ໃນວັນທີ 19 ມີນາ 2021 ພາຍໃຕ້ການເປັນປະທານຂອງສະຫາຍ ກິແກ້ວ ໄຂຄຳພິທູນ, ກຳມະການກົມການເມືອງສູນກາງພັກ, ເລຂາຄະນະບໍລິຫານງານພັກກະຊວງ, ລັດຖະມົນຕີກະຊວງຖະແຫລງຂ່າວ, ວັດທະນາທຳ ແລະທ່ອງທ່ຽວ ມີຄະນະບໍລິຫານງານພັກກະຊວງສະໄໝທີ V ເຂົ້າຮ່ວມທັງໝົດ 23 ສະຫາຍ.

ສະຫາຍ ກິແກ້ວ ໄຂຄຳພິທູນ ມີຄຳເຫັນວ່າ: ຈຸດປະສົງກອງປະຊຸມຄັ້ງນີ້ເພື່ອຜັນຂະຫຍາຍມະຕິກອງປະຊຸມໃຫ່ຍຄັ້ງທີ IX ຂອງພັກ ແລະມະຕິກອງປະຊຸມໃຫ່ຍຄັ້ງທີ V ຂອງອົງຄະນະພັກກະຊວງຖະແຫລງຂ່າວ, ວັດທະນາທຳ ແລະທ່ອງທ່ຽວໃຫ້ເປັນຮູບປະທຳ ແລະໄດ້ຮັບການຈັດຕັ້ງປະຕິບັດຢ່າງເປັນເອກະພາບ, ຮັບຮອງເອົາແຜນດຳເນີນງານຂອງຄະນະບໍລິຫານງານພັກກະຊວງສະໄໝທີ V, ມະຕິວ່າດ້ວຍແບບແຜນວິທີເຮັດວຽກຂອງຄະນະປະຈໍາພັກກະຊວງ, ກຳມະການຄະນະບໍລິຫານງານພັກກະຊວງຖະແຫລງຂ່າວ, ວັດທະນາທຳ ແລະທ່ອງທ່ຽວ ແນໃສ່ສ້າງຄວາມເປັນເອກະພາບໃນການແບ່ງງານ, ແບ່ງຄວາມຮັບຜິດຊອບພາຍໃນຄະນະບໍລິຫານງານພັກກະຊວງຖະແຫລງຂ່າວ, ວັດທະນາທຳ ແລະທ່ອງທ່ຽວສະໄໝທີ V.


ກອງປະຊຸມສາມັນຄົບຄະນະຄັ້ງທີ II ສະໄໝທີ V ຂອງຄະນະພັກກະຊວງຖະແຫລງຂ່າວ, ວັດທະ ນາທຳ ແລະທ່ອງທ່ຽວຄັ້ງນີ້ບັນດາສະຫາຍຄະນະພັກກະຊວງຍັງໄດ້ປຶກສາຫາລືບາງບັນຫາສຳຄັນຮີບດ່ວນຈຳນວນໜື່ງ ເປັນຕົ້ນຮ່າງແຜນພັດທະນາເສດຖະກິດ-ສັງຄົມ 5 ປີຂອງກະຊວງນັບແຕ່ 2021 – 2025 ທີ່ຈະນໍາສະເໜີຕໍ່ລັດຖະບານ ແລະຜ່ານສະພາແຫ່ງຊາດ, ຮ່າງບົດສະຫລຸບຕີລາຄາຜົນສຳ ເລັດ ແລະແຜນການເຊື່ອມຊຶມຜັນຂະຫຍາຍມະຕິກອງປະຊຸມໃຫ່ຍຄັ້ງທີ IX ຂອງພັກ ກໍ່ຄືມະຕິກອງປະຊຸມໃຫ່ຍຄັ້ງທີ V ຂອງອົງຄະນະພັກກະຊວງຖະແຫລງຂ່າວ, ວັດທະນາທຳ ແລະທ່ອງທ່ຽວໃຫ້ປະກົດຜົນເປັນຈິງ.

ຂ່າວ: ຈັນທະສອນ ສີຫານາດ
ພາບ: ຕາລີເຊ້ຍ ລໍມີໄຊ

ກົດຮູບເພື່ອງອ່ານເພີ່ມເຕີມ