ໃນ ສປປ ລາວ ຕົວເລກການຕິດເຊື້ອໃນແຕ່ລະວັນແມ່ນ ຍັງໜ້າເປັນຫ່ວງ ໂດຍສະເພາະແມ່ນໃນບັນດາແຂວງທີ່ມີປະຊາກອນໜາແໜ້ນ, ສະຖານທີ່ເຮັດວຽກ, ຕະຫຼາດ, ໂຮງຈັກໂຮງງານ ແລະ ບ່ອນອື່ນໆທີ່ມີຈຳນວນຄົນຫຼາຍ ແລະ ບໍ່ສາມາດຮັກສາໄລຍະຫ່າງໄດ້,
ໃນຂະນະດຽວກັນການເສຍຊີວິດ ແມ່ນໄດ້ມີໃຫ້ເຫັນໃນແຕ່ລະວັນ ໂດຍສະເພາະໃນບັນດາຜູ້ທີ່ສູງອາຍຸ, ຜູ້ມີພະຍາດປະຈໍາຕົວ, ສະນັ້ນມາດຕະການ ການປ້ອງກັນຕົນເອງ ແມ່ນຍັງມີຄວາມສໍາຄັນ ແລະ ຈໍາເປັນທີ່ສຸດ ໃນການຫຼຸດຜ່ອນການຕິດເຊື້ອ, ໂດຍສະເພາະ ແມ່ນຕ້ອງໄດ້ລົງໄປໃຫ້ສຸຂະສືກສາ ໃຫ້ປະຊາຊົນບັນດາເຜົ່າໄດ້ເຂົ້າມາ ສັກວັກຊີນເພາະເປັນວິທີການທີ່ ສ້າງພູມຄຸ້ມກັນເພື່ອສາມາດຫຼຸດຜ່ອນອັດຕາຄວາມຮຸນແຮງ ແລະ ການຕາຍເມື່ອມີການຕິດພະຍາດ.
ພັກ ແລະ ລັດຖະບານແມ່ນໄດ້ຈັດຫາວັກຊີນປ້ອງກັນພະຍາດໂຄວິດ-19 ເຂົ້າມາບໍລິການໃຫ້ປະຊາຊົນຢ່າງພຽງພໍ ໃນທຸກຂົງເຂດ ເປັນຕົ້ນ ເຂດຫ່າງໄກສອກຫຼີກ, ກຸ່ມເປົ້າໝາຍຢ່າງພຽງພໍ ດັ່ງນັ້ນຈີ່ງສະເໜີໃຫ້ ພໍ່ແມ່ ປະຊາຊົນຈົ່ງພ້ອມໃຈກັນພາກັນໄປຮັບວັກຊີນຕາມວັນເວລາທີ່ທາງຄະນະສະເພາະກິດຂັ້ນແຂວງ, ເມືອງ ຫຼື ບ້ານໄດ້ແຈ້ງໃຫ້ຮັບຊາບ.
ສະພາບການລະບາດຂອງພະຍາດ COVID-19 ຢູ່ ສປປ ລາວ
ວັນທີ 05 ທັນວາ 2021, ທົ່ວປະເທດ ໄດ້ເກັບຕົວຢ່າງມາກວດຊອກຫາເຊືື້ອໂຄວິດ-19 ທັງໝົດ 3,867 ຕົວຢ່າງ ໃນຂອບເຂດທົ່ວປະເທດ ແລະ ພົບເຊື້ອ ທັງໝົດ 889 ຄົນ (ຕິດເຊື້ອພາຍໃນ ມີ 889 ຄົນ ແລະ ຕິດເຊື້ອນໍາເຂົ້າ 0 ຄົນ).
