ມາຮອດວັນທີ 22 ກັນຍາ 2021 ນີ້, ສປປ ລາວ ມີຜູ້ຕິດເຊື້ອໂຄວິດ-19 ເພີ່ມຂຶ້ນໃໝ່ 222 ຄົນ, ໃນນັ້ນ, ຢູ່ນະຄອນຫລວງວຽງຈັນ ມີຜູ້ຕິດເຊື້ອ 75 ຄົນ (ໃນຊຸມຊົນ), ຊຽງຂວາງ 8 ຄົນ (ຊຸມຊົນ), ບໍ່ແກ້ວ 2 (ໃນຊຸມຊົນ ຢູ່ຕົ້ນເຜີ້ງ), ຫລວງນໍ້າທາ 3 ຄົນ(ຊຸມຊົນ), ຫລວງພະບາງ16 ຄົນ (ນໍາເຂົ້າ 2 ຄົນ, ຊຸມຊົນ 14 ຄົນ), ວຽງຈັນ 44 ຄົນ (ໃນຊຸມຊົນ), ບໍລິຄໍາໄຊ 1 ຄົນ(ຊຸມຊົນ), ຄໍາມ່ວນ 37 ຄົນ (ນໍາເຂົ້າ 2 ຄົນ, ຊຸມຊົນ 35 ຄົນ), ສາລະວັນ 1 ຄົນ (ນໍາເຂົ້າ), ສະຫວັນນະເຂດ 9 ຄົນ (ນໍາເຂົ້າ 5 ຄົນ, ຊຸມຊົນ 4 ຄົນ ), ຈໍາປາສັກ 25 ຄົນ (ນໍາເຂົ້າ 2 ຄົນ, ຊຸມຊົນ 23 ຄົນ) ແລະ ແຂວງອັດຕະປື 1 ຄົນ (ໃນຊຸມຊົນ), ລວມຕົວເລກຜູ້ຕິດເຊື້ອສະສົມ ທັງໝົດ 19.952 ຄົນ, ເສຍຊີວິດສະສົມ 16 ຄົນ ແລະ ກຳລັງປິ່ນປົວທັງໝົດ 4.768 ຄົນ.

ທ່ານ ສີສະຫວາດ ສຸດທານີລະໄຊ ຮອງຫົວໜ້າກົມຄວບຄຸມພະຍາດຕິດຕໍ່ ກະຊວງສາທາລະນະສຸກ ລາຍງານໃຫ້ຮູ້ໃນວັນທີ 22 ກັນຍາ 2021 ນີ້ວ່າ: ປັດຈຸບັນ ການແຜ່ລະບາດຂອງພະຍາດໂຄວິດ-19 ຢູ່ ສປປ ລາວ ໄດ້ລະບາດຢູ່ໃນຊຸມຊົນເປັນວົງກວ້າງ ໂດຍສະເພາະຢູ່ ນະຄອນ ຫລວງວຽງຈັນ ມີບ້ານໃໝ່ທີ່ກຳນົດເປັນເຂດແດງ 10 ບ້ານ, ຈາກ 4 ເມືອງ ຄື: ເມືອງນາຊາຍທອງ ມີບ້ານນາລຽນ, ເມືອງຈັນທະບູລີ ມີບ້ານດອນແດງ ແລະ ສີດໍາດວນ, ເມືອງໄຊທານີ ມີບ້ານທ່າງ່ອນ ແລະ ບ້ານໂພນຄໍ້, ເມືອງສີໂຄດຕະບອງ ມີບ້ານ ຈັນສະຫວ່າງ, ບ້ານຍາພະ, ບ້ານດົງນາໂຊກເໜືອ, ບ້ານໂນນຂີ້ເຫລັກ ແລະ ບ້ານໂພນສະຫວາດ.

ສຳລັບຜູ້ທີ່ມີຈຸດປະສົງຢາກກວດຊອກຫາເຊື້ອໂຄວິດ-19 ສໍາລັບ ນະຄອນຫລວງວຽງຈັນແມ່ນມີຈຸດເກັບຕົວຢ່າງ ຢູ່ເດີ່ນກິລາໃນຮົ່ມບຶງຂະຫຍອງ, ຈຸດເກັບຕົວຢ່າງໂຮງຮຽນ ມສ ລາວ-ຫວຽດ, ຢູ່ເມືອງໄຊເສດຖາ, ຈຸດເກັບຕົວຢ່າງ ມສ ເຈົ້າອະນຸວົງ, ຈຸດເກັບຕົວຢ່າງ ມສ ສີໂຄດ, ຈຸດເກັບຕົວຢ່າງ ມສ ຕານມີໄຊ ແລະ ໂຮງໝໍເມືອງນາຊາຍທອງ ເຊິ່ງທັງ 6 ບ່ອນເປີດໃຫ້ບໍລິການບັນດາທ່ານທຸກວັນ (ວັນຈັນ ຫາ ວັນອາທິດ) ແລະ ຍັງມີທີມງານເກັບຕົວຢ່າງເຄື່ອນທີ່ ໄປເກັບໃນສະຖານທີ່ທີ່ມີການລາຍງານຄົນຕິດເຊື້ອ. ສ່ວນສະຖານທີ່ຈໍາກັດບໍລິເວນ ກະກຽມຮອງຮັບຜູ້ສຳຜັດໃກ້ຊິດກັບກໍລະນີຕິດເຊື້ອປະກອບມີ ສູນຫລັກ 27, ມສ ສີໂຄດຕະບອງ, ມສ ນາຄວາຍ, ມັດທະຍົມຕອນປາຍ ຈັນທະບູລີ, ມສ ດອນໜູນ, ມສ ດອນສະຫວ່າງ, ມສ ປາກຕອນ, ໂຮງຮຽນນາຍສິບ. ສຳລັບແຂວງ ແມ່ນທ່ານສາມາດໄປກວດຊອກຫາເຊື້ອໄດ້ຢູ່ໂຮງໝໍແຂວງ ຫລື ສະຖານທີ່ທີ່ກຳນົດໄວ້ ຫລື ທີມງານໜ່ວຍເຄື່ອນທີ່ລົງເກັບຕົວຢ່າງ ຢູ່ເຂດທີ່ມີການລະບາດໃນຊຸມຊົນ.

