ລັດຖະບານ ມີການຜ່ອນຜັນ ບາງມາດຕະການປ້ອງກັນສະກັດກັ້ນ ການລະບາດ ພະຍາດໂຄວິດ-19 ໄລຍະໃໝ່

ວັນທີ 3 ກຸມພາ 2022 ນີ້, ທ່ານ ນາງ ທິບພະກອນ ຈັນທະວົງສາ, ຮອງລັດຖະມົນຕີ, ຮອງຫົວໜ້າຫ້ອງວ່າການສຳນັກງານນາຍົກລັດຖະມົນຕີ, ຮອງຫົວໜ້າຄະນະສະເພາະກິດ, ຜູ້ປະຈຳການ ໄດ້ຖະແຫລງຂ່າວກ່ຽວກັບທິດຊີ້ນໍາຂອງ ກອງປະຊຸມລັດຖະບານຕໍ່ມາດຕະການປ້ອງກັນ, ຄວບຄຸມ ແລະ ສະກັດກັ້ນການແພ່ລະບາດຂອງພະຍາດໂຄວິດ-19 ໃນໄລຍະໃໝ່ ນັບແຕ່ເວລາ 00:00 ໂມງ ຂອງວັນທີ 4 ກຸມພາ 2022 ເປັນຕົ້ນໄປ ໂດຍລັດຖະບານໄດ້ມີມາດຕະການຜ່ອນຜັນ ເຊັ່ນ: ເງື່ອນໄຂ ແລະ ໄລຍະເວລາໃນການຈຳກັດບໍລິເວນ ເມື່ອເດີນທາງເຂົ້າມາ ສປປ ລາວ, ການອໍານວຍຄວາມສະດວກໃຫ້ແກ່ການຂົນສົ່ງສິນຄ້າ ເພີ່ມຂຶ້ນ, ຍົກເລີກຂໍ້ຈຳກັດຈຳນວນໜຶ່ງ ໃນການເຄື່ອນ ໄຫວ ແລະ ດຳເນີນທຸລະກິດ ຢູ່ພາຍໃນປະເທດ ທີ່ໄດ້ກຳນົດໃນໄລຍະຜ່ານມາ ເພື່ອອຳນວຍຄວາມສະດວກ ໃຫ້ແກ່ທຸກພາກສ່ວນໃນສັງຄົມ ຫັນມາເຄື່ອນໄຫວດຳລົງຊີວິດແບບໃໝ່ ແລະ ຟື້ນຟູເສດຖະກິດໄດ້ຫລາຍຂຶ້ນ. ແຕ່ຍັງຮັກສາບາງມາດຕະການຈຳກັດ ເພື່ອຮັບປະກັນໃຫ້ແກ່ການປ້ອງການການຕິດເຊື້ອ ແລະ ແຜ່ເຊື້ອ.

ທ່ານ ນາງ ທິບພະກອນ ຈັນທະວົງສາ ໄດ້ໃຫ້ຮູ້ວ່າ: ສຳລັບປີ 2022 ເນື່ອງຈາກ ອັດຕາການສັກວັກຊິນປ້ອງກັນ ໂຄວິດ-19 ຂອງບັນດາປະເທດໃນໂລກ ເພີ່ມສູງຂຶ້ນ, ມີເຕັກໂນໂລຊີທາງດ້ານການແພດທີ່ກ້າວໜ້າ ສາມາດຊອກຄົ້ນວິເຄາະພະຍາດໄດ້ໄວ ແລະ ໃຊ້ເວລາສັ້ນ. ນອກຈາກນີ້, ຍັງມີຢາປິ່ນປົວທີ່ມີປະສິດທິພາບທີ່ສູງ ອອກມານໍາໃຊ້ໃນສັງຄົມ, ສະພາບການລະບາດຈະຢູ່ໃນລະດັບທີ່ຈຳນວນຄົນເຈັບບໍ່ລົ້ນໂຮງໝໍ, ເຊິ່ງໝາຍຄວາມວ່າ ຂະແໜງສາທາສາມາດຄວບຄຸມໄດ້ ເມື່ອນັ້ນຈະເຮັດໃຫ້ໂລກເຮົາຕ້ອງຢູ່ຮ່ວມກັບພະຍາດໂຄວິດ ແລະ ຖືວ່າໂຄວິດໄດ້ກາຍເປັນພະຍາດປະຈຳຖິ່ນ ຫລື ເກີດຕາມລະດູການ ຄືກັບພະຍາດໄຂ້ຫວັດລະດູການ ອື່ນໆ. ມາຮອດປັດຈຸບັນ, ລັດຖະບານຫລາຍປະເທດ ໄດ້ມີຄວາມພະຍາຍາມຫລຸດຜ່ອນ ບັນດາມາດຕະການທາງບໍລິຫານ ແລະ ສັງ ຄົມ ເພື່ອຟື້ນຟູເສດຖະກິດໂດຍໄວ ແຕ່ໃນນັ້ນ ແມ່ນໄດ້ໃຫ້ຄວາມສຳຄັນໃນການສັກວັກຊິນປ້ອງກັນ ເປັນເງື່ອນໄຂໃນການສາມາດເຄື່ອນໄຫວດຳເນີນທຸລະກິດ, ການຜະລິດ ແລະ ດໍາລົງຊີວິດປະຈໍາວັນ ໄດ້ຢ່າງເປັນປົກກະຕິ.

