ປີ 2020 ຜ່ານມາ ທົ່ວປະເທດມີອັກຄີໄພເກີດຂຶ້ນທັງ ໝົດ 203 ຄັ້ງ, ມູນຄ່າການເສຍຫາຍທັງໝົດ 143.751.000.000 ກີບ ເຮັດໃຫ້ມີຜູ້ເສຍຊີວິດ 14 ຄົນ, ບາດເຈັບ 13 ຄົນ, ເຮືອນຖືກໄຟໄໝ້ 115 ຫລັງ, ເຮືອນຖືກໄຟລວກ 29 ຫລັງ, ເຮືອນຄົວ 4 ຫລັງ, ໂຮງງານ 3 ແຫ່ງ, ໂຮງເຟີນີເຈີ 2 ຫລັງ, ຕະຫລາດ 1 ແຫ່ງ, ຫໍພັກ 10 ຫ້ອງ, ລົດໃຫຍ່ 30 ຄັນ ແລະ ອື່ນໆ.
ພັນໂທ ສຸລິສັກ ສິມມະໂນໄຕ, ຮອງຫົວໜ້າກົມຕຳຫລວດສະກັດກັ້ນ ແລະ ຕ້ານອັກຄີໄພ, ກະຊວງປ້ອງກັນຄວາມສະຫງົບ ໃຫ້ສໍາພາດວ່າ: ຈຳນວນອັກ ຄີໄພທີ່ເກີດຂຶ້ນໃນປີ 2020 ທຽບໃສ່ປີ 2019 ຜ່ານມາ ແມ່ນຫລຸດລົງ 24 ຄັ້ງ ແຕ່ມູນຄ່າການເສຍຫາຍເພີ່ມຂຶ້ນ 89.369.000.000 ກີບ ຍ້ອນສະຖານ ທີ່ເກີດອັກຄີໄພເປັນໂຮງງານ, ຕະຫລາດ, ສາງເຄື່ອງ ແລະ ອື່ນໆ ທີ່ມີມູນຄ່າສູງ. ໃນນີ້ ເກີດຂຶ້ນຫຼາຍກວ່າໝູ່ແມ່ນຢູ່ນະຄອນຫລວງວຽງຈັນ ຈຳນວນ 57 ຄັ້ງ.
ສ່ວນສາເຫດຂອງການເກີດອັກຄີໄພຫລາຍກວ່າໝູ່ແມ່ນໄຟຟ້າລັດວົງຈອນ 97 ຄັ້ງ, ເລິ້ນເລີ້ຂາດສະຕິ 45 ຄັ້ງ ( ໄຕ້ທູບທຽນບູ ຊາ 14 ຄັ້ງ, ໄຕ້ທຽນເຍືອງແສງສະຫວ່າງ 1 ຄັ້ງ, ດັງໄຟແຕ່ງກັນ 7 ຄັ້ງ…..). ນອກຈາກນີ້ ແມ່ນຄົນຈູດ 20 ຄັ້ງ, ຜິດ ພາດທາງເຕັກນິກ 2 ຄັ້ງ, ຍ້ອນການລະເບີດຂອງວັດຖຸລະ ເບີດ ແລະ ອື່ນໆ. ສໍາລັບອັກຄີໄພທີ່ເກີດຂຶ້ນ ແລະ ສ້າງຄວາມເສຍຫາຍຫລາຍກວ່າໝູ່ແມ່ນເຫດການໄຟໄໝ້ໂຮງງານຈໍາປາແດງຂາເຂົ້າ-ຂາອອກ ຈຳກັດຜູ້ດຽວຢູ່ບ້ານສົມສະອາດ, ເມືອງຄົງເຊໂດນ, ແຂວງສາລະວັນ ໃນເວລາ 8 ໂມງ 40 ນາທີ ມູນຄ່າການເສຍຫາຍເຖີງ 38.472.700.000 ກີບ ສາເຫດແມ່ນຍ້ອນຄົນຈູດ.
ຮອງຫົວໜ້າກົມຕຳຫລວດສະກັດກັ້ນ ແລະ ຕ້ານອັກຄີ ໄພ ຍັງໃຫ້ຮູ້ກ່ຽວກັບການກະກຽມຮັບໃຊ້ການເລືອກຕັ້ງສະມາຊິກສະພາແຫ່ງຊາດ ຊຸດທີ IX ແລະ ການເລືອກຕັ້ງສະມາຊິກສະພາປະຊາຊົນຂັ້ນແຂວງ ຊຸດທີ II ທີ່ຈະຈັດຂຶ້ນພ້ອມກັນທົ່ວປະເທດໃນັວນທີ 21 ກຸມພາ 2021 ວ່າ: ກົມຕຳຫລວດສະກັດກັ້ນ ແລະ ຕ້ານອັກຄີໄພ ໄດ້ອອກແຈ້ງການແນະນໍາໃຫ້ຂະແໜງການກ່ຽວຂ້ອງຢູ່ແຕ່ລະແຂວງທົ່ວປະເທດກະກຽມດ້ານອຸປະກອນ, ພາຫະນະ, ຈຳ ນວນພົນ ແລະ ອື່ນໆ ໃຫ້ກຽມພ້ອມຕະຫລອດ 24 ຊົ່ວ ໂມງ ໂດຍເອົາໃຈໃສ່ເປັນພິເສດຕໍ່ຈຸດສ່ຽງຈະເກີດອັກຄີໄພ ໂດຍສະເພາະເຂດຊຸມຊົນແອອັດຕ່າງໆ. ພ້ອມນີ້ ທ່ານຍັງໄດ້ຮຽກຮ້ອງມາຍັງທຸກຄົນໃນທົ່ວປະເທດ, ນັບທັງຊາວຕ່າງປະເທດທີ່ອາໃສຢູ່ລາວ ຈົ່ງເພີ່ມສະຕິເອົາໃຈໃສ່ສະກັດກັ້ນ ແລະ ຕ້ານອັກຄີໄພໃຫ້ສູງຂຶ້ນກວ່າເກົ່າ ເພາະໄລຍະນີ້ແມ່ນຢູ່ໃນໄລຍະຍາມແລ້ງທີ່ອາກາດແຫ້ງເຊີ່ງອາດຈະເຮັດໃຫ້ເກີດອັກຄີໄພໄດ້ງ່າຍ. ສະນັ້ນ ການຊົມໃຊ້ໄຟຟ້າ ແລະ ໄຟດັງ ຕ້ອງເອົາໃຈໃສ່ເປັນພິເສດ ເພື່ອຮັບປະກັນບໍ່ໃຫ້ມີອັກຄີໄພເກີດຂຶ້ນ.
ພາບ: ບຸນຕຽງ ຈັນທະວົງພາບ: ພັກສະຫວັນ