ທ່ານ ສີສະຫວາດ ສຸດທານີລະໄຊ ໃຫ້ຮູ້ອີກວ່າ: ປັດຈຸບັນ ພະຍາດໂຄວິດ-19 ໄດ້ມີການພັດທະນາ ແລະ ປັບປ່ຽນພັນທຸກຳເຮັດໃຫ້ສາມາດຕິດຕໍ່ໄດ້ໄວ ແລະ ງ່າຍ ຈາກຄົນໜຶ່ງໄປສູ່ກຸ່ມຄົນ ແຕ່ວ່າ ວິທີປ້ອງກັນທີ່ດີທີ່ສຸດ ແມ່ນຍັງຕ້ອງການໃຫ້ທ່ານປະຕິບັດຄືເກົ່າ ເຊັ່ນ: ບໍ່ໂຮມຊຸມນຸມກັນ, ບໍ່ຊຸມແຊວກັນເປັນກຸ່ມ, ຫລີກເວັ້ນການເດີນທາງໄປສະຖານທີ່ສ່ຽງ, ສະຖານທີ່ແອອັດ, ການຮັກສາໄລຍະຫ່າງ, ໃສ່ຜ້າອັດປາກ-ດັງ, ລ້າງມືເລື້ອຍໆດ້ວຍນ້ຳສະອາດໃສ່ສະບູ ຫລື ເຈວລ້າງມືທີ່ມີທາດເຫລົ້າ 70% ຂຶ້ນໄປ, ຮັກສາມາລະຍາດໃນການໄອ, ຈາມ, ອະນາໄມຂ້າເຊື້ອຈຸດທີ່ມີຄວາມສ່ຽງຕ່າງໆ ແລະ ອີກຢ່າງໜຶ່ງທີ່ສຳຄັນ ກໍຄື ການໄປຮັບວັກຊິນ ເພື່ອສ້າງພູມຄຸ້ມກັນ ເຊິ່ງສາມາດປ້ອງການຄວາມຮຸນແຮງຂອງພະຍາດ ແລະ ການເສຍຊີວິດໄດ້ ຖ້າຫາກມີການຕິດເຊື້ອ. ໃນຂະນະດຽວກັນ ການບໍ່ອອກຈາກບ້ານກໍ່ສາມາດປ້ອງກັນຕົນເອງ, ປ້ອງກັນຄອບຄົວ ແລະ ປົກປ້ອງສັງຄົມ.

ອີກຢ່າງໜຶ່ງ ຖ້າທ່ານຮູ້ສຶກວ່າ ເປັນຜູ້ສຳຜັດໃກ້ຊິດ ຫລື ນອນຢູ່ໃນກຸ່ມສ່ຽງ ຕ້ອງຈໍາກັດບໍລິເວນຕົນເອງທັນທີ ແລະ ຮີບຮ້ອນໄປກວດຊອກຫາເຊື້ອ, ເຖິງວ່າ ຜົນກວດຂອງທ່ານຈະເປັນລົບກໍຕາມ ຍັງຈຳເປັນຕ້ອງໄດ້ສືບຕໍ່ຈໍາກັດບໍລິເວນຕົນເອງ ຈົນຄົບກຳນົດ 14 ວັນ ຫລື ຖ້າຫາກ ມີອາການຜິດປົກກະຕິ ເຊັ່ນ: ໄຂ້, ໄອ, ເຈັບຄໍ, ເຈັບໜ້າເອິກ, ນ້ຳມູກໄຫລ, ດັງບໍ່ໄດ້ກິ່ນ ຫລື ກິນອາຫານບໍ່ໄດ້ລົດຊາດ ໃຫ້ກັບມາກວດຄືນ ຫລື ໂທປຶກສາສາຍດ່ວນ 165–166 ເພື່ອຂໍຄຳແນະນຳ.