ຫ້ອງວ່າການສຳນັກງານນາຍົກລັດຖະມົນຕີ ອອກແຈ້ງການ ເລກທີ 367/ຫສນຍ, ລົງວັນທີ 23 ມິນາ 2022, ກ່ຽວກັບທິດຊີ້ນຳ ການສະເຫລີມສະຫລອງບຸນ ປີໃຫມ່ລາວ ພສ 2565 (ຄສ 2022).
ໃນວັນທີ 23 ມີນາ ນີ້, ຫ້ອງວ່າການສໍານັກງານນາຍົກລັດຖະມົນຕີ(ຫສນຍ) ໄດ້ອອກແຈ້ງການສະບັບເລກທີ 367/ຫສນຍ, ລົງວັນທີ 23 ມີນາ 2022 ນະຄອນຫລວງວຽງຈັນ, ກ່ຽວກັບທິດຊີ້ນຳ ການສະເຫລີມສະຫລອງບຸນປີໃໝ່ລາວ ປີ ຄສ 2565 (ຄສ 2022).
ຫ້ອງວ່າການສໍານັກງານນາຍົກລັດຖະມົນຕີ, ແຈ້ງຜົນຂອງກອງປະຊຸມຊີ້ນຳ ຂອງ ນາຍົກ-ຮອງນາຍົກລັດຖະມົນຕີ ໃຫ້ຊາບວ່າ:
- ເຫັນດີກຳນົດເອົາ ວັນພຸດ ທີ 13 ເມສາ 2022 ເປັນວັນພັກຊົດເຊີຍປີໃໝ່ລາວ ປີ 2022 ທົດແທນວັນເສົາ ທີ 16 ເມສາ ເຊິ່ງເປັນວັນລັດຖະການ.
- ການສະຫລອງປີໃໝ່ຕ້ອງຢູ່ບົນຈິດໃຈ ປະຍັດມັດທະຍັດທີ່ສຸດ ແລະ ບໍ່ໃຫ້ສຳນັກງານ ອົງການ ຂັ້ນສູນກາງ ແລະ ທ້ອງຖິ່ນ ຈັດງານລ້ຽງສະຫລອງປີໃໝ່ ແລະ ອວຍພອນກັນຢ່າງເດັດຂາດ ເພື່ອເປັນແບບຢ່າງໃຫ້ແກ່ສັງຄົມ.
ພ້ອມທັງມອບໃຫ້ຄະນະສະເພາະກິດ Covid-19 ຂັ້ນສູນກາງ, ຄະນະສະເພາະກິດນະຄອນຫລວງວຽງຈັນ ແລະ ບັນດາແຂວງໃນຂອບເຂດທົ່ວປະເທດ ເປັນຜູ້ຕົກລົງ ແລະ ອອກແຈ້ງການແນະນຳລະອຽດ ເພື່ອໃຫ້ທຸກພາກສ່ວນທີ່ກ່ຽວຂ້ອງຮັບຊາບ ແລະ ຈັດຕັ້ງປະຕິບັດຕາມມາດຕະການຕ່າງໆ ໃນການປ້ອງກັນກາລະບາດຂອງພະຍາດໂຄວິດ-19 ໃນໄລຍະການສະຫລອງບຸນປີໃໝ່ ລາວ ໂດຍອີງໃສ່ສະພາບການລະບາດຂອງແຕ່ລະບ່ອນ.
.
.
