“ວັນໄຊ ວົງສາ” ພະນັກງານຄູສອນ ຜູ້ທີ່ມີຄວາມຫ້າວຫັນ ແລະ ຍຶດໝັ້ນຕໍ່ອຸດົມການຂອງຄວາມເປັນຄູ ເພາະຄູຄືແມ່ພິມຂອງຊາດ ພ້ອມທັງໄດ້ປະກອບສ່ວນເຂົ້າໃນການເຄື່ອນໄຫວທຸກວຽກງານທັງວຽກພັກ, ວຽກລັດ ແລະ ວຽກສາມອົງການຈັດຕັ້ງມະຫາຊົນຢ່າງເຕັມເມັດເຕັມໜ່ວຍ ແລະ ເປັນຄູອີກຜູ້ໜຶ່ງທີ່ສ້າງຜົນງານທາງດ້ານວິຊາສະເພາະໄດ້ຢ່າງໂດດເດັ່ນ ເປັນຕົ້ນແມ່ນໄດ້ສ້າງສັນຜົນງານທາງດ້ານການແຕ້ມຮູບສີນ້ຳມັນ, ສີອາຄີລິກ ແລະ ສີນ້ຳ ໄດ້ປະມານ 120 ຜົນງານ ແລະ ໄດ້ເຂົ້າຮ່ວມວາງສະແດງຜົນງານທັງພາຍໃນ ແລະ ຕ່າງປະເທດ ຫຼາຍກວ່າ 30 ຜົນງານ ຊຶ່ງສາມາດສ້າງແຮງບັນດານໃຈໃຫ້ກັບມະຫາຊົນ ແລະ ສັງຄົມ ໄດ້ເປັນຢ່າງດີ ຈົນໄດ້ຮັບການຍ້ອງຍໍຈາກການຈັດຕັ້ງ ແລະ ຂັ້ນເທິງຢ່າງຫຼວງຫຼາຍ ຕະຫຼອດ 15 ປີ ຜ່ານມາ.

ສະຫາຍ ວັນໄຊ ວົງສາ ສະມາຊິກພັກ ໜ່ວຍພັກຮາກຖານວິທະຍາໄລສິລະປະສຶກສາ, ຫົວໜ້າໜ່ວຍງານສົ່ງເສີມວິຊາການ ໄດ້ໃຫ້ສຳພາດຕໍ່ນັກຂ່າວໜັງສືພິມສຶກສາ-ກິລາ ລາຍວັນ ເນື່ອງໃນໂອກາດກະກຽມເປີດກອງປະຊຸມ ໃຫຍ່ ຄັ້ງທີ IX ຂອງອົງຄະນະພັກກະຊວງສຶກສາທິການ ແລະ ກິລາ ເມື່ອບໍ່ດົນມານີ້ວ່າ: ຂ້າພະເຈົ້າ ເປັນພະນັກງານສັງກັດຢູ່ວິທະຍາໄລສິລະປະສຶກສາ ນັບແຕ່ວັນທີ 1 ຕຸລາ 2005 ມາເຖິງປະຈຸບັນ ລວມເວລາແລ້ວກໍ 15 ປີພໍດີ ແລະ ຕົນເອງກໍມີຄວາມເອົາໃຈໃສ່ຕໍ່ໜ້າທີ່ວຽກງານທີ່ຕົນຮັບຜິດຊອບ, ມີຄວາມຮັບຜິດຊອບສູງຕໍ່ໜ້າທີ່ທີ່ຖືກມອບໝາຍ, ມີຄວາມບຸກບືນຫ້າວຫັນຊອກຮູ້ຮໍ່າຮຽນເພື່ອພັດທະນາຕົນເອງ ໂດຍສະເພາະທາງດ້ານວິຊາການ ແລະ ວິຊາສະເພາະ ຊຶ່ງສະແດງໃຫ້ເຫັນໃນການພັດທະນາຍົກລະດັບຕົນເອງເປັນບາດກ້າວ ແລະ ຕໍ່ເນື່ອງ.

