ໃນລະຫວ່າງວັນທີ 18-23 ມິຖຸນາ ຜ່ານມາ, ທ່ານ ພູທອນ ເມືອງປາກ ປະທານອົງການກາແດງແຫ່ງຊາດລາວ ພ້ອມຄະນະໄດ້ເຂົ້າຮ່ວມກອງປະຊຸມສະພາກາແດງ ແລະ ຊີກວົງເດືອນແດງສາກົນ ຄັ້ງທີ 23 ທີ່ເຊີແນວ ປະເທດສະວິດເຊີແລນ ຊຶ່ງກອງປະຊຸມດັ່ງກ່າວ ແມ່ນໄດ້ຈັດຂຶ້ນທຸກໆສອງປີ, ໃນກອງປະຊຸມໄດ້ເຊີນເອົາບັນດາຄະນະນຳຂອງປະເທດສະມາຊິກກາແດງ ແລະ ຊີກວົງເດືອນ 192 ປະເທດໃນທົ່ວໂລກ ເຂົ້າຮ່ວມ.

ຈຸດປະສົງ ແມ່ນເພື່ອປຶກສາຫາລື ແລະ ກຳນົດບັນດາບຸລິມະສິດຂອງການດໍາເນີນວຽກງານກາແດງ ແລະ ຊີກວົງເດືