ພະແນກສຶກສາທິການ ແລະ ກິລາແຂວງຫຼວງພະບາງໄດ້ຈັດສອບເສັງຄັດເລືອກນັກຮຽນໄປຮຽນຕໍ່ວິຊາຊີບໃນລະດັບຕ່າງໆທີ່ ສສ ຫວຽດນາມ ແລະ ສປ ຈີນ ປະຈຳສົກຮຽນ 2020-2021 ເມື່ອວັນທີ 6 ສິງຫາ 2020 ທີ່ໂຮງຮຽນມັດທະຍົມສົມບູນສັນຕິພາບ ນະຄອນຫຼວງພະບາງ,ແຂວງຫຼວງພະບາງ
ໂດຍການໃຫ້ຊີ້ນໍາ ແລະ ເປັນກຽດຕັດຊອງຫົວບົດສອບເສັງຂອງ ທ່ານ ຊາຍສະຫວັນ ຈັນມານິດ ຮັກສາການຫົວໜ້າພະແນກສຶກສາທິການ ແລະ ກິລາແຂວງຫຼວງພະບາງ, ເຂົ້າຮ່ວມມີຄະນະພະແນກ, ຫົວໜ້າ-ຮອງຫົວໜ້າຂະແໜງອະຊີວະສຶກສາ ແລະ ການສຶກສາຊັ້ນສູງ,ພ້ອມດ້ວຍ ພະນັກງານ ວິຊາການ,ຄະນະກຳມະການຮັບຜິດຊອບ, ກຳມະການເຝົ້າຫ້ອງ ແລະ ນັກສອບເສັງເຂົ້າຮ່ວມ.
ການຈັດການສອບເສັງຄັ້ງນີ້ແມ່ນເພື່ອເປັນການຄັດເລືອກເອົານັກຮຽນທີ່ຮຽນຈົບຊັ້ນມັດທະ ຍົມປາຍ ມ.7 ເຂົ້າຮຽນຕໍ່ວິຊາຊີບໃນລະດັບຕ່າງໆຢູ່ ສສ ຫວຽດນາມ ແລະ ສປ ຈີນປະຈຳສົກຮຽນ 2020-2021 ເຊີ່ງມີນັກສອບເສັງເຂົ້າຮ່ວມທັງໝົດ 426 ຄົນ, ຍິງ 170 ຄົນ, ມີຫ້ອງສອບເສັງ 22 ຫ້ອງ, ແຕ່ລະຫ້ອງມີອະນຸກຳມະການເຝົ້າຫ້ອງ 2 ທ່ານ ແລະ ໄດ້ກຳນົດສອບເສັງໃນ 4 ວິຊາຄື: ພະສາລາວ-ວັນນະຄະດີ, ຄະນິດສາດ, ຊີວະສາດ ແລະ ພູມສາດ,
ໂດຍຈະບັນຈຸເຂົ້າບັນດາແຂວງທີ່ໃຫ້ທຶນຄື: ແຂວງ ທ້າຍຫງວ່ຽນ ສສ ຫວຽດນາມ ປະກອບມີ 8 ສາຂາວິຊາຮຽນໃນລະບົບຊັ້ນສູງ, ດ່ຽນບ່ຽນ 6 ສາຂາວິຊາ(ລະບົບຊັ້ນສູງ), ເຊີນລາ 20 ສາຂາວິຊາ ລະບົບປະລິຍາຕີ ແລະ 18 ສາຂາວິຊາ ຊັ້ນສູງ, ສ່ວນ ສປ ຈີນ ແຂວງເສສວນ ປະກອບມີ 11 ສາຂາວິຊາຮຽນ(ລະບົບຊັ້ນສູງ), ວິທະຍາໄລເຕັກນິກເລີຊານ ມີ 40 ທຶນໃນນັ້ນ ໃນແຜນ 20 ທຶນ,ນອກແຜນ 20 ທຶນ, ຊຸຍໂຈ ມີ 2 ສາຂາວິຊາຮຽນໃນນັ້ນຊັ້ນສູງ 46 ທຶນ,ສຳລັບປີກຽມພາສາແມ່ນກຸ້ມຕົນເອງ,
ຖ້າເສັງຜ່ານ 4 G ແມ່ນຈະໄດ້ຮັບທຶນການສຶກສາ, ວິທະຍາໄລນະຄອນ ພູເອີ ມີ 16 ສາຂາວິຊາຮຽນໃນນັ້ນປະລະນຍາຕີ 8 ທຶນ,ຍົກເວັ້ນຄ່າຮຽນ ແລະ ຄ່າຫໍພັກ, ນອກຈາກນີ້ ຍັງມີບາງແຂວງ ຫຼື ສະຖາບັນການສຶກສາຍັງບໍ່ທັນແຈ້ງທຶນການສຶກສາ ເນື່ອງຈາກການແຜ່ລະບາດຂອງພະຍາດ ໂຄວິດ-19 ເຊັ່ນ: ແຂວງກວາງນິງ ສສ ຫວຽດນາມມີ 30 ທຶນ(ປະລິນຍາຕີ), ແຂວງຟູຈ້ຽນ ສປ ຈີນ, ອະຊີວະສຶກສາຊຽງຮຸ່ງກິ່ງສິບສອງພັນນາ 40 ທຶນ(ຊັ້ນກາງ) ແລະ ວິທະຍາໄລເຕັກນິກສິບສອງພັນນາ ສປ ຈີນ.
ໂດຍ: ແຈັກກີ້ ສກຂ ຫຼວງພະບາງ