ພ້ອມກັນນີ້, ຕົນຍັງມີຄວາມຫ້າວຫັນ ແລະ ເປັນແບບຢ່າງໃນການເຄື່ອນໄຫວປະກອບສ່ວນທຸກວຽກງານທີ່ອົງການຈັດຕັ້ງມະຫາຊົນຈັດຂຶ້ນ ແລະ ໄດ້ເຮັດໜ້າທີ່ເປັນສະມາຊິກທີ່ດີຄົນໜຶ່ງ ທີ່ຍຶດໝັ້ນຕໍ່ອຸດົມການຂອງພັກ, ມີສະຕິ, ມີຄວາມຫ້າວຫັນປະຕິບັດໜ້າທີ່ຕາມການມອບໝາຍຂອງຄະນະພັກ, ຄະນະນຳ ແລະ ຂັ້ນເທິງ ຢ່າງເຕັມເມັດເຕັມໜ່ວຍ, ຮຽນຮູ້ ເຊື່ອມຊຶມເອກະສານຕ່າງໆ ໃນແຕ່ລະໄລຍະ, ຮ່ວມຊີວິດການເມືອງຂອງໜ່ວຍພັກເປັນປົກກະຕິ, ປະກອບສ່ວນສ້າງຂະບວນການ, ຕ້ານປະກົດການຫຍໍ້ທໍ້, ປ້ອງກັນຄວາມສະຫງົບພາຍໃນ-ພາຍນອກ ແລະ ໃນຂະບວນການຕ່າງໆເຫຼົ່ານັ້ນ ໄດ້ຝຶກຝົນຫຼໍ່ຫຼອມເຮັດໃຫ້ຂ້າພະເຈົ້າຮຽນຮູ້ ພັດທະນາຕົນເອງຢ່າງບໍ່ຢຸດຢັ້ງ ໂດຍການນໍາໃຊ້ຄວາມຮູ້ຄວາມສາມາດ ແລະ ປະສົບການຕ່າງໆຜັນຂະຫຍາຍວິຊາຊີບຂອງຕົນ ເພື່ອພັດທະນາຄວາມຮູ້ ທັກສະໃຫ້ແກ່ນັກສຶກສາ ຕະຫຼອດຮອດສັງຄົມ ແລະ ປະເທດຊາດ.

ທັງນີ້ ທັງນັ້ນ ກໍຍ້ອນການຊີ້ນຳນຳພາອັນສະຫຼາດສ່ອງໃສຂອງພັກ-ລັດ ຂອງຄະນະນຳຂັ້ນເທິງທຸກຂັ້ນ ເວົ້າລວມ, ເວົ້າສະເພາະກໍຄືຄະນະໜ່ວຍພັກຮາກຖານວິທະຍາໄລສິລະປະສຶກສາ ທີ່ມີວິໄສທັດອັນກວ້າງໄກ ຍາມໃດກໍໃຫ້ຄວາມໃກ້ສິດຕິດແທດ ແລະ ໃຫ້ໂອກາດສະໜັບສະໜູນສົ່ງເສີມຂ້າພະເຈົ້າ ໄດ້ພັດທະນາຄວາມຮູ້ຄວາມສາມາດ, ຍົກລະດັບວຸດທິທາງດ້ານວິຊາສະເພາະທັງພາຍໃນ ແລະ ຕ່າງປະເທດ ມາໂດຍຕະຫຼອດ ແລະ ໃຫ້ໂອກາດຂ້າພະເຈົ້າໄດ້ສະແດງຄວາມຮູ້ຄວາມສາມາດອອກສູ່ສັງຄົມ, ປະຕິບັດຕາມພາລະບົດບາດໜ້າທີ່ເປັນຄູສອນທີ່ດີ ແລະ ມີຄວາມພາກພູມໃຈໃນການສິດສອນ. ຕໍ່ກັບຜົນງານດັ່ງກ່າວ ມັນໄດ້ສະແດງໃຫ້ເຫັນວ່າ ໜ່ວຍພັກ ແລະ ສະມາຊິກພັກພາຍໃນວິທະຍາໄລ ສາມາດຍາດໄດ້ຜົນງານທີ່ພົ້ນເດັ່ນເຊັ່ນ: ໜ່ວຍພັກແຂງຮູ້ນຳພາຮອບດ້ານ 6 ປີຊ້ອນ (2012, 2013 ແລະ 2014, 2014, 2015 ແລະ 2016) ແລະ ໜ່ວຍພັກປອດໃສ, ເຂັ້ມແຂງ, ໜັກແໜ້ນ 2 ປີ (2018 ແລະ 2019). ຈາກຜົນງານທີ່ພົ້ນເດັ່ນທີ່ກ່າວມາຂ້າງເທິງນັ້ນ ຂ້າພະເຈົ້າກໍເປັນໜຶ່ງໃນສະມາຊິກພັກ ທີ່ໄດ້ປະກອບສ່ວນທາງດ້ານສະຕິປັນຍາ ແລະ ເຫື່ອແຮງເຂົ້າໃນການພັດທະນາຮອບດ້ານຈົນໄດ້ຮັບການຍ້ອງຍໍຜົນງານຢ່າງຫຼວງຫຼາຍ ເຊັ່ນ:

