ສຳເລັດກອງປະຊຸມໃຫຍ່ ສະມາຄົມນັກທຸລະກິດໜຸ່ມ ແຂວງຫຼວງພະບາງ ຄັ້ງທີ IV ຢ່າງສະຫງ່າງາມ
ກອງປະຊຸມໃຫຍ່ ສະມາຄົມນັກທຸລະກິດໜຸ່ມ ແຂວງຫຼວງພະບາງ ຄັ້ງທີ IV ໄດ້ໄຂຂຶ້ນ ແລະ ອັດລົງໃນມື້ວັນທີ 16 ຕຸລາ 2020 ຢູ່ທີ່ໂຮງແຮມຫຼວງພະບາງ ວີວ. ໂດຍເປັນປະທານຂອງສະຫາຍ ຄັດຕະພອນ ພົມມະປັນຍາ ຄະນະປະຈຳຊາວໜຸ່ມແຂວງ, ປະທານສະມາຄົມນັກທຸລະກິດໜຸ່ມ ແຂວງຫຼວງພະບາງ, ເປັນກຽດເຂົ້າຮ່ວມມີສະຫາຍ ມອນໄຊ ລາວມົວຊົ່ງ, ຄະນະປະຈຳພັກແຂວງ, ຫົວໜ້າຄະນະຈັດຕັ້ງແຂວງ, ມີສະຫາຍ ປອ. ຄຳແສນ ສີສະວົງ ຮອງປະທານສະ ພາການຄ້າແຫ່ງຊາດ ປະທານສະມາຄົມນັກທຸລະກິດໜຸ່ມແຫ່ງຊາດ, ມີເລຂາຄະນະບໍລິຫານງານຊາວໜຸ່ມແຂວງ, ແຂກ ຖຶກເຊີນ ແລະ ສະມາຊິກສະມາຄົມນັກທຸລະກິດໜຸ່ມແຂວງ ເຂົ້າຮ່ວມ 80 ກວ່າສະຫາຍ.
ກອງປະຊຸມໄດ້ຮັບຟັງບົດລາຍງານການເມືອງທັງສອງພາກ, ເຊິ່ງໄດ້ຍົກໃຫ້ເຫັນພາລະບົດບາດ, ສິດ ແລະ ໜ້າທີ່ຂອງສະມາຄົມນັກທຸລະກິດໜຸ່ມ ແຂວງຫຼວງພະບາງ ໃນການປະກອບສ່ວນເຂົ້າໃນພາລະກິດປົກປັກຮັກສາ ແລະ ສ້າງສາພັດທະນາແຂວງຫຼວງພະບາງ. ສະມາຄົມນັກທຸລະກິດໜຸ່ມ ແຂວງຫຼວງພະບາງ ໄດ້ສ້າງຕັ້ງຂື້ນໃນວັນທີ 18 ມັງກອນ 2008 ພາຍໃຕ້ການຊີ້ນຳນຳພາຂອງຄະນະບໍລິຫານງານຊາວໜຸ່ມແຂວງ. ມາຮອດປະຈຸບັນ ສະມາຄົມນັກທຸລະກິດໜຸ່ມທັງໝົດ 54 ສະຫາຍ, ຍິງ 2 ສະຫາຍ, ໃນນີ້ ມີສະມາຊິກຕ່າງແຂວງ ທີ່ມາຈາກນະຄອນຫຼວງວຽງຈັນ, ອຸດົມໄຊ ແລະ ບໍລິຄຳໄຊ ຈຳນວນ 3 ສະຫາຍ. ສະມາຄົມນັກທຸລະກິດໜຸ່ມ ແມ່ນປະກອບດ້ວຍນັກທຸລະກິດຜູ້ທີ່ໜຸ່ມນ້ອຍ, ມີຫ້າວຫັນຄວາມສະແຫວງຫາສິ່ງໃໝ່ໆ ພ້ອມທັງຍາດແຍ່ງການຮ່ວມມືກັບປະເທດເພື່ອນມິດ, ອາຊ່ຽນ ແລະ ພາກພື້ນສາກົນ ເພື່ອມາສ້າງສາພັດທະນາແຂວງຫຼວງພະບາງໃຫ້ຈະເລີນຂື້ນເປັນກ້າວໆ.