ຂໍ້ມູນໂດຍຫຍໍ້ກ່ຽວກັບ ການຕິດເຊືື້ອພາຍໃນໃໝ່ ທັງໝົດ 889 ຄົນ ຈາກ 17 ແຂວງ ແລະ ນະຄອນຫຼວງວຽງຈັນ ເຊິ່ງມີລາຍລະອຽດ ດັ່ງນີ້:
ນະຄອນຫຼວງ 263 ຄົນ ໃນ 120 ບ້ານ ແລະ 9 ເມືອງ, ເມືອງຈັນທະບູລີ ມີ 18 ບ້ານ (33 ຄົນ), ເມືອງສີໂຄດຕະບອງ ມີ 23 ບ້ານ (48 ຄົນ), ເມືອງໄຊເສດຖາ ມີ 28 ບ້ານ (59 ຄົນ), ເມືອງສີສັດຕະນາກ ມີ 10 ບ້ານ (46 ຄົນ), ເມືອງ ນາຊາຍທອງ ມີ 9 ບ້ານ (15 ຄົນ), ເມືອງໄຊທານີ ມີ 19 ບ້ານ (31 ຄົນ), ເມືອງຫາດຊາຍຟອງ ມີ 10 ບ້ານ (19 ຄົນ), ເມືອງ ປາກງື່ມ ມີ 03 ບ້ານ (03 ຄົນ), ເມືອງ ສັງທອງ ມີ 02 ບ້ານ (06 ຄົນ), ເຫຼືອນັ້ນແມ່ນຍັງສືບຕໍ່ເອົາຂໍ້ມູນ.
- ຫຼວງພະບາງ ມີ 87 ຄົນ ໃນ 35 ບ້ານ ແລະ 5 ເມືອງ
- ອຸດົມໄຊ ມີ 82 ຄົນ ໃນ 29 ບ້ານ ແລະ 4 ເມືອງ
- ແຂວງວຽງຈັນ ມີ 66 ຄົນ ໃນ 27 ບ້ານ ແລະ 8 ເມືອງ
- ໄຊຍະບູລີ ມີ 66 ຄົນ ໃນ 15 ບ້ານ ແລະ 2 ເມືອງ
- ຫົວພັນ ມີ 54 ຄົນ ໃນ 12 ບ້ານ ແລະ 3 ເມືອງ
- ບໍ່ແກ້ວ ມີ 51 ຄົນ ໃນ 26 ບ້ານ ແລະ 2 ເມືອງ
- ສະຫວັນນະເຂດ ມີ 43 ຄົນ ໃນ 25 ບ້ານ ແລະ 8 ເມືອງ
- ຫຼວງນໍ້າທາ ມີ 32 ຄົນ ໃນ 17 ບ້ານ ແລະ 3 ເມືອງ
- ເຊກອງ ມີ 28 ຄົນ ໃນ 9 ບ້ານ ແລະ 2 ເມືອງ
- ຈຳປາສັກ ມີ 25 ຄົນ ໃນ 10 ບ້ານ ແລະ 2 ເມືອງ
- ຊຽງຂວາງ ມີ 21 ຄົນ ໃນ 11 ບ້ານ ແລະ 3 ເມືອງ
- ໄຊສົມບູນ ມີ 19 ຄົນ ໃນ 4 ບ້ານ ແລະ 3 ເມືອງ
- ສາລະວັນ ມີ 18 ຄົນ ໃນ 7 ບ້ານ ແລະ 4 ເມືອງ
- ຄຳມ່ວນ ມີ 10 ຄົນ ໃນ 6 ບ້ານ ແລະ 4 ເມືອງ
- ອັດຕະປື ມີ 9 ຄົນ ໃນ 6 ບ້ານ ແລະ 2 ເມືອງ
- ບໍລິຄຳໄຊ ມີ 9 ຄົນ ໃນ 5 ບ້ານ ແລະ 4 ເມືອງ
- ຜົ້ງສາລີ ມີ 6 ຄົນ ໃນ 4 ບ້ານ ແລະ 3 ເມືອງ
ສ່ວນການຕິດເຊືື້ອນໍາເຂົ້າ ຂອງຜູ້ທີ່ເດີນທາງເຂົ້າປະເທດແມ່ນມີ 0 ຄົນ.