ຍ້ອນມີການສັກວັກຊິນ, ການດຸ່ນດ່ຽງໃນການປະຕິບັດມາດຕະການຄວບຄຸມ ໂດຍການຮ່ວມມືຂອງສັງຄົມ ກັບຄວາມຮຽກຮ້ອງຕ້ອງການໃນການພັດທະນາ ແລະ ອີງໃສ່ຄາດຄະເນທ່າອ່ຽງຂອງການລະບາດ, ລັດຖະບານ ຈຶ່ງໄດ້ຄົ້ນຄວ້າປັບມາດຕະການ ໃຫ້ສອດຄ່ອງກັບສະພາບຕົວຈິງໃນໄລຍະໃໝ່ ດັ່ງທີ່ໄດ້ກຳນົດແຈ້ງການຂອງຫ້ອງວ່າການສຳນັກງານນາຍົກລັດຖະມົນຕີ ເລກທີ 130, ລົງວັນທີ 03 ກຸມພາ 2022 ເຊິ່ງມາດຕະການສ່ວນໃຫຍ່ ແມ່ນໄດ້ມີການຜ່ອນຜັນ ເຊັ່ນ: ເງື່ອນໄຂ ແລະ ໄລຍະເວລາໃນການຈຳກັດບໍລິເວນ ເມື່ອເດີນທາງເຂົ້າມາ ສປປ ລາວ, ການອໍານວຍຄວາມສະດວກໃຫ້ແກ່ການຂົນສົ່ງສິນຄ້າ ເພີ່ມຂຶ້ນ, ຍົກເລີກຂໍ້ຈຳກັດຈຳນວນໜຶ່ງ ໃນການເຄື່ອນໄຫວ ແລະ ດຳເນີນທຸລະກິດ ຢູ່ພາຍໃນປະເທດ ທີ່ໄດ້ກຳນົດໃນໄລຍະຜ່ານມາ ເພື່ອອຳນວຍຄວາມສະດວກ ໃຫ້ແກ່ທຸກພາກສ່ວນໃນສັງຄົມ ຫັນມາເຄື່ອນໄຫວດຳລົງຊີວິດແບບໃໝ່ ແລະ ຟື້ນຟູເສດ ຖະກິດ ໄດ້ຫລາຍຂຶ້ນ. ແຕ່ຍັງຮັກສາບາງມາດຕະການຈຳກັດ ເພື່ອຮັບປະກັນໃຫ້ແກ່ການປ້ອງການການຕິດເຊື້ອ ແລະ ແຜ່ເຊື້ອ, ເຊິ່ງລະອຽດເນື້ອໃນແຈ້ງການ ດັ່ງນີ້:

1. ເຫັນດີໃຫ້ມີການຜ່ອນຜັນ ໄລຍະເວລາການຈໍາກັດບໍລິເວນ ຕໍ່ແຕ່ລະເປົ້າໝາຍຜູ້ທີ່ຈະເດີນທາງເຂົ້າມາ ສປປ ລາວ ຄື:

