ກອງປະຊຸມສຳມະນາໃນຫົວຂໍ້: ການເຊື່ອມໂຍງສື່ແບບເກົ່າ-ແບບໃໝ່ ໃຫ້ສື່ມວນຊົນລາວທົ່ວປະເທດຜ່ານອອນລາຍ ໄດ້ປິດລົງດ້ວຍຜົນສຳເລັດໃນວັນທີ 11 ມີນານີ້ ທີ່ໜັງສືພິມພາສາຕ່າງປະເທດ ໂດຍພາຍໃຕ້ການເປັນປະທານຮ່ວມຂອງທ່ານ ສະຫວັນຄອນ ຣາຊມຸນຕຣີ ອະດີດຮອງລັດຖະມົນຕີກະຊວງຖະແຫຼງຂ່າວ, ວັດທະນະທຳ ແລະ ທ່ອງທ່ຽວ (ຖວທ) ປະທານສະມາຄົມນັກຂ່າວແຫ່ງ ສປປ ລາວ, ມີທ່ານນາງ ແສງແກ້ວ ຫົວໜ້າວິທະຍຸສາກົນແຫ່ງປະເທດຈີນ (CRI) ປະຈຳລາວ, ມີບັນດານັກວິທະຍາກອນ, ສື່ມວນຊົນຈາກທົ່ວປະເທດເຂົ້າຮ່ວມ.

ກອງປະຊຸມຄັ້ງນີ້ໄດ້ດຳເນີນມາເປັນເວລາ 2 ວັນ ເພື່ອເປັນການຍົກລະດັບຄວາມຮູ້ ແລະ ພັດທະນາສື່ແບບໃໝ່ໃນຫົວຂໍ້ສໍາຄັນຕ່າງໆທີ່ປິ່ນອ້ອມວຽກງານສື່ມວນຊົນໃນໄລຍະໃໝ່ ເພື່ອດຶງດູດຜູ້ບໍລິໂພກ ໃນນັ້ນບັນດານັກສຳມະກອນຍັງໄດ້ຮຽນຮູ້ຄວາມແຕກຕ່າງກັນລະຫວ່າງສື່ເກົ່າ ແລະ ສື່ໃໝ່ ທາງດ້ານເນື້ອໃນ ແລະ ຮູບການ, ປັດໄຈໃນການຂຽນຂ່າວໃສ່ສື່ເກົ່າ-ສື່ໃໝ່, ຄວາມແຕກຕ່າງລະຫວ່າງຂໍ້ມູນ ແລະ ຂ່າວ, ການນໍາໃຊ້ຂໍ້ມູນມາຂຽນເປັນບົດຄວາມ; ການນໍາໃຊ້ພາສາໃນການຂຽນຂ່າວ; ການອອກແບບ ແລະ ຂຽນໂຄງສ້າງສໍາລັບການຖ່າຍທໍາຂ່າວ ແລະ ສາລະຄະດີ (Video Clip), ມູມມອງ ແລະ ວິທີການຖ່າຍທໍາ, ການສ້າງ ແລະ ໃຊ້ Info graphic ໃນຂ່າວ; ຮູບແບບການນໍາສະເໜີໜ້າຂ່າວຂອງສື່ອອນລາຍ; ກົດໝາຍສື່ມວນຊົນ, ຈັນຍາບັນ, ຈັນຍາທໍາຂອງນັກຂ່າວ; ການຄຸ້ມຄອງ-ປ້ອງກັນ-ແກ້ໄຂຂໍ້ມູນຂ່າວສານ ທີ່ເຂົ້າມາທໍາລາຍສື່ອອນລາຍຂອງອົງການ; ຫັນການນໍາໃຊ້ຂໍ້ມູນຂ່າວສານ-ສື່ສານເປັນທັນສະໄໝ, ມີຄວາມປອດໄພ ແລະ ການຊອກແຫຼ່ງລາຍຮັບຜ່ານສື່ອອນລາຍ, ກອງປະຊຸມຄັ້ງນີ້ຈັດໂດຍ: ສະມາຄົມນັກຂ່າວແຫ່ງ ສປປ ລາວ ຮ່ວມກັບວິທະຍຸສາກົນແຫ່ງປະເທດຈີນປະຈຳລາວ.

ໃນໂອກາດດຽວກັນນີ້, ທ່ານ ສະຫວັນຄອນ ຣາຊມຸນຕຣີ ໄດ້ໃຫ້ກຽດໂອ້ລົມບາງຕອນສຳຄັນວ່າ: ກອງປະຊຸມສຳມະນາທີ່ຈັດຂຶ້ນຄັ້ງນີ້ໄດ້ຮັບຜົນສຳເລັດຕາມຈຸດປະສົງຄາດໝາຍໃນທຸກດ້ານ ຍ້ອນຄວາມເອົາໃຈໃສ່ຂອງພາກສ່ວນຕ່າງໆທີ່ກ່ຽວຂ້ອງ, ກອງປະຊຸມຈັດຂຶ້ນໃນລະບົບທາງໄກ ທັງເປັນການປະຢັດແຕ່ຜົນໄດ້ຮັບສູງ ຜູ້ເຂົ້າຮ່ວມຈາກທົ່ວປະເທດ ໂດຍສະເພາະແມ່ນບັນດາທ່ານຢູ່ຕ່າງແຂວງໄດ້ມີຄວາມສົນໃຈ ແລກປ່ຽນຄວາມຄິດເຫັນ ສົນທະນາຖາມໃນຫົວຂໍ້ທີ່ໜ້າສົນໃຈ ສາມາດຢັ້ງຢືນໄດ້ວ່ານີ້ແມ່ນໝາກຜົນທີ່ໄດ້ຮັບຂອງການຈັດກອງປະຊຸມ ເພື່ອໃຫ້ສື່ມວນຊົນໄດ້ຮັບການພັດທະນາ ເພື່ອຮັບໃຊ້ພາລະກິດຂອງປະເທດຊາດ ຢາກຮັບໃຊ້ໄດ້ສື່ມວນຊົນຕ້ອງໄດ້ເຂັ້ມແຂງ ທັນສະໄໝ ມີຄວາມສາມາດນັບມື້ນັບສູງຂຶ້ນຢ່າງມີຄຸນນະພາບ.

ຂ່າວ-ພາບ: ພູວັນ