, ຮັບຟັງການຊີ້ແຈງກ່ຽວກັບ ການປະຕິບັດແຜນການຜະລິດສະບຽງອາຫານ ເພື່ອບໍລິໂພກ ແລະເປັນສີນຄ້າສົ່ງອອກ ຕິດພັນກັບ ການພັດທະນາຊົນນະບົດ ແລະແກ້ໄຂຄວາມທຸກຍາກ, ການຊອກວຽກເຮັດງານທຳ ໃຫ້ປະຊາຊົນຢູ່ພາຍໃນ ແລະກັບຈາກຕ່າງປະເທດ ຍ້ອນການລະບາດຂອງພະຍາດໂຄວິດ 19, ແຜນການແກ້ໄຂໄພພິບັດທາງທຳມະຊາດ, ການປ່ອຍເງີນກູ້ ໃຫ້ແກ່ຫົວໜ່ວຍທຸລະກິດຂະໜາດນ້ອຍ ແລະຂະໜາດກາງ (SME) ແລະຮັບຟັງການລາຍງານ ການເຄື່ອນໄຫວວຽກງານ 6 ເດືອນຕົ້ນປີ ແລະວາງທິດທາງແຜນການ 6 ເດືອນທ້າຍປີ 2020 ຂອງຄະນະປະຈຳສະພາປະຊາຊົນແຂວງ.
ໂອກາດ ກ່າວປິດກອງປະຊຸມ ທ່ານ ສາຍສະໝອນ ຄົມທະວົງ ໄດ້ມີຄຳເຫັນວ່າ: ຜົນສຳເລັດຂອງກອງປະຊຸມຄັ້ງນີ້ ຍ້ອນສະມາຊິກສະພາປະຊາຊົນແຂວງ ໄດ້ຍົກສູງຄວາມຮັບຜິດຊອບທາງດ້ານການເມືອງຂອງຕົນ ແລະການປະສານສົມທົບແຕ່ຫົວທີ ຂອງພາກສ່ວນທີ່ກ່ຽວຂ້ອງ ກັບບອົງການປົກຄອງແຂວງ ພ້ອມນີ້ ທ່ານໄດ້ສະແດງຄວາມຂອບໃຈທຸກພາກສ່ວນ ທີ່ໄດ້ປະກອບສ່ວນ ແລະມີສ່ວນຮ່ວມ ເຮັດໃຫ້ ກອງປະຊຸມສະໄໝສາມັນເທື່ອທີ 9 ຂອງສະພາປະຊາຊົນແຂວງຫຼວງພະບາງ ຊຸດທີ I ໄດ້ສຳເລັດ ຕາມລະດັບຄາດໝາຍທີ່ວາງໄວ້ທຸກປະການ.
ໃນລະຫວ່າງການດຳເນີນກອງປະຊຸມຄັ້ງນີ້ ຄະນະເລຂາທິການສະພາປະຊາຊົນແຂວງ ໄດ້ຮັບໂທລະສັບສາຍດ່ວນ ຈາກປະຊາຊົນຜູ້ມີສິດເລືອກຕັ້ງ ທີ່ສະເໜີຂໍ້ຂ້ອງໃຈທາ ຈຳນວນ 5 ສາຍ ມີທັງໝົດ 8ເລື່ອງ ເຊີ່ງຄະນະປະຈຳສະພພາປະຊາຊົນແຂວງ ຈະນຳໄປຄົ້ນຄວ້າ ຮ່ວມກັບພາກສ່ວນກ່ຽວຂ້ອງ ເພື່ອຫາວິທີແກ້ໄຂໃຫ້ເໝາະສົມ ແລະທັນເວລາ.
ຂ່າວ,ພາບ: ອາພຸດເດດ ບຸບຜາ