1.1 ຄະນະຜູ້ແທນ ຫລື ທີມງານວິຊາການທຸກລະດັບທີ່ໄປເຄື່ອນໄຫວເຮັດວຽກລວມທັງໄປສໍາມະນາຢູ່ຕ່າງປະເທດ ແລະ ພົນລະເມືອງລາວ ທີ່ ກັບມາຈາກຕ່າງປະເທດ, ເມື່ອມາເຖິງ ສປປ ລາວ ຕ້ອງໄດ້ເກັບຕົວຢ່າງເພື່ອກວດຫາເຊື້ອໂຄວິດ-19 ດ້ວຍເຄື່ອງກວດ RT-PCR, ເຂົ້າພັກກັກກັນຕົວຢູ່ສະຖານທີ່ທີ່ຄະນະສະເພາະກິດ ກຳນົດໄວ້ເພື່ອລໍຖ້າຜົນກວດບໍ່ເກີນ 48 ຊົ່ວໂມງ ແລະ ຖ້າຜົນກວດບໍ່ພົບເຊື້ອກໍຕ້ອງໄດ້ສືບຕໍ່ຈໍາກັດບໍລິເວນ ຢູ່ສະຖານທີ່ພັກເຊົາຂອງຕົນ ໃຫ້ຄົບ 7 ວັນພ້ອມທັງປະຕິບັດມາດຕະການປ້ອງກັນ ແລະ ຄວບຄຸມການຕິດເຊື້ອຢ່າງເຂັ້ມງວດ;

1.2 ນັກການທູດ ຫລື ພະນັກງານສະຖານທູດຕ່າງໆ, ພະນັກງານຜູ້ຕາງໜ້າອົງການຈັດຕັ້ງສາກົນທີ່ນອນຢູ່ໃນເຄືອຂ່າຍຂອງອົງການສະຫະປະຊາຊາດ, ອົງການຈັດຕັ້ງສາກົນທີ່ໄດ້ຮັບເອກະສິດ ແລະ ອະພິສິດທາງການທູດລວມທັງສະມາຊິກຄອບຄົວຂອງເປົ້າໝາຍດັ່ງກ່າວ ທີ່ໄດ້ຮັບອະນຸຍາດຈາກຄະນະສະເພາະກິດໃຫ້ເຂົ້າມາ ສປປ ລາວ, ເມື່ອມາເຖິງ ສປປ ລາວ ຕ້ອງໄດ້ເກັບຕົວຢ່າງເພື່ອກວດຫາເຊື້ອ ໂຄວິດ-19 ດ້ວຍເຄື່ອງກວດ RT-PCR ແລະ ໃຫ້ສືບຕໍ່ຈຳກັດບໍລິເວນຢູ່ສະຖານທີ່ ພັກເຊົາຂອງຕົນ ໃຫ້ຄົບ 7ວັນ, ພ້ອມທັງປະຕິບັດມາດຕະການປ້ອງກັນ ແລະ ຄວບຄຸມການຕິດເຊື້ອຢ່າງເຂັ້ມງວດ;

1.3 ກຸ່ມນັກທຸລະກິດ ຫລື ນັກລົງທຶນທີ່ໄດ້ຮັບການອະນຸຍາດໃຫ້ດໍາເນີນທຸລະກິດ ຫລື ລົງທຶນຢູ່ ສປປ ລາວ ທີ່ຈະເດີນທາງເຂົ້າມາ ສປປ ລາວ, ເມື່ອມາເຖິງ ສປປ ລາວຕ້ອງໄດ້ກວດຫາເຊື້ອໂຄວິດ-19 ດ້ວຍເຄື່ອງກວດ RT-PCR ແລະ ຈຳກັດບໍລິເວນ ຢູ່ ສະຖານທີ່ ທີ່ຄະນະສະເພາະກິດ ກຳນົດໄວ້ ເພື່ອລໍຖ້າຜົນກວດບໍ່ເກີນ 48 ຊົ່ວໂມງ, ຖ້າຜົນກວດບໍ່ພົບເຊື້ອ ສາມາດອອກໄປປະຕິບັດວຽກງານຕາມແຜນທີ່ກຳນົດໄວ້, ແຕ່ຕ້ອງໃສ່ອຸປະກອນຕິດຕາມທາງການແພດ ແລະ ຕ້ອງປະຕິບັດມາດຕະການປ້ອງກັນ ແລະ ຄວບຄຸມການຕິດເຊື້ອຢ່າງເຂັ້ມງວດ;