ໃບຍ້ອງຍໍຂັ້ນວິທະຍາໄລ 5 ໃບ, ໃບຍ້ອງຍໍ ຈາກອົງການຈັດຕັ້ງມະຫາຊົນ 5 ໃບ, ໃບຍ້ອງຍໍຂັ້ນກົມ 2 ໃບ, ໃບຍ້ອງຍໍຂັ້ນກະຊວງ ໃນການເຄື່ອນໄຫວວຽກງານຂະບວນການແຂ່ງຂັນ 3 ດີ 1 ໃບ, ໃບຍ້ອງຍໍຂັ້ນກະຊວງ ທີ່ມີຜົນງານດີເດັ່ນ ປະເພດ II ໃນການເຄື່ອນໄຫວວຽກງານ ໄລຍະ 5 ປີ 1 ໃບ, ໃບຍ້ອງຍໍຂັ້ນລັດຖະມົນຕີ ໃນການປະກອບສ່ວນເຫື່ອແຮງ, ສະຕິປັນຍາເຂົ້າໃນໜ້າທີ່ວຽກງານ 2 ໃບ, ຫຼຽນກາແຮງງານ ທີ່ມີຜົນງານດີເດັັ່ນ ປະກອບສ່ວນ ເຫື່ອແຮງ ແລະ ສະຕິປັນຍາ ໃນການປະຕິບັດໜ້າທີ່ວຽກງານວິຊາສະເພາະຕະຫຼອດໄລຍະຜ່ານມາ 1 ຫຼຽນ. ນອກນັ້ນຍັງໄດ້ໃບຢັ້ງຢືນຜ່ານການຝຶກອົບຮົມ ແລະ ກຽດຕິຄຸນ ໃນການປະກອບສ່ວນວຽກງານອີກ 9 ໃບ.

ສະຫາຍ ວັນໄຊ ວົງສາ ກ່າວອີກວ່າ: ສຳລັບດ້ານວິຊາການ ຂ້າພະເຈົ້າມີຄວາມພູມໃຈຢ່າງຍິ່ງທີ່ໄດ້ຮັບໜ້າທີ່ມອບໝາຍວຽກງານໃນໜ່ວຍງານສົ່ງເສີມວິຊາການ ຖືວ່າເປັນໜ່ວຍງານຫຼັກ ທີ່ກະຕຸກຊຸກຍູ້, ສົ່ງເສີມ ແລະ ພັດທະນາວຽກງານວິຊາການຂອງວິທະຍາໄລ ເຊັ່ນ: ຊຸກຍູ້ສົ່ງເສີມ ແລະ ພັດທະນາການຈັດການຮຽນການສອນ, ຕໍາລາ, ຫຼັກສູດ, ໃບປະກາດ, ໃບຄະແນນ, ແຜນການສອນ, ບົດສອນ, ຕິດຕາມການສິດສອນຂອງຄູ ແລະ ເປັນກຳມະການຕັດສິນການແຂ່ງຂັນຮູບແຕ້ມນັກຮຽນສາມັນລະດັບນະຄອນຫຼວງວຽງຈັນ.

