ວັນທີ 12 ກໍລະກົດ 2021 ນີ້,ແຂວງຄຳມ່ວນ ຈັດພິທີປ່ອຍປາ ຈຳນວນ 65 ພັນກວ່າໂຕ(ປາປາກ ແລະ ປາມະນີການ)ເນື່ອງໃນວັນປ່ອຍປາ ແລະ ອະນຸລັກສັດນໍ້າ-ສັດປ່າແຫ່ງຊາດ ຢູ່ທີ່ອ່າງເກັບນໍ້າເຂື່ອນໄຟຟ້ານໍ້າຫີນບູນ ຂອງບໍລິສັດ ຣາຊີຕາ ບ້ານຄໍາແກ້ວ ເມືອງຫີນບູນ ໂດຍມີ ທ່ານ ວັນໄຊ ພອງສະຫວັນ ເຈົ້າແຂວງຄຳມ່ວນ, ມີຫົວໜ້າພະແນກກະສິກໍາ ແລະ ປ່າໄມ້ແຂວງ, ເຈົ້າເມືອງຫີນບູນ, ຜູ້ອຳນວຍການບໍລິສັດຣາຊີຕາ, ພ້ອມດ້ວຍຄະນະພະ ແນກການ, ຂະແໜງການຂັ້ນແຂວງ, ຂັ້ນເມືອງ, ພໍ່ແມ່ປະຊາຊົນ ແລະ ພາກສ່ວນກ່ຽວ ຂ້ອງ ເຂົ້າຮ່ວມ.
ທ່ານ ບຸນຈັນ ໄຊປັນຍາ ຫົວໜ້າພະແນກກະສິກຳ ແລະ ປ່າໄມ້ແຂວງຄຳມ່ວນ ໄດ້ ໃຫ້ຮູ້ວ່າ: ວຽກງານປ່ອຍປາ ແລະ ການພັດທະນາ, ອະນຸລັກສັດນໍ້າ-ສັດປ່າ ແມ່ນວຽກໜຶ່ງທີ່ສຳຄັນ ນັບຕັ້ງແຕ່ວັນສະຖາປະນາ ສປປ ລາວ ປີ 1975 ເປັນຕົ້ນມາ ພັກ-ລັດຖະບານກໍ່ໄດ້ເອົາໃຈໃສ່ຕໍ່ວຽກງານກະສິກຳ ແລະ ປ່າໄມ້ ເປັນເປົ້າໝາຍຕົ້ນຕໍ ໂດຍສະເພາະ ວຽກງານການຜະລິດ, ການປູກ, ການລ້ຽງ, ການປົກປັກຮັກສາ, ການຄຸ້ມຄອງສັດນໍ້າ-ສັດປ່າໃຫ້ມີຄວາມຍືນຍົງໂດຍຕະຫລອດມາ. ໃນກົດໝາຍວ່າດ້ວຍການປະມົງ ໃນມາດຕາທີ 69 ໄດ້ກຳນົດເອົາວັນທີ 13 ກໍລະກົດ ຂອງທຸກໆປີ ເປັນວັນປ່ອຍປາແຫ່ງຊາດ ເພື່ອປູກຈິດສຳນຶກໃຫ້ປະຊາຊົນ ເຂົ້າໃຈ ແລະ ໃຫ້ຄວາມສຳຄັນໃນການປົກປັກຮັກສາສັດນໍ້າ-ສັດປ່າໃຫ້ມີຄວາມອຸດົມສົມບູນ.
ສຳລັບແຂວງຄຳມ່ວນ, ພະແນກກະສິກຳ ແລະ ປ່າໄມ້ແຂວງ ໄດ້ສົມທົບກັບການຈັດ ຕັ້ງກ່ຽວຂ້ອງທັງພາຍໃນ ແລະ ຕ່າງປະເທດ ຄົ້ນຄວ້າໃນຫລາຍຮູບແບບ ເພື່ອປົກປັກຮັກສາ ເປັນຕົ້ນ ແມ່ນສ້າງບ່ອນອະນຸລັກ, ສ້າງວັງສະຫງວນ, ມາຮອດປັດຈຸບັນແຂວງຄຳມ່ວນແມ່ນມີວັງສະຫງວນຫລາຍກວ່າ 69 ແຫ່ງຢູ່ໃນຂັ້ນບ້ານ ແລະ ຢູ່ໃນການຄຸ້ມຄອງ, ປົກປັກຮັກສາໃນຂັ້ນເມືອງ 12 ແຫ່ງ ເພື່ອເປັນບ່ອນແຜ່ພັນຂອງສັດນໍ້າຕ່າງໆ. ນອກນີ້ຍັງໄດ້ປຸກລະດົມ ແລະ ສ້າງຂະບວນການປ່ອຍປາລົງສູ່ແມ່ນໍ້າທຳມະຊາດ, ຫ້ວຍ, ຮ່ອງ, ຄອງ, ບຶງ ເຊິ່ງໃນຊຸມປີຜ່ານມາແມ່ນສາມາດປ່ອຍປາໄດ້ທັງໝົດ 4 ລ້ານກວ່າໂຕ ແລະ ໃນປີ 2021 ນີ້ ຄາດຄະເນຈະປ່ອຍໄດ້ 2 ລ້ານກວ່າໂຕ ໂດຍເລີ່ມແຕ່ວັນທີ 1 ກໍລະກົດເປັນຕົ້ນ ມາພໍ່ແມ່ປະຊາຊົນໄດ້ປ່ອຍປາລົງໃນໜອງລ້ຽງຂອງຕົນແລ້ວ ຈຳນວນ 170.000 ໂຕ. ໃນນັ້ນ ມີ ປາປາກ, ປາມະນີການ, ປາຍີ້ສົບ ແລະ ປາດຸກ.
ຂ່າວ: ກອງຄໍາ