ມາຮອດວັນທີ 06 ທັນວາ 2021 ຕົວເລກຜູ້ຕິດເຊື້ອສະສົມ ພະຍາດໂຄວິດ-19 ຢູ່ ສປປ ລາວ 80,722 ຄົນ, ເສຍຊີວິດສະສົມ 210 ຄົນ (ໃໝ່ 03), ປິ່ນປົວຫາຍດີ ແລະ ກັບບ້ານໃນມື້ວານ ມີ 839 ຄົນ, ກໍາລັງປິ່ນປົວ 12,088 ຄົນ.ລາຍລະອຽດຜູ້ເສຍຊີວິດໃໝ່ 03 ຄົນ ມີດັ່ງນີ້:
ຜູ້ທີ 1 ແມ່ນ ເພດຊາຍ, ອາຍຸ 77 ປີ, ບ້ານໄຊອຸດົມ, ເມືອງອຸທຸມພອນ, ແຂວງສະຫັວນນະເຂດ
- ພະຍາດປະຈໍາຕົວ: ອຳມະພາດ ເປັນມາໄດ້ 04 ປີແລ້ວ ກິນຢາປະຈໍາ
- ບໍ່ໄດ້ຮັບການສັກຢາກັນພະຍາດໂຄວິດ-19
- ເວລາ 19:30 ໂມງຂອງວັນທີ 27 ພະຈິກ 2021: ໄດ້ໄປກວດຢູ່ໂຮງໝໍແຂວງສະຫັວນນະເຂດ ດ້ວຍອາການໄຂ້, ໄອແຫ້ງໆ, ຫາຍໃຈຝຶດແໜ້ນໜ້າເອິກ, ອີດເມື່ອຍມາໄດ້ 02ມື້, ຜົນກວດອອກມາພົບເຊື້ອໂຄວິດ-19.
- ໄດ້ປີ່ນປົວແຕ່ວັນທີ 27 ພະຈິກ – 04 ທັນວາ 2021 ລວມເປັນເວລາ 08 ວັນ
- ຮອດເວລາ 18:45 ນາທີ ຂອງວັນທີ 4 ທັນວາ 2021: ຄົນເຈັບໄດ້ເສຍຊີວິດ
ຜູ້ທີ 2 ແມ່ນ ເພດຍິງ, ອາຍຸ 38 ປີ, ບ້ານ ດົງໜໍ່ ເມືອງຊະນະຄາມ ແຂວງວຽງຈັນ (ນັບເປັນຄົນເຈັບນະຄອນຫລວງວຽງຈັນ)
- ພະຍາດຜ່ານມາ: ພູມຄຸ້ມກັນບົກພ່ອງ ແລະ ຜູ້ກ່ຽວເປັນຄົນພິການແຕ່ກໍາເນີດ
- ບໍ່ໄດ້ຮັບການສັກຢາກັນພະຍາດໂຄວິດ-19
- ເຂົ້າມາໂຮງໝໍມິດຕະພາບ ວັນທີ່ 03 ທັນວາ 2021, ອາການເບື້ອງຕົ້ນ: ໄອ ຫາຍໃຈຝືດ ຫາຍໃຈມີສຽງດັງ ມີອາການແໜ້ນເອິກ ຮາກຫຼາຍເທື່ອ,ອາການຊີວິດບໍ່ດີ.
- ເວລາ 12:00 ນາທີ ຂອງວັນທີ 05 ທັນວາ 2021 ຄົນເຈັບອິດເມືອຍຫຼາຍ ແລະ ເສຍຊີວິດ
ຜູ້ທີ 3 ແມ່ນ ເພດຍິງ, ອາຍຸ 71 ປີ, ບ້ານໂນນສະຫວັນ, ເມືອງໄຊເສດຖາ, ນະຄອນຫລວງ.
- ພະຍາດປະຈຳໂຕ: ຄວາມດັນເລືອດສູງ, ເບົາຫວານ(ບໍ່ໄດ້ຕິດຕາມ)
- ບໍ່ໄດ້ຮັບການສັກຢາກັນພະຍາດໂຄວິດ-19
- ກ່ອນໜ້ານີ້ ໄຂ້,ໄອ,ຫາຍໃຈຝືດມາໄດ້1ອາທິດ
- ເວລາ 14:00 ໂມງ ຂອງວັນທີ 01 ທັນວາ 2021 ຄົນເຈັບເຂົ້າມາປີ່ນປົວຢູ່ໂຮງໝໍດ້ວຍອາການອິດເມື່ອຍ,ຈືດມ້ານ,ຖ່າຍເປັນເລືອດສີແດງສົດ ກວດພົບເຊື້ອພະຍາດໂຄວິດ-19
- ເວລາ 01:30 ນາທີ ຂອງວັນທີ 05 ທັນວາ 2021: ຄົນເຈັບມີອາການກະວົນກະວາຍ,ຫາຍໃຈຝືດ, ຫາຍໃຈຫອບ ແລະ ນອນພຽງບໍ່ໄດ້, ຄົນເຈັບ ໄດ້ເສຍຊີວິດ.