1.4 ຄົນຕ່າງປະເທດ ທີ່ເປັນຊ່ຽວຊານ, ວິຊາການ, ແຮງງານ, ຜູ້ປະກອບການ,ນັກສຶກສາ, ຄົນເຊື້ອຊາດລາວ ແລະ ຄອບຄົວຂອງພົນລະເມືອງລາວ, ເມື່ອມາເຖິງ ສປປ ລາວ ຕ້ອງໄດ້ເກັບຕົວຢ່າງເພື່ອກວດຫາເຊື້ອ ໂຄວິດ-19 ດ້ວຍເຄື່ອງກວດ RT-PCRແລະ ລໍຖ້າຜົນກວດບໍ່ເກີນ 48 ຊົ່ວໂມງຢູ່ໂຮງແຮມທີ່ຄະນະສະເພາະກິດກໍານົດ, ຖ້າຜົນກວດບໍ່ພົບເຊື້ອ ໃຫ້ສືບຕໍ່ຈຳກັດບໍລິເວນຢູ່ສະຖານທີ່ພັກເຊົາຂອງຕົນ ໃຫ້ຄົບ 7 ວັນ,ແຕ່ຕ້ອງໃສ່ອຸປະກອນຕິດຕາມທາງການແພດ, ພ້ອມທັງປະຕິບັດມາດຕະການປ້ອງກັນແລະຄວບຄຸມການຕິດເຊື້ອຢ່າງເຂັ້ມງວດ;

1.5 ນັກທ່ອງທ່ຽວເປັນກຸ່ມ ທີ່ຈະເດີນທາງເຂົ້າມາລາວພາຍໃຕ້ໂຄງການເສັ້ນທາງທ່ອງທ່ຽວສີຂຽວ, ເມື່ອມາເຖິງ ສປປ ລາວ ຕ້ອງໄດ້ເກັບຕົວຢ່າງເພື່ອກວດຫາເຊື້ອໂຄວິດ-19 ດ້ວຍເຄື່ອງກວດ RT-PCR, ເຂົ້າພັກຢູ່ໂຮງແຮມທີ່ຄະນະສະເພາະກິດໄດ້ກຳນົດໄວ້ເພື່ອລໍຖ້າຜົນກວດບໍ່ເກີນ 48 ຊົ່ວໂມງ ແລະ ຖ້າຜົນກວດບໍ່ພົບເຊື້ອ ຈຶ່ງອະນຸຍາດໃຫ້ອອກໄປເຄື່ອນໄຫວກິດຈະກຳຕາມແຜນທ່ອງທ່ຽວ ແຕ່ຕ້ອງໃສ່ອຸປະກອນຕິດຕາມທາງການແພດ, ພ້ອມທັງປະຕິບັດມາດຕະການປ້ອງກັນ ແລະ ຄວບຄຸມການຕິດເຊື້ອຢ່າງເຂັ້ມງວດ.

ບັນດາກຸ່ມເປົ້າໝາຍທີ່ລະບຸໃນຂໍ້ 1.1-1.5 ຂ້າງເທິງ ກໍລະນີຜົນກວດພົບເຊື້ອ (ຜົນເປັນບວກ) ສາມາດເຂົ້າປິ່ນປົວຢູ່ໂຮງໝໍ ຫລື ສູນປິ່ນປົວ ຫລື ປິ່ນປົວຢູ່ສະຖານທີ່ພັກເຊົາຂອງຕົນ ຢ່າງໜ້ອຍ 10 ວັນ ໂດຍອີງຕາມອາການຂອງຜູ້ຕິດເຊື້ອແຕ່ລະກໍລະນີ ຕາມຄູ່ມືແນະນຳຂອງກະຊວງສາທາລະນະສຸກ ໃນແຕ່ລະໄລຍະ.

2. ສຳລັບຄົນຕ່າງປະເທດ ທີ່ອາໄສຢູ່ ສປປ ລາວ ລວມທັງຜູ້ທີ່ເດີນທາງເຂົ້າມາ ສປປ ລາວ ຕາມການອະນຸມັດຂອງຄະນະສະເພາະກິດຂັ້ນສູນກາງ ຕ້ອງໄດ້ດໍາເນີນການຕິດຕັ້ງ ແລະ ລົງທະ ບຽນ ໂປຣແກຣມ (ແອັບ) LaoKYC ໃນໂທລະສັບມືຖືຂອງຕົນ ເພື່ອໃຊ້ບໍລິການ “ລາວ ສູ້ສູ້” ແລະ ສະໝັກສ້າງລະຫັດວັກຊິນ (Vaccine ID) ເພື່ອໃຊ້ເປັນບັດຢັ້ງຢືນການສັກວັກຊິນ ແລະ ສະຖານະຄວາມສ່ຽງຂອງຕົນ ໃນເວລາເຄື່ອນໄຫວ, ເດີນທາງ, ເຂົ້າໄປສໍານັກງານຂອງລັດ, ໂຮງງານ, ຮ້ານຄ້າ, ຮ້ານອາຫານ ແລະ ສະຖານທີ່ຕ່າງໆ.