ຄຽງຄູ່ກັນນັ້ນ, ດ້ານການສິດສອນ ແລະ ການວິໄຈ ກໍໄດ້ເອົາໃຈໃສ່ປະຕິບັດໜ້າທີ່ຮັບຜິດຊອບເປັນຄູທີ່ດີຜູ້ໜຶ່ງ ທີ່ມີຄວາມມັກຮັກອາຊີບຄູ ໂດຍໝູນໃຊ້ຄວາມຮູ້ຈາກທິດສະດີ, ປະສົບການ ແລະ ການຄົ້ນຄວ້າຕົວຈິງ ປະກອບເຂົ້າໃນການພັດທະນາການສອນຂອງຕົນເອງຢ່າງຕໍ່ເນື່ອງ ຊຶ່ງສະແດງອອກເປັນບົດຄົ້ນຄວ້າ, ເອກະສານ, ສື່ການສອນປະກອບໃສ່ໃນການສິດສອນຂອງຂ້າພະເຈົ້າ ອັນເຮັດໃຫ້ນັກຮຽນນັກສຶກສາມີຄວາມຮູ້, ຄວາມສາມາດມີຄວາມເຂົ້າໃຈຕໍ່ວິຊາສະເພາະຫຼາຍຂຶ້ນ ສຳລັບວິຊາທີ່ຮັບຜິດຊອບຫຼັກ ແມ່ນວິຊາຮູບເໝືອນ, ລາຍລາວ ແລະ ວິທີສິດສອນສິລະປະກຳ. ນອກຈາກການສິດສອນແລ້ວ ຍັງມີສ່ວນຮ່ວມໃນການເຮັດບົດຄົ້ນຄວ້າວິໄຈ, ປະເມີນຫຼັກສູດ, ວິໄຈຊັ້ນຮຽນ, ເປັນທີ່ປຶກສາໃນການຂຽນບົດໂຄງການຈົບຊັ້ນ ເປັນຕົ້ນ.
ດ້ານຜົນງານວິຊາສະເພາະ ໄປຄ່ຽງຄູ່ກັບການສິດສອນຕາມຕຳລາ ແລະ ຕາມຫຼັກສູດໃນຫ້ອງຮຽນແລ້ວ ຂ້າພະເຈົ້າຖືວ່າເປັນຄູຜູ້ໜຶ່ງທີ່ສ້າງຜົນງານທາງດ້ານວິຊາສະເພາະ ເພື່ອຊຸກຍູ້ສົ່ງເສີມສ້າງແຮງບັນດານໃຈໃຫ້ກັບມະຫາຊົນ, ສັງຄົມ ແລະ ປະເທດຊາດ ຊຶ່ງສະແດງອອກເປັນຜົນງານ ເຊັ່ນ: ໄດ້ສ້າງສັນຜົນງານທາງດ້ານການແຕ້ມຮູບສີນ້ຳມັນ, ສີອາຄີລິກ ແລະ ສີນ້ຳ ໄດ້ປະມານ 120 ຜົນງານ, ເຂົ້າຮ່ວມວາງສະແດງຜົນງານພາຍໃນປະເທດ 15 ຄັ້ງ ຈຳນວນ 20 ຜົນງານ, ຕ່າງປະເທດ 10 ຄັ້ງ ຈຳນວນ 15 ຜົນງານ.

