ກົມແຜນການ ແລະ ການຮ່ວມມືສາກົນ ກະຊວງຖະແຫຼງຂ່າວ, ວັດທະນະທຳ ແລະ ທ່ອງ ທ່ຽວ (ຖວທ) ຮ່ວມກັບ ພະແນກ ຖວທ ແຂວງຫຼວງພະບາງ ໄດ້ຈັດກອງປະຊຸມສຳມະນາວຽກງານ ຮ່ວມມືສາກົນໃນຂະແໜງ ຖວທ 8 ແຂວງພາກເໜືອ ຂຶ້ນເມື່ອບໍ່ດົນມານີ້ ທີ່ຫ້ອງປະຊຸມພະແນກ ຖວທ ແຂວງຫຼວງະບາງ ໂດຍການເປັນປະທານຂອງທ່ານ ນາງ ແພງຈັນ ແພງເມືອງ ຫົວໜ້າ ກົມແຜນການ ແລະ ການຮ່ວມມືສາກົນ ກະຊວງ ຖວທ, ມີບັນດາທ່ານຫົວໜ້າພະແນກ, ຮອງພະ ແນກ ຖວທ ຈາກ 8 ແຂວງພາກເໜືອ ພ້ອມດ້ວຍພະນັກງານວິຊາການກ່ຽວຂ້ອງເຂົ້າຮ່ວມ.

ທ່ານ ນາງ ແພງຈັນ ແພງເມືອງ ໄດ້ມີຄຳເຫັນກ່າວເປີດກອງປະຊຸມດັ່ງກ່າວວ່າ: ການຈັດກອງ ປະຊຸມຄັ້ງນີ້, ບັນດາທ່ານຜູ້ແທນເຂົ້າຮ່ວມຈະໄດ້ແລກປ່ຽນ ແລະ ຖອດຖອນບົດຮຽນໃນການຮ່ວມມືກັບ ຕ່າງປະເທດໃນໄລຍະຜ່ານມາ ແລະ ໃນຕໍ່ໜ້າ.

ພ້ອມນີ້ ກໍຈະໄດ້ຮັບເອົາການປະກອບຄໍາຄິດຄໍາເຫັນ ຈາກບັນດາທ່ານ ເພື່ອຮ່ວມກັນຊອກຫາວິທີການທີ່ເໝາະສົມ ຊຸກຍູ້ໃຫ້ການຈັດຕັ້ງປະຕິບັດຂອບການ ຮ່ວມມືສາກົນໃຫ້ເກີດດອກອອກຜົນ ແລະ ຜົນປະໂຫຍດສູງສຸດ ຕໍ່ຂະແໜງການຂອງພວກເຮົາໃຫ້ ນັບມື້ນັບກວ້າງຂວາງ ແລະ ມີປະສິດທິຜົນຍິ່ງຂຶ້ນ ເວົ້າສະເພາະໃນໄລຍະທີ່ພວມປະສົບກັບການ ລະບາດຂອງພະຍາດ COVID-19 ເພື່ອໃຫ້ເຂົ້າໃຈເຖິງການດໍາລົງຊີວິດ ແລະ ປັບຕົວໃຫ້ສອດຄ່ອງ ກັບເງື່ອນໄຂ “ວິຖີການດໍາລົງຊີວິດແບບໃໝ່ ຫຼື New Normal” ດ້ວຍຄວາມເອົາໃຈໃສ່ ແລະ ເຊື່ອໝັ້ນຢ່າງຍິ່ງວ່າ ຜ່ານການປຶກສາຫາລື ແລະ ແລກປ່ຽນຄໍາຄິດຄໍາເຫັນໃນກອງປະຊຸມຄັ້ງນີ້ ບັນດາ ທ່ານຈະນຳເອົາເນື້ອໃນຈິດໃຈຂອງກອງປະຊຸມໃນຄັ້ງນີ້ ນຳໄປສືບຕໍ່ຜັນຂະຫຍາຍ, ເຜີຍແຜ່ໄປຍັງ ເພື່ອນຮ່ວມງານ ແລະ ບຸກຄົນອື່ນໆທີ່ກ່ຽວຂ້ອງຂອງທ່ານ ເພື່ອເຊື່ອມຊຶມຄວາມຮູ້-ຄວາມເຂົ້າໃຈກ່ຽວ ກັບການຈັດຕັ້ງປະຕິບັດກົນໄກການຮ່ວມມືສາກົນໃຫ້ເປັນລະບົບປະຕູດຽວ ຊຶ່ງເປັນນິຕິກຳອັນຈຳເປັນ ໃນການຄຸ້ມຄອງວຽກງານດັ່ງກ່າວ ໃຫ້ມີຄວາມຮັດກຸມ-ເປັນພື້ນຖານໃນການຮ່ວມມືກັບຕ່າງປະເທດ ທີ່ຕ່າງຝ່າຍຕ່າງມີຜົນປະໂຫຍດ ແລະ ສອດຄ່ອງກັບຄຳຂວັນຂອງກອງປະຊຸມອົງຄະນະພັກກະຊວງ ຖວທ ຄັ້ງທີ V ທີ່ໄດ້ລະບຸໄວ້ວ່າ: “ການນຳພາເຂັ້ມແຂງ, ການຄຸ້ມຄອງສັກສິດ, ຂ່າວສານທັນສະໄໝ, ວັດທະນະທຳສິວິໄລ, ທ່ອງທ່ຽວຍືນຍົງ”.

ຂ່າວ: ຈາກກະຊວງ ຖວທ

ກົດຮູບເພື່ອງອ່ານເພີ່ມເຕີມ