ສະພາການຄ້າ ແລະ ອຸດສາຫະກຳແຫ່ງຊາດລາວ, ໄດ້ຈັດກອງປະຊຸມສົ່ງເສີມທຸລະກິດກະສິກຳ ສຳລັບ MSME , ທີ່ຫ້ອງປະຊຸມ ສຄອຊ ແລະ ຜ່ານລະບົບວິດີໂອທາງໄກ , ເຊິ່ງໃຫ້ກຽດເປັນທານ ໂດຍ ທ່ານ ດາວວອນ ພະຈັນທະວົງ ຮອງປະທານ ຜູ້ປະຈຳການ ສະພາການຄ້າ ແລະ ອຸດສາຫະກຳແຫ່ງຊາດລາວ, ແລະມີຜູ້ເຂົ້າຮ່ວມຈາກຄະນະບໍລິຫານງານ, ຄະນະທີ່ປຶກສາ ສຄອຊ ແລະ ຜູ້ປະກອບການທຸລະກິດກະສິກໍາ ຈາກ ນະຄອນຫຼວງວຽງຈັນ ແລະ ຕ່າງແຂວງ. ໃນຕອນເຊົ້າ ວັນທີ 21 ກໍລະກົດ 2022 ທີ່ ສະພາການຄ້າ ແລະ ອຸດສາຫະກຳແຫ່ງຊາດລາວ
ຈຸດປະສົງຂອງກອງປະຊຸມໃນຄັ້ງນີ້ແມ່ນເພື່ອເປັນການແລກປ່ຽນຂໍ້ມູນ ແລະ ປະສົບການຈາກຜູ້ປະກອບການທຸລະກິດກະສິກໍາ ແລະ ເພື່ອປຶກສາຫາລືສົ່ງເສີມທຸລະກິດກະສິກຳຂອງ ສປປ ລາວ ໃຫ້ມີປະສິດທິຜົນ ແລະ ມີຄວາມຍືນຍົງ. ເຊິ່ງໃນກອງປະຊຸມໄດ້ມີການແນະນໍາວິທີການນໍາໃຊ້ຝຸ່ນຊີວະພາບທີ່ມີ ມາດຕະຖານ ແລະ ວິທີການນໍາໃຊ້ຝຸ່ນດັ່ງກ່າວໃຫ້ໄດ້ຮັບປະສິດທິຜົນສູງສຸດໃນວຽກງານສົ່ງເສີມການຜະລິດກະສິກຳ ເຊັ່ນ: ການປູກເຂົ້າ, ຜັກ, ໝາກໄມ້ ແລະ ອື່ນໆ ຈາກ ທ່ານນາງ Nguyen Thi Thu Trang ຮອງປະທານ ບໍລິສັດ ໄບໂອເອບວກ ຈຳກັດ. ນອກຈາກນີ້ຍັງໄດ້ຮັບຟັງການນໍາສະເໜີວິທີການນໍາໃຊ້ທໍນ້ຳທີ່ມີປະສິດທິພາບ ແລະ ເໝາະສົມໃນການສ້າງລະບົບສະໜອງນ້ຳຮັບໃຊ້ການຜະລິດກະສິກຳ ຈາກ ທ່ານລັງກອນ ໄຊຍະວົງ ປະທານ ແລະ ຜູ້ຮ່ວມກໍ່ຕັ້ງກຸ່ມບໍລິສັດໄຊຍະວົງ, ປະທານ ໂຮງງານອຸດສາຫະກຳໂຕໂຍລາວ ຈຳກັດຜູ້ດຽວ.
ກອງປະຊຸມໄດ້ມີການສົນທະນາແລກປ່ຽນກັນຢ່າງສ້າງສັນ ແລະ ກົງໄປກົງມາ ເຊິ່ງຜູ້ປະກອບການມີຄວາມສົນໃຈທີ່ສຸດຕໍ່ວິທີການນໍາໃຊ້ຝຸ່ນຊີວະພາບທີ່ຖືກຕ້ອງ ແລະ ການນໍາໃຊ້ທໍ່ນໍ້າເພື່ອສະໜອງລະບົບນໍ້າໃຫ້ການຜະລິດ ເຊິ່ງສາມາດຫຼຸດຜ່ອນຕົ້ນທຶນ ແລະ ມີປະສິດທີຜົນສູງຂື້ນ. ສໍາລັບລາຍລະອຽດເພີ່ມເຕີມ ກ່ຽວກັບວຽກງານສົ່ງເສີມທຸລະກິດກະສິກຳ ລວມເຖິງ ການຊອກຫາແຫລ່ງທຶນ ແລະ ຕະຫຼາດ ສາມາດຕິດຕໍ່ພົວພັນ ຄະນະສົ່ງເສີມທຸລະກິດກະສິກຳ ປະຈໍາ ສຄອຊ ໃນເວລາໂມງລັດຖະການ
