ກອງປະຊຸມປະຖົມມະລຶກ ສະພາປະຊາຊົນແຂວງຫຼວງພະບາງ ຊຸດທີ II ໄຂຂຶ້ນຢ່າງເປັນທາງການ ໃນວັນທີ 7 ເມສາ 2021 ນີ້ ຢູ່ຫ້ອງປະຊຸມໃຫຍ່ຂອງແຂວງ ໂດຍການເປັນປະທານຂອງທ່ານ ສາຍສະໝອນ ຄົມທະວົງ ປະທານສະພາປະຊາຊົນແຂວງ ໂດຍໃຫ້ກຽດເຂົ້າຮ່ວມຂອງທ່ານ ຄຳຂັນ ຈັນທະວີສຸກ ກຳມະການສູນກາງພັກ ເລຂາພັກແຂວງ ເຈົ້າແຂວງຫຼວງພະບາງ, ມີສະມາຊິກສະພາແຫ່ງຊາດ ປະຈຳເຂດເລືອກຕັ້ງທີ 6, ຄະນະປະຈຳພັກແຂວງ, ກຳມະການພັກແຂວງ, ສະມາຊິກສະພາປະຊາຊົນແຂວງ, ຄະນະປະຈຳສະພາປະຊາຊົນແຂວງ, ຫົວຫນ້າ-ຮອງພະແນກການ, ອົງການຈັດຕັ້ງມະຫາຊົນຂອງແຂວງເຂົ້າຮ່ວມ.
ທ່ານ ສາຍສະໝອນ ຄົມທະວົງ ປະທານສະພາປະຊາຊົນແຂວງ ກ່າວໄຂກອງປະຊຸມຢ່າງເປັນທາງການວ່າ: ກອງປະຊຸມຄັ້ງນີ້ຈະໄດ້ສຸມໃສ່ຮັບຟັງການລາຍງານ ແລະພິຈາລະນາຮັບຮອງເອົາບາງບັນຫາສຳຄັນຂອງແຂວງຫຼວງພະບາງ ເປັນຕົ້ນແມ່ນ ຮັບຟັງການລາຍງານ ຜົນສຳເລັດການເລືອກຕັ້ງ ແລະຢັ້ງຢືນຄຸນລັກສະນະຂອງສະມາຊິກສະພາປະຊາຊົນແຂວງ, ພິຈາລະນາ ແລະຮັບຮອງເອົາໂຄງປະກອບກົງຈັກ ແລະບຸກຄະລາກອນຂອງສະພາປະຊາຊົນແຂວງຊຸດທີ II ເປັນຕົ້ນແມ່ນ ເລືອກຕັ້ງປະທານສະພາປະຊາຊົນ, ຮອງປະທານສະພາປະຊາຊົນ ແລະກໍາມະການຄະນະປະຈໍາສະພາປະຊາຊົນແຂວງຊຸດທີ II ຕາມການສະເໜີຂອງສະພາປະຊາຊົນຊຸດທີI, ເລືອກປະທານຄະນະກຳມະການ, ຮອງປະທານຄະນະກຳມະການ ແລະເລຂາທິການສະພາປະຊາຊົນແຂວງຊຸດທີII, ຕາມການສະເໜີຂອງສະພາປະຊາຊົນຊຸດທີI, ພ້ອມຍັງຈະໄດ້ພິຈາລານາ ແລະຮັບຮອງເອົາ ການແຕ່ງຕັ້ງຮອງເຈົ້າແຂວງ, ຮັບຟັງການລາຍງານໂດຍຫຍໍ້ຂອງອົງການປົກຄອງແຂວງກ່ຽວກັບການຈັດຕັ້ງປະຕິບັດ ແຜນພັດທະນາເສດຖະກິດ-ສັງຄົມ ແລະແຜນງົບປະມານ 5ປີ(2016-2020), ແຜນ5ປີ (2021-2025)ຂອງແຂວງ, ຮັບຟັງການລາຍງານການຈັດຕັ້ງປະຕິບັດວຽກງານ 5 ປີ(2016-2020) ແລະທິດທາງແຜນການ 5ປີ (2021-2025)ຂອງອົງການໄອຍະການປະຊາຊົນແຂວງ ແລະສານປະຊາຊົນແຂວງ, ຮັບຟັງການລາຍງານການຈັດຕັ້ງປະຕິບັດວຽກງານ 5ປີ(2016-2020) ແລະ ທິດທາງແຜນການ 5ປີ(2021-2025)ຂອງຄະນະປະຈຳສະພາປະຊາຊົນແຂວງຊຸທີ II.
ນອກນັ້ນໃນໄລຍະດຳເນີນກອງປະຊຸມຈະໄດ້ເປີດໂອກາດໃຫ້ປະຊາຊົນລາວບັນດາເຜົ່າໃນທົ່ວແຂວງຫຼວງພະບາງໄດ້ໃຊ້ສິດປະຊາທິປະໄຕ ເພື່ອສະເໜີບັນດາຄຳຄິດຄຳເຫັນ ອັນເປັນປະໂຫຍດຕໍ່ກອງປະຊຸມ ໂດຍຜ່ານໂທລະສັບສາຍດ່ວນ ໝາຍເລກ 071 156 ຕື່ມອີກ.
ກອງປະຊຸມຈະໄດ້ຮັບຟັງການຊັກຖາມຈາກສະມາຊິກສະພາແຫ່ງຊາດ ເຂດເລືອກຕັ້ງທີ 6, ສະມາຊິກສະພາປະຊາຊົນແຂວງ ແລະ ການຊີ້ແຈງຈາກພະແນກການຂອງແຂວງ ຈຳນວນຫນຶ່ງ ເຊິງກອງປະຊຸມຈະດຳເນີນໄປເປັນເວລາ 3 ວັນຈຶ່ງອັດລົງ.
ຂ່າວ: ເພັດສາຄອນ ສິມມະວົງ
