ໃນວັນທີ 3 ມິຖຸນາ 2021 ທີ່ຫໍວັດທະນະທໍາແຫ່ງຊາດ, ທ່ານ ສະຫວັນຄອນ ລາຊະມຸນຕີ ຮອງລັດຖະມົນຕີ ກະຊວງ ຖະແຫລງຂ່າວ, ວັດທະນະທຳ ແລະ ທ່ອງທ່ຽວ ຕາງໜ້າມອບໃບຍ້ອງຍໍໃຫ້ກັບທີມແພດໂຮງໝໍເດັກ ທີ່ໄດ້ໃຫ້ການຊ່ວຍເຫລືອ ສັກວັກແຊງປ້ອງກັນໂຄວິດ-19 ໃຫ້ພະນັກງານ-ລັດ ຖະກອນ ຂອງກະຊວງດັ່ງກ່າວ, ພາຍຫລັງສັກວັກແຊງຄົບຈໍານວນ 2 ເຂັມ, ຕາງໜ້າຮັບໃບຍ້ອງຄັ້ງນີ້, ໂດຍ ທ່ານ ດຣ ໄຊຍະວົງ ບົວທອງທິບ ຮອງຜູ້ອຳນວຍການໂຮງໝໍເດັກ.
ໂອກາດດຽວກັນນີ້, ກະຊວງ ຖວທ ຍັງໄດ້ປະກອບສ່ວນ ດ້ານອຸປະກອນການແພດຈຳນວນໜຶ່ງໃຫ້ແກ່ໂຮງໝໍເດັກ ເພື່ອຮັບໃຊ້ເຂົ້າໃນວຽກງານປ້ອງກັນ ແລະ ຄວບຄຸມ ການແຜ່ລະບາດຂອງພະຍາດ ໂຄວິດ-19 ນໍາອີກ.
ທ່ານ ດຣ. ໄຊຍະວົງ ບົວທອງທິບ ກ່າວວ່າ: ການສັກວັກແຊງປ້ອງກັນໂຄວິດ-19 ທີ່ຢູ່ໃນຄວາມຮັບຜິດຊອບຂອງໂຮງໝໍເດັກພວກເຮົາ ທັງໝົດມີ 7 ກະຊວງ ແລະ 1 ບໍລິສັດ, ເຊິ່ງວັກແຊງທີ່ສັກປະກອບມີ ຊີໂນຟາມ (Sinopharm) ແລະ ແອສຕຣາເຊນີກາ (Astra zenica) ໃນປັດຈຸບັນແມ່ນໄດ້ປະມານ 4.000 ກວ່າຄົນແລ້ວ. ສໍາລັບການສັກວັກແຊງ ໃຫ້ພະນັກງານ-ລັດຖະກອນ ຂອງກະຊວງ ຖວ ທ 1.000 ກວ່າຄົນ ຄົບຈໍານວນ 2 ເຂັມແລ້ວ.
ທ່ານ ດຣ ໄຊຍະວົງ ກ່າວຕື່ມວ່າ: ຄວາມສຳຄັນຂອງການສັກເຂັມທີສອງນີ້ ມັນຈະຊ່ວຍກະຕຸ້ນໃຫ້ການສ້າງພູມຄຸ້ມກັນໃນຮ່າງກາຍສູງຂຶ້ນຕື່ມ ແລະ ທີ່ສຳຄັນແມ່ນບໍ່ມີຄວາມອັນຕະລາຍ ແລະ ບໍ່ມີຄວາມຮຸນແຮງໃດໆຕໍ່ຮ່າງກາຍຂອງເຮົາ, ແຕ່ເຖິງຢ່າງໃດກໍຕາມ ສຳລັບຜູ້ທີ່ສັກວັກແຊງປ້ອງກັນໂຄວິດ-19 ຄົບຕາມຈໍານວນແລ້ວກໍຕາມ, ແຕ່ຍັງຕ້ອງໄດ້ປະຕິບັດ ຕາມມາດຕະການປ້ອງກັນຢ່າງເຄັ່ງຄັດ ເຊັ່ນ ການຮັກສາໄລຍະຫ່າງ, ໝັ່ນລ້າງມືໃສ່ສະບູ ຫລື ເຈວລ້າງມືຢູ່ຕະຫລອດເວລາ.
ນອກຈາກນີ້, ໂຮງໝໍເດັກ ຍັງສືບຕໍ່ໃຫ້ບໍລິການສັກວັກແຊງກັນພະຍາດໂຄວິດ-19 ເຂັມທີ 2 ຈົນຮອດ 20 ມິຖຸນາ 2021 ພາຍຫລັງທີ່ມີການໃຫ້ບໍລິການສັກວັກແຊງກັນພະຍາດໂຄວິດ-19 ເຂັມທີ 1 ໃຫ້ພະນັກງານ-ລັດຖະກອນ ແລະ ພໍ່ແມ່ປະຊາຊົນແລ້ວ.
ຂ່າວ: ມະນີທອນ, ພາບ: ຂັນໄຊ
