ກະຊວງສຶກສາທິການ ແລະ ກິລາຕາງໜ້າໂດຍພະແນກສຶກສາທິການ ແລະ ກິລາແຂວງຫຼວງພະບາງ ແລະ ໂຄງການໂອກາດດ້ານການສຶກສາລາວ( Lao Educational Opportunities Trust ) ໄດ້ຈັດພິທິຮ່ວມເຊັນບົດບັນທຶກຄວາມເຂົ້າໃຈໄລຍະ III ເມື່ອວັນທີ 5 ກໍລະກົດ 2021 ທີ່ພະແນກສຶກສາທິການ ແລະ ກິລາແຂວງຫຼວງພະບາງ.
ໂດຍການລົງນາມເຊັນຮ່ວມຂອງທ່ານ ປອ ວົງເພັດ ອຸດົມລິດ ຫົວໜ້າພະແນກສຶກສາທິການ ແລະ ກິລາແຂວງຫຼວງພະບາງ, ທ່ານ ບຸນໜຽວ ສົມສັກ ຜູ້ປະສານງານໂຄງການລີອ໊ອດປະຈໍາ ສປປ ລາວ ໃຫ້ກຽດເຂົ້າຮ່ວມມີ ຕາງໜ້າຈາກກະຊວງສຶກສາທິການ ແລະ ກິລາ, ກົມ-ຮອງກົມ, ຕາງໜ້າຫ້ອງວ່າການປົກຄອງເເຂວງ, ເຈົ້າເມືອງ-ຮອງເຈົ້າເມືອງ,ຫົວໜ້າ-ຮອງຫົວໜ້າຂະແໜງ,ພະນັກງານໂຄງການ ພ້ອມດ້ວຍແຂກຖືກເຊີນກ່ຽວຂ້ອງເຂົ້າຮ່ວມ.
ທ່ານ ນາງ ນາລີ ແພງພົມມີ ຮອງຫົວໜ້າພະແນກສົນທິສັນຍາ ແລະ ຮ່ວມມືສາກົນ ກົມພົວພັນການຕ່າງປະເທດກະຊວງສຶກສາທິການ ແລະ ກິລາ ໄດ້ຜ່ານຂໍ້ຕົກລົງຂອງກະຊວງການຕ່າງປະເທດວ່າດ້ວຍການຕົກລົງອະນຸມັດຮັບເອົາໂຄງການຊ່ວຍເຫຼືອລ້າຈາກອົງການລີອ໊ອດ ປະຈຳ ສປປ ລາວ ໂຄງການໂອກາດດ້ານການສຶກສາລາວ ໄລຍະ III ເຊີ່ງປະກອບມີ 4 ເມືອງຂອງແຂວງຫຼວງພະບາງຄື: ນະຄອນ-ຫຼວງພະບາງ, ເມືອງຈອມເພັດ, ເມືອງປາກອູ ແລະ ເມືອງນໍ້າບາກ, ຜ່ານໃບມອບສິດຂອງລັດຖະມົນຕີກະຊວງສຶກສາທິການ ແລະ ກິລາວ່າດ້ວຍການມອບສິດໃຫ້ພະະແນກສຶກສາທິການ ແລະ ກິລາແຂວງຫຼວງພະບາງຕາງໜ້າກະຊວງສຶກສາທິການ ແລະ ກິລາເປັນຜູ້ເຊັນບົດບັນທຶກຄວາມເຂົ້າໃຈຮ່ວມອົງການລີອ໊ອດ ປະຈໍາ ສປປ ລາວກ່ຽວກັບໂຄງການໂອກາດດ້ານການສຶກສາລາວໄລຍະ III.
ໂຄງການໂອກາດດ້ານການສຶກສາລາວ( Lao Educational Opportunities Trust )ໄລຍະ III ເປັນໂຄງການທີ່ເປີດໂອກາດໃຫ້ຜູ້ທີ່ດ້ອຍໂອກາດໄດ້ເຂົ້າເຖິງການສຶກສາຂັ້ນສູງ, ວິຊາຊີບ, ມີວຽກເຮັດງານທຳ, ຍົກລະດັບພາສາອັງກິດໃຫ້ພະນັກງານຕາມຄວາມຮຽກຮ້ອງຕ້ອງການຂອງໜ້າວຽກໃນໄລຍະໃໝ່ ແລະ ເພື່ອໃຫ້ສະພາບແວດລ້ອມການຮຽນ-ການສອນ, ການດໍາລົງຊີວິດປະຈໍາວັນໃນເຂດຊົນນະບົດຫ່າງໄກສົກຫຼີກໄດ້ຮັບການປັບປຸງດີຂື້ນ. ເຊີ່ງໂຄງການດັ່ງກ່າວ, ຈະໄດ້ສືບຕໍ່ໃນໄລຍະ III ນີ້ແມ່ນເລີ່ມແຕ່ ເດືອນ ກໍລະກົດ 2021 ຫາ ເດືອນ ກໍລະກົດ 2023.
ໂດຍ: ແຈັກກີ້ ສກຂ ຫຼວງພະບາງ
