ຫຼວງພະບາງ: ວັນທີ່ 11 ກັນຍາ 2020 ຜ່ານມາ ທ່ານ ສອນໄຊ ສີພັນດອນ ຮອງນາຍົກລັດຖະມົນຕີ ພ້ອມຄະນະ ໄດ້ລົງເຄື່ອນໄຫວຢຽມຢາມ ແລະ ຊຸກຍູ້ວຽກງານທ່ອງທ່ຽວ ຢູ່ຕາດຮ້ອຍຄົວ ເມືອງຈອມເພັດ ແຂວງຫລວງພະບາງ.
![](https://pakaad.com/wp-content/uploads/2020/09/fb_img_16002451153976797684432706650961.jpg)
ນໍ້າຕົກຕາດຮ້ອຍຄົວ ຕັ້ງຢູ່ບ້ານປາກຫຼຶງ ຫາງຈາກເທດສະ ບານເມືອງຈອມເພັດ ປະມານ 12 ກິໂລແມັດ ເປັນນໍ້າຕົກຕາດທີ່ມີຄວາມສວຍງາມ ແລະມີຕາດນ້ອຍຫຼາຍຊັ້ນ ທີ່ມີນໍ້າໃສ່ໄຫຼເຢັນຕະຫຼອດປີ ມີຄວາມສູງ 90 ແມັດ ຕົກລົງໃສ່ອ່າງເກັບນໍ້າທໍາມະຊາດທີ່ສະຫວັນສ້າງມາຢ່າງງາມຕາ, ມີເນືອທີ 20 ເຮັກຕາ ແລະເຕັມໄປດ້ວຍພູຜາ ປ່າໄມ້ທີ່ໃຫ້ຄວາມສົດຊື່ນເຢັນສະບາຍ.
![](https://pakaad.com/wp-content/uploads/2020/09/fb_img_16002451176351741884671337277468.jpg)
ມາຮອດປີ 2015 ອົງການປົກຄອງເມືອງ ໄດ້ມອບໃຫ້ບໍລິສັດສໍາປະທານ ໂດຍໄດ້ປັບປຸງຫຼາຍກິດຈະກຳ ແນໃສ່ດຶງ ດູດເອົານັກທ່ອງທ່ຽວທັງພາຍໃນ ແລະຕ່າງປະເທດ ໃຫ້ເຂົ້າມາທ່ຽວຊົມຫຼາຍຂື້ນ ໃນນັ້ນ ໄດ້ປັບປຸງທາງຍ່າງ, ບໍລິ ການຮ້ານອາຫານ, ສວນດອກໄມ້, ກິດຈະກຳຍ່າງປ່າ, ຂີ່ສະລິງ ແລະອື່ນໆ, ມາຮອດທ້າຍປີ 2019 ເຖີງປະຈຸບັນ ຍ້ອນສະພາບການລະບາດຂອງພະຍາດ ໂຄວິດ 19 ໄດ້ສົ່ງຜົນກະທົບຕໍ່ການທ່ອງທ່ຽວ ແລະເຮັດໃຫ້ແຂກທີ່ເຂົ້າມາທ່ຽວຊົມນ້ຳຕົກຕາດຮ້ອຍຄົວ ນັບມື້ແມ່ນລຸດລົງ.
![](https://pakaad.com/wp-content/uploads/2020/09/fb_img_16002453801006164075307552017762.jpg)
ໃນແຜນ ການຕໍ່ໜ້າຈະສືບຕໍ່ປັບປຸງ ແລະປົກປັກຮັກສາສະຖານທີ່ທ່ອງທ່ຽວແຫຼ່ງນີ້ ໃຫ້ມີຄວາມສວຍງາມ, ຍືນຍົງ ແລະສີຂຽວ ເພື່ອດຶງດູດເອົານັກທ່ອງທ່ຽວຄົນລາວມາທ່ຽວຕາມແຜນທີີ່ກະຊວງ ຖວທ ວາງໄວ້ຄື ລາວທ່ຽວລາວ.
![](https://pakaad.com/wp-content/uploads/2020/09/fb_img_16002451209878238583199822466615.jpg)
ທ່ານ ສອນໄຊ ສີພັນດອນ ໄດ້ເນັ້ນໃຫ້ບໍລິສັດສຳປະທານ ສືບຕໍ່ປົກປັກຮັກສາປ່າໄມ້ ໃນແຫຼ່ງທ່ອງທ່ຽວຕາດຮ້ອຍຄົວ ໃຫ້ມີຄວາມຍືຍຍົງ, ສືບຕໍ່ປັບປຸງກິດຈະກໍາໃຫ້ສອດຄ່ອງຮັກສາໄດ້ຄວາມສວຍງາມ ທີ່ມີອາກາດສົດຊື່ນ ເພື່ອຮັບປະກັນເຮັດໃຫ້ການດຶງດູດເອົາ ນັກທ່ອງທ່ຽວເຂົ້າມາທ່ຽວຊົມໃນັບມື້ຫຼາຍຂື້ນ.
![](https://pakaad.com/wp-content/uploads/2020/09/fb_img_16002453997762747131217382964849-767x1024.jpg)
ລາຍງານໂດຍ: ແຫຼ້ ສຸລີນພອນ