ນອກນັ້ນຍັງໄດ້ປະກອບສ່ວນໃນການແຕ້ມຮູບປະກອບໃສ່ປື້ມ ໃຫ້ອົງການຣູມທູຣີດ ຈຳນວນ 5 ຫົວ, ໂຄງການກັນໄພພິບັດ, ໂຄງການນ້ຳສະອາດ-ຊົນລະປະທານ ແລະ ໂຄງການອານຸລັກສັດປ່າ ແລະ ປ່າໄມ້ ຈຳນວນ 3 ຫົວ. ດ້ານການສ້າງຄວາມເຂັ້ມແຂງທາງວິຊາການ ນອກຈາກວຽກງານສິດສອນເປັນຕົ້ນຕໍແລ້ວ ຍັງໄດ້ປະກອບສ່ວນໃນການເປັນຄູຝຶກວິຊາສະເພາະສາຂາສິລະປະກຳ ໃຫ້ແກ່ວຽກງານສາມສ້າງຄື: ເມືອງປາກທາ, ເມືອງຜາອຸດົມ ແລະ ເມືອງເມີງ ແຂວງບໍ່ແກ້ວ 2 ຄັ້ງ; ເປັນຄູຝຶກສິລະປະກໍາໃຫ້ແກ່ວິທະຍາໄລຄູທົ່ວປະເທດ 2 ຄັ້ງ, ເປັນຄູຝຶກວິຊາສິລະປະກຳໃຫ້ຄູສອນເຂດຫ່າງໄກສອກຫຼີກ ທີ່ກົມພະລະ ແລະ ສິລະປະສຶກສາ ກະຊວງສຶກສາທິການ ແລະ ກິລາ ຈັດຂຶ້ນ 1 ຄັ້ງ, ຝຶກອົບຮົມຄູສອນຊ່ວຍວິຊາສິລະປະກຳ 2 ຄັ້ງ, ປະກອບສ່ວນເຂົ້າຮ່ວມໃນການພັດທະນາ ແລະ ປັບປຸງຫຼັກສູດຂອງກົມສ້າງຄູ 3 ຄັ້ງ, ເຂົ້າຮ່ວມກອງປະຊຸມສ້າງຄວາມເຂັ້ມແຂງວຽກງານປະກັນຄຸນນະພາບ ແລະ ການປະເມີນຜົນ 3 ຄັ້ງ ແລະ ວຽກງານອື່ນໆ ທີ່ຂັ້ນເທິງມອບໝາຍໃຫ້.
ຢ່າງໃດກໍຕາມ, ເພື່ອຮັກສາ ແລະ ຜັນຂະຫຍາຍມູນເຊື້ອດັ່ງກ່າວ ຂ້າພະເຈົ້າຈະສືບຕໍ່ຈັດຕັ້ງປະຕິບັດໜ້າທີ່ວຽກງານທີ່ຕົນເອງຮັບຜິດຊອບ ແລະ ຖືກມອບໝາຍ, ເອົາໃຈໃສ່ຝຶກຝົນຫຼໍ່ຫຼອມຕົນເອງໃຫ້ກາຍເປັນສະມາຊິກພັກທີ່ດີ, ເປັນແບບຢ່າງນຳໜ້າໃຫ້ແກ່ມະຫາຊົນ, ພັດທະນາຕົນເອງໃຫ້ເປັນຄູສອນທີ່ດີເລີດ ແລະ ຮັບຜິດຊອບວຽກງານວິຊາການໃຫ້ດີຂຶ້ນກວ່າເກົ່າ. ນອກຈາກນີ້ຂ້າພະເຈົ້າຍັງຈະຕ້ອງໄດ້ບຸກບືນ, ສູ້ຊົນ, ຊອກຮູ້ຮໍ່າຮຽນທາງດ້ານທິດສະດີການເມືອງ ແລະ ສ້າງປະສົບການພາກປະຕິບັດວິຊາສະເພາະໃຫ້ຫຼາຍຍິ່ງຂຶ້ນ.

ສະນັ້ນ, ເນື່ອງໃນໂອກາດກອງປະຊຸມໃຫຍ່ ຄັ້ງທີ IX ຂອງອົງຄະນະພັກກະຊວງສຶກສາທິການ ແລະ ກິລາ ທີ່ຈະມາເຖິງມໍ່ໆນີ້ ຂ້າພະເຈົ້າຈະສືບຕໍ່ປະກອບສ່ວນເຫື່ອແຮງ, ສະຕິປັນຍາເຂົ້າໃນການສ້າງຜົນງານເພື່ອຂໍ່ານັບຮັບຕ້ອນວັນສຳຄັນດັ່ງກ່າວເຊັ່ນ: ຂະບວນການອອກແຮງງານລວມ, ກິດຈະກຳແຂ່ງຂັນກິລາ, ແຂ່ງຂັນສິລະປະ-ວັນນະຄະດີ, ວາງສະແດງຜົນງານສິລະປະກຳ, ແຂ່ງຂັນຮຽນດີ-ສອນເກັ່ງ, ມີລະບຽບວິໄນ, ຮັກສາມູນເຊື້ອສິລະປະວັດທະນະທຳອັນດີງາມຂອງຊາດ, ຕ້ານ ແລະ ສະກັດກັ້ນ ພະຍາດໂຄວິດ-19 ຕາມມາດຕະການຂອງຂັ້ນເທິງວາງອອກຢ່າງເຂັ້ມງວດ, ຕ້ານ ແລະ ສະກັດກັ້ນປະກົດການຫຍໍ້ທໍ້ໃນທຸກຮູບແບບ, ສ້າງແຮງຈູງໃຈປຸກລະດົມມ່ວນຊົນ, ນັກຮຽນນັກສຶກສາເຂົ້າຮ່ວມທຸກຂະບວນການຂອງອົງຄະນະພັກກະຊວງສຶກສາທິການ ແລະ ກິລາ ຈັດຂຶ້ນ.

ໜັງສືພິມສຶກສາ-ກິລາລາຍວັນ