ນັກຮຽນ ມສ ວຽງຈັນ ຮັບຮູ້ເຖິງຜົນຮ້າຍຂອງຢາເສບຕິດ

ໃນວັນທີ 29 ມີນາ 2021, ໜ່ວຍງານໂຄສະນາ ພະແນກກວດກາ ແລະ ຄວບຄຸມຢາເສບຕິດ ຫ້ອງຕໍາຫຼວດ ປກສ ນວ, ໄດ້ສົມທົບກັບຫ້ອງການກວດກາ ແລະ ຄວບຄຸມຢາເສບຕິດ ກົມໃຫຍ່ຕໍາຫຼວດ ກະຊວງ ປກສ ລົງໂຄສະນາເຜີຍແຜ່ຜົນຮ້າຍ ແລະ ໄພອັນຕະລາຍຂອງຢາເສບຕິດ, ຜົນກະທົບຂອງຢາສູບໄຟຟ້າ-ຊີຊ່າ ແລະ ປຸມເປົ້າອັດແກັສໄນຕັດ N2O ຢູ່ຫ້ອງປະຊຸມຂອງໂຮງຮຽນ ໃຫ້ນັກຮຽນຊັ້ນມັດທະຍົມສຶກສາ ມສ ວຽງຈັນ ເພື່ອເປັນການສະກັດກັ້ນບໍ່ໃຫ້ນ້ອງນັກຮຽນໄປພົວພັນກັບສິ່ງເສບຕິດ,

ໂດຍໃຫ້ກຽດເປັນປະທານ ຂອງ ພັທ ປານີ ສຸກສະຫວັດ ຫົວໜ້າພະແນກກວດກາ ແລະ ຄວບຄຸມຢາເສບຕິດ ຫ້ອງຕໍາຫຼວດ ປກສ ນວ, ມີ ພັທ ນາງ ຄໍາກອງ ເພັດຊົມພູ ຫົວໜ້າພະແນກໂຄສະນາ ກົມໃຫຍ່ຕໍາຫຼວດ ກະຊວງ ປກສ ແລະ ໃຫ້ກຽດເຂົ້າຮ່ວມໂດຍທ່ານ ອຈ ທອງພັນ ອຸໄລທອນ ອໍານວຍການໂຮງຮຽນມສ ວຽງຈັນ ມີຄູ-ອາຈານ ແລະ ນ້ອງນັກຮຽນຈໍານວນ 181 ຄົນ, ຍິງ 57 ຄົນຮັບຟັງ.

.

ໃນການເຜີຍແຜ່ ຮອ ແສງປະເສີດ ສຸວັນດອນ ຮອງຫົວໜ້າໜ່ວຍງານ ໂຄສະນາ ພະແນກກວດກາ ແລະ ຄວບຄຸມຢາເສບຕິດ ໄດ້ອະທິບາຍໃຫ້ນ້ອງນັກຮຽນຮູ້ເຖິງຜົນຮ້າຍ ແລະ ໄພອັນຕະລາຍຂອງຢາເສບຕິດ, ຜົນກະທົບຂອງຢາສູບໄຟຟ້າ-ຊີຊ່າ ແລະ ປຸມເປົ້າອັດແກັສໄນຕັດ N2O

ໂດຍສະເພາະແມ່ນມີຜົນກະທົບຕໍ່ຜູ້ເສບ ເມື່ອເສບເຂົ້າໄປແລ້ວຈະເກີດອັນຕະລາຍຕໍ່ຈິດປະສາດ, ເຮັດໃຫ້ສະໝອງຖືກທໍາລາຍ ເປັນບ້າເສຍຈິດ, ມັກໃຊ້ຄວາມຮຸນແຮງທໍາລາຍຕົນເອງ ແລະ ຄົນອ້ອມຂ້າງ; ທັງເຮັດໃຫ້ຄອບຄົວບໍ່ມີຄວາມສະຫງົບສຸກ ແລະ ກໍ່ໃຫ້ເກີດສິ່ງຫຍໍ້ທໍ້ໃນສັງຄົມ ສິ່ງສໍາຄັນຖ້າຫາກເສບຢາເສບຕິດເຂົ້າໄປຫຼາຍອາດເຮັດໃຫ້ເສຍຊີວິດໄດ້, ສ່ວນຄົນຂາຍ ແມ່ນຖືກຈັບດໍາເນີນຄະດີຮັບໂທດຕາມກົດໝາຍ.

ນາງ ເພັດ ມະໂນລິນ ປັນຍາວິສະຈິດ ນັກຮຽນຊັ້ນ ມ 7 / 12 ຂອງໂຮງຮຽນມສ ວຽງຈັນ ໄດ້ກ່າວວ່າ: ພາຍຫຼັງທີ່ໄດ້ຮັບຟັງການເຜີຍແຜ່ກົດໝາຍວ່າດ້ວຍຢາເສບຕິດ ແລະ ຜົນຮ້າຍຂອງຢາເສບຕິດແລ້ວຈາກເຈົ້າໜ້າທີ່ໜ່ວຍງານໂຄສະນາພະແນກກວດກາ ແລະ ຄວບຄຸມຢາເສບຕິດ ນ້ອງເອງສາມາດຮັບຮູ້ໄດ້ເຖິງຜົນຮ້າຍ ແລະ ຜົນເສຍຂອງຢາເສບຕິດ ຖ້າຫາກຜູ້ໃດຫາກເສບຢາເສບຕິດເຂົ້າໄປ ມັນຈະເຂົ້າໄປທໍາລາຍຮ່າງກາຍຂອງຄົນເຮົາ, ເຮັດໃຫ້ຮ່າງກາຍຈ່ອຍຜ່ອມ, ເປັນບ້າເສຍຈິດ ແລະ ສ້າງຄວາມວຸ້ນວາຍໃຫ້ກັບຄອບຄົວ,

ເຮັດໃຫ້ເກີດມີສິ່ງຫຍໍ້ທໍ້ເປັນຕົ້ນແມ່ນ: ຂີ້ລັກ-ງັດແງະ, ປຸ້ນຈີ້-ຊີງຊັບ, ອາລະວາດຕີກັນ ແລະ ອື່ນໆ; ສິ່ງທີ່ໄດ້ຮັບຟັງໃນມື້ນີ້, ນ້ອງເອງຈະນໍາເອົາໄປເຜີຍແຜ່ບອກຕໍ່ໝູ່ເພື່ອນ ແລະ ອ້າຍ, ເອື້ອຍນ້ອງໃນຄອບຄົວຂອງຕົນ, ເພື່ອໃຫ້ມີສະຕິບໍ່ໃຫ້ໄປພົວພັນກັບສິ່ງເສບຕິດ ເພາະມັນເປັນສິ່ງທີ່ບໍ່ດີ ເຮັດໃຫ້ສັງຄົມບໍ່ມີຄວາມສະຫງົບ.