ບັນດາທຸລະກິດ-ກິດຈະກຳ ຂອງນັກທຸລະກິດໜຸ່ມແຂວງຫຼວງພະບາງ ປະກອບ 14 ຂະແໜງທຸລະກິດເປັນຕົ້ນແມ່ນ: ທຸລະກິດ ອະສັງຫາລິມະຊັບ, ທຸລະກິດ ວັດທະນະ ທຳ-ການທ່ອງທ່ຽວ, ທຸລະກິດ ໂຮງຈັກ-ໂຮງງານ, ທຸລະກິດ ກໍ່ສ້າງຂົວທາງ-ເຄຫະສະຖານ, ທຸລະກິດພະລັງງານ-ບໍ່ແຮ່, ທຸລະກິດ ເຕັກໂນໂລຊີ-ການສື່ສານ, ທຸລະກິດ ກະສິກຳ-ການແປຮູບ, ທຸລະກິດ ເງິນກູ້ມະຫາພາກ-ຈຸລະພາກ, ທຸລະກິດ ດ້ານການສຶກສາ, ທຸລະກິດ ດ້ານສາທາລະນະສຸກ, ທຸລະກິດ ເຄື່ອງຫັດຖະກິດ-ວັດຖຸມີຄ່າ, ທຸລະກິດຂົນສົ່ງ-ໂລຈິດສະຕິກ, ທຸລະກິດ ບ້ານພັກ-ໂຮງແຮມ, ທຸລະກິດ ຮ້ານອາຫານ, ທຸລະກິດ ການຄ້າຂາເຂົ້າ-ຂາອອກ ແລະ ອື່ນໆ.
ກອງປະຊຸມໄດ້ເອກະພາບຮັບເຮົາເອົາບົດລາຍການການເມືອງທັງສອງພາກ, ບົດສຳຫຼວດການນຳພາຂອງຄະນະຊຸດເກົ່າ ແລະ ໄດ້ປ່ອນບັດຄັດເລືອກເອົາຄະນະຊຸດໃຫມ່ ຈຳນວນ 15 ສະຫາຍ. ກອງປະຊຸມຄັ້ງປະຖົມມະລຶກຕົກ ໄດ້ລົງເຫັນດີຮັບຮອງເອົາສະຫາຍ ອາຄົມ ພົມມະຫານ ເປັນປະທານສະມາຄົມນັກທຸລະກິດໜຸ່ມແຂວງຫຼວງພະບາງ, ສະຫາຍ ອິນແຫຼງ ວົງສຸວັນ, ສະຫາຍ ວິລະເດດ ໂຄຕິເສນ, ສະຫາຍ ພະນົມໄຊ ພະການ ແລະ ສະຫາຍ ຄຳສີງ ຈັນທະວົງ ເປັນຮອງປະທານ,
ກອງປະຊຸມ ໄດ້ເລືອກເອົາສະຫາຍ ຄຳສິງ ຈັນທະວົງ ເປັນປະທານກວດກາ, ສະຫາຍ ສົມດີ ມິດເມືອງເໜືອ ແລະ ສະຫາຍ ຊ້າງກ້ອມ ພູດທະວົງ ເປັນຮອງປະທານກວດກາ ແລະ ໄດ້ເລືອກເອົາຜູ້ແທນສົມບູນເຂົ້າຮ່ວມກອງປະຊຸມສະມາຄົມນັກທຸລະກິດແຫ່ງຊາດ ຈຳນວນ 16 ສະຫາຍ ແລະ ຜູ້ແທນສຳຮອງ 2 ສະຫາຍ.