3. ເຫັນດີອະນຸຍາດ ໃຫ້ກະຊວງການຕ່າງປະເທດ ອອກວີຊາ ສຳລັບນັກທ່ອງທ່ຽວເປັນກຸ່ມ ທີ່ຈະເດີນທາງເຂົ້າມາ ສປປ ລາວ ພາຍໃຕ້ໂຄງການເສັ້ນທາງທ່ອງທ່ຽວສີຂຽວ ທີ່ລັດຖະບານ ໄດ້ອະນຸຍາດແລ້ວນັ້ນ ທີ່ລະບຸໃນຂໍ້ 1.5 ໂດຍຮັບປະກັນໃຫ້ນັກທ່ອງທ່ຽວຕ້ອງລົງທະບຽນ QR Code(Vaccine ID) ເພື່ອນໍາໃຊ້ໄລຍະທ່ອງທ່ຽວຢູ່ ສປປ ລາວ ແລະ ອອກວີຊາ ໃຫ້ກຸ່ມເປົ້າໝາຍຕ່າງໆ ຕາມທີ່ໄດ້ລະບຸໃນ ຂໍ້ທີ 1.1-1.4 ຂ້າງເທິງ ຕາມການອະນຸຍາດຂອງຄະນະສະເພາະກິດ.

4. ເຫັນດີດ້ານຫລັກການໃຫ້ເປີດດ່ານທ້ອງຖິ່ນ ແລະ ດ່ານປະເພນີ ສໍາລັບຂົນສົ່ງສິນຄ້າ ໂດຍມອບໃຫ້ນະຄອນຫລວງວຽງຈັນ ແລະ ບັນດາແຂວງທີ່ມີຊາຍແດນຕິດກັບຕ່າງປະເທດ ດຳເນີນການກວດກາ, ທັງປຶກສາຫາລືກັບທ້ອງຖິ່ນຂອງປະເທດທີ່ມີດ່ານຮ່ວມກັນ ຖ້າເຫັນວ່າມີຄວາມພ້ອມຮອບດ້ານ ລວມທັງສິ່ງອໍານວຍຄວາມສະດວກໃນການຂົນສົ່ງສິນຄ້າ ແລະ ຮັບປະກັນໃນການປ້ອງກັນ ແລະ ຄວບຄຸມການລະບາດ ຂອງພະຍາດ ໂຄວິດ-19 ທັງມີຄວາມເປັນເອກະພາບກັນສູງແລ້ວ ແມ່ນມອບໃຫ້ອົງການປົກຄອງນະຄອນຫລວງວຽງຈັນ ແລະ ອົງການປົກຄອງແຂວງ ອະນຸຍາດໃຫ້ເປີດໄດ້.

5. ເຫັນດີໃຫ້ພາກເອກະຊົນມີສ່ວນຮ່ວມ ໃນການເກັບຕົວຢ່າງເພື່ອກວດຫາເຊື້ອ ໂຄວິດ-19. ສ່ວນລາຍລະອຽດ, ມອບໃຫ້ກະຊວງສາທາລະນະສຸກ ເປັນໃຈກາງສົມທົບ ກັບ ກະຊວງກ່ຽວຂ້ອງ ຄົ້ນຄ້ວາ ແລະ ກໍານົດມາດຖານເງື່ອນໄຂ, ທັງສ້າງລະບຽບການຄຸ້ມຄອງຫົວໜ່ວຍທຸລະກິດທີ່ອະນຸຍາດ ໃຫ້ດຳເນີນການກວດເຊື້ອພະຍາດດັ່ງກ່າວນັ້ນ ຕາມມາດຕະຖານທີ່ກະຊວງສາທາລະນະສຸກກໍານົດໄວ້.

