ແຂວງຫົວພັນ: ໃນວັນທີ 4 ກັນຍາ 2020, ທ່ານ ຄໍາມະນີ ອິນທິລາດ ລັດຖະມົນຕີ ກະຊວງພະລັງງານ ແລະ ບໍ່ແຮ່, ທ່ານ ຈະເລີນ ເຢຍປາວເຮີ ລັດຖະມົນຕີ ປະຈໍາສໍານັກງານນາຍົກລັດຖະມົນຕີ ພ້ອມດ້ວຍການນໍາຈາກກະຊວງກ່ຽວຂ້ອງ ແລະ ການນໍາ ແຂວງຫົວພັນ ໄດ້ລົງຢ້ຽມຢາມ ຕິດຕາມຊຸກຍູ້ໂຄງການກໍ່ສ້າງເຂື່ອນໄຟຟ້ານໍ້າຮາວ, ຕັ້ງຢູ່ເມືອງສົບບາວ ແຂວງຫົວພັນ; ໂດຍໃຫ້ກຽດຕ້ອນຮັບຂອງທ່ານ ຄໍາຜາຍ ສີລາຊາ ປະທານ ບໍລິສັດ ກຸ່ມດວງຈະເລີນພັດທະນາກໍ່ສ້າງຈໍາກັດຜູ້ດຽວ, ທັງເປັນປະທານ ບໍລິສັັດນໍ້າຮາວຈະເລີນພາວເວີ ຈໍາກັດ.
ໃນໂອກາດການລົງຢ້ຽມຢາມຄັ້ງນີ້, ທ່ານ ຄໍາຜາຍ ສີລາຊາ ໄດ້ລາຍງານຄວາມຄືບໜ້າ ແລະ ສໍາເລັດຂອງໂຄງການວ່າ: ໂຄງການເຂື່ອນໄຟຟ້ານໍ້າຮາວ ມີກໍາລັງການຜະລິດ ສູງສຸດແມ່ນໄດ້ 22 ເມກາວັດໃນລະດູຝົນ ແລະ ຕໍ່າສຸດແມ່ນ 9 ເມກາວັດ ໃນລະດູແລ້ງ, ມີມູນຄ່າການກໍ່ສ້າງທັງໜົດ 40 ກວ່າລ້ານ ໂດລາສະຫະລັດ ໂດຍການລົງທຶນຂອງບໍລິສັັດນໍ້າຮາວຈະເລີນພາວເວີ ຈໍາກັດຜູ້ດຽວ 100%. ດ້ານການອອກແບບເຂື່ອນແມ່ນ ບໍລິສັດເອນທູລາ.
ການກໍ່ສ້າງໂຄງການ ແມ່ນມີຂໍ້ສະດວກຫລາຍດ້ານ ເປັນຕົ້ນແມ່ນ ໄດ້ຮັບການຮ່ວມມືບ້ານ, ເມືອງ, ແຂວງຫົວພັນ ແລະ ກະຊວງ ທີ່ກ່ຽວຂ້ອງ, ຈຶ່ງເຮັດໃຫ້ໂຄງການສໍາເລັດເປັນກ້າວໆມາ ແລະ ຄາດວ່າຈະໃຫ້ສໍາເລັດສົມບູນ ຕາມສັນຍາຊື້-ຂາຍໄຟ ກັບໄຟຟ້າລາວ (COD) ໃນເດືອນ ສິງຫາ 2021 ທີ່ຈະມາເຖິງນີ້.
ພາຍຫລັງໄດ້ຮັບຟັງການລາຍງານ ຂອງບໍລິສັດ ແລ້ວ, ທ່ານ ຄໍາມະນີ ອິນທິລາດ ລັດຖະມົນຕີ ກະຊວງພະລັງງານ ແລະ ບໍ່ແຮ່ ກໍໄດ້ສະແດງຄວາມຍ້ອງຍໍຊົມເຊີຍ ຕໍ່ຜົນສໍາເລັດຂອງບໍລິສັັດ ທີ່ໄດ້ເອົາໃຈໃສ່ກໍ່ສ້າງ ແລະ ທຸ່ມເທທຶນຮອນ ເຂົ້າໃສ່ໂຄງການໃຫ້ມີຜົນສໍາເລັດ ແລະ ໃຫ້ໄດ້ຈໍາໜ່າຍກະແສໄຟຟ້າ ສະໜອງໃຫ້ແກ່ການຊົມໃຊ້ໃນບ້ານເຮືອນ, ການຜະລິດກະສິກໍາ, ອຸດສາຫະກໍາ ພາຍໃນບັນດາເມືອງ ຂອງແຂວງຫົວພັນ ແລະ ເປັນການປະກອບສ່ວນເຂົ້າໃນການພັດທະນາ ແລະ ສ້າງສາປະເທດຊາດ ຂອງບໍລິສັດ.
ແຫລ່ງຂ່າວ: ກະຊວງພະລັງງານ ແລະບໍ່ແຮ່
.
