ກົມອຸຕຸນິຍົມ ແລະ ອຸທົກກະສາດ ແຈ້ງເຕືອນ ພາຍຸເຂດຮ້ອນໄລອອນຣອກ LIONROCK ໄລຍະ 09-12 ຕຸລາ ນີ້
ກົມອຸຕຸນິຍົມ ແລະ ອຸທົກກະສາດ ກະຊວງຊັບພະຍາກອນ ທຳມະຊາດ ແລະ ສິ່ງແວດລ້ອມ ໄດ້ແຈ້ງເຕືອນພາຍຸເຂດຮ້ອນ ວ່າ: ໃນ ເວລາ 8:00 ໂມງຂອງວັນທີ 08 ຕຸລາ 2021 ພາຍຸໝຸນເຂດຮ້ອນ ໄລອອນຣອກ (LIONROCK) ມີຈຸດສູນກາງຢູ່ເສັ້ນຂະໜານທີ 17.6 ອົງສາ ເໜືອ ແລະ ເສັ້ນແວງທີ 110.8 ອົງສາຕາເວັນອອກ ພວມເຄື່ອນທີ່ໃນທິດ ເໜືອ-ຕາເວນຕົກສ່ຽງເໜືອ ໄປຫາເກາະໄຮໜໍາຢ່າງຊ້າໆ ຄາດຄະເນວ່າ ພາຍຸຫົວນີ້ຈະສືບຕໍ່ເຄື່ອນທີ່ຂຶ້ນຝັ່ງທາງພາກເໜືອປະເທດ ໃນໄລຍະວັນທີ 09 ຫາ 10 ຕຸລາ 2021
ຫລັງຈາກຈະອ່ອນກໍາລັງເປັນພາຍຸດີເປລຊັນ ແລະ ເຄື່ອນທີ່ຜ່ານພາກເໜືອ ແລະ ພາກກາງຂອງປະເທດລາວ ໃນໄລຍະວັນທີ 10 ຫາ 11 ຕຸລາ 2021 ນີ້, ຊຶ່ງຈະເຮັດໃຫ້ມີຝົນຕົກໃນລະດັບປານກາງ ຫາ ໜັກ ພ້ອມມີລົມພັດແຮງຢູ່ບາງທ້ອງຖິ່ນ ເຊັ່ນ: ແຂວງຜົ້ງສາລີ, ຫົວພັນ, ຊຽງຂວາງ, ຫລວງນໍ້າທາ, ອຸດົມໄຊ, ບໍ່ແກ້ວ, ຫລວງພະບາງ, ໄຊຍະບູລີ, ນະຄອນຫລວງວຽງຈັນ, ໄຊສົມບູນ, ບໍລິຄໍາໄຊ, ຄໍາມ່ວນ ແລະ ສະຫວັນນະເຂດ ຈະເຮັດໃຫ້ເກີດມີຕົ້ນໄມ້ຫັກລົ້ມ, ຫລັງເຮືອນເປ່ເພ, ນໍ້າຖ້ວມອັ່ງ ແລະ ນໍ້າຖ້ວມຍຶ່ງ ໃນໄລຍະວັນທີ 10 ຫາ 12 ຕຸລາ 2021 ນີ້
ດັ່ງນັ້ນ, ຈຶ່ງແຈ້ງເຕືອນເຖິງອໍານາດການປົກຄອງທຸກພາກສ່ວນ ແລະ ປະຊາຊົນບັນດາເຜົ່າທີ່ອາໄສຢູ່ບັນດາແຂວງດັ່ງກ່າວ ໂດຍສະເພາະ ຜູ້ທີ່ອາໄສຢູ່ລຽບຕາມຮ່ອມພູ, ເປີ້ນພູ ແລະ ແຄມແມ່ນ້ໍາຕ່າງໆ ຈົ່ງມີສະຕິ ລະມັດລະວັງຕໍ່ສະພາບດິນເຈື່ອນ, ນໍ້າຖ້ວມຊຸ, ນ້ຳຖ້ວມຍື່ງ ແລະ ລົມພັດ ແຮງ ທີ່ຈະເກີດຂຶ້ນໃນໄລຍະນີ້, ພ້ອມທັງກະກຽມຍົກຍ້າຍສິ່ງຂອງ, ວັດຖຸ ທີ່ມີຄ່າ ແລະ ສັດລ້ຽງໄປໄວ້ບ່ອນທີ່ສູງ, ປອດໄພ ແລະ ຂໍໃຫ້ຕິດຕາມຂ່າວ ພະຍາກອນອາກາດ ຈາກກົມອຸຕຸນິຍົມ ແລະ ອຸທົກກະສາດ ຢ່າງຕໍ່ເນື່ອງ.
.
ຂໍໃຫ້ທຸກຄົນມີສະຕິລະວັງຕົວເດີ