6. ມອບໃຫ້ຄະນະສະເພາະກິດ ເພື່ອປ້ອງກັນ, ຄວບຄຸມ ແລະ ແກ້ໄຂການລະບາດຂອງພະຍາດໂຄວິດ-19 ຂັ້ນສູນກາງ ຊຸກຍູ້ການຜະລິດຢາປິ່ນປົວພະຍາດໂຄວິດ-19 ໃຫ້ສາມາດຜະລິດໄດ້ພຽງພໍກັບຄວາມຕ້ອງການຂອງສັງຄົມ.

7. ໃຫ້ອົງການປົກຄອງທ້ອງຖິ່ນທຸກຂັ້ນ ເພີ່ມທະວີປຸກລະດົມ ການສັກວັກຊິນດ້ວຍຫລາຍຮູບການ ແລະ ຫລາຍວິທີການ ເພື່ອໃຫ້ສາມາດສັກໄດ້ຫລາຍເທົ່າທີ່ຈະຫລາຍໄດ້ ຕາມຄຳສັ່ງ ຂອງນາຍົກລັດຖະມົນຕີ ວ່າດ້ວຍການເພີ່ມທະວີການສັກວັກຊິນກັນພະຍາດໂຄວິດ-19 ສະບັບເລກທີ 24/ນຍ, ລົງວັນທີ 10 ພະຈິກ 2021.

8. ເຫັນດີ ໃຫ້ເປີດກິລາ ໃນຮົ່ມ ແລະ ກາງແຈ້ງ ທຸກປະເພດ, ແຕ່ໃຫ້ເຈົ້າຂອງສະຖານທີ່ ມີມາດຕະການປ້ອງກັນ ແລະ ຄວບຄຸມ ຢ່າງເຂັ້ມງວດ.

9. ສືບຕໍ່ປິດຮ້ານບັນເທີງ ແລະ ຮ້ານຄາລາໂອເກະ.

10. ໃຫ້ອົງການປົກຄອງທ້ອງຖິ່ນທຸກຂັ້ນອະນຸຍາດ ແລະ ອໍານວຍຄວາມສະດວກ ໃຫ້ແກ່ການບໍລິການລົດໂດຍສານ, ຜູ້ໂດຍສານ, ຜູ້ເດີນທາງດ້ວຍພາຫະນະປະເພດເດີນທາງໄປ-ມາ ລະຫວ່າງແຂວງ ຕໍ່ແຂວງ, ເມືອງຕໍ່ເມືອງໄດ້ຢ່າງປົກກະຕິ, ແຕ່ພະນັກງານຂັບລົດ ແລະ ຜູ້ໂດຍສານ ຕ້ອງໄດ້ຮັບການສັກວັກຊິນຄົບໂດສ. ພ້ອມດຽວກັນນີ້, ກໍຫ້າມອົງການປົກຄອງທຸກຂັ້ນ ສ້າງຄວາມຫຍຸ້ງຍາກໃຫ້ແກ່ການໄປມາຫາສູ່ກັນ ກໍຄື ການທຳມາຫາກິນຂອງພົນລະເມືອງທຸກຄົນ ໃນຂອບເຂດທົ່ວປະເທດ ດ້ວຍການກຳນົດລະບຽບການທີ່ແຕກຕ່າງຈາກລະບຽບການ ທີ່ລັດຖະບານ ກໍຄື ຄະນະສະເພາະກິດເພື່ອປ້ອງກັນ, ຄວບຄຸມ ແລະ ແກ້ໄຂການລະບາດຂອງພະຍາດໂຄວິດ-19 ຂັ້ນສູນກາງ ໄດ້ວາງອອກຢ່າງເດັດຂາດ.

ແຈ້ງການສະບັບນີ້ ປ່ຽນແທນແຈ້ງການຂອງຫ້ອງວ່າການ ສໍານັກງານນາຍົກລັດ ຖະມົນຕີ ເລກທີ 1494, ລົງວັນທີ 14 ພະຈິກ 2021 ແລະ ມີຜົນສັກສິດ ນັບແຕ່ເວລາ 00:00 ໂມງ ຂອງວັນທີ 04 ກຸມພາ 2022 ເປັນຕົ້ນໄປ, ພວກເຮົາ ຈະສືບຕໍ່ປະເມີນສະພາບການ, ທົບທວນ ແລະ ດັດປັບມາດຕະການ ໃຫ້ເໝາະສົມກັບສະພາບຕົວຈິງຕື່ມ, ກໍລະນີມີການປ່ຽນແປງ ລັດຖະບານ ຈະແຈ້ງໃຫ້ຊາບເປັນແຕ່ລະໄລຍະ.

.

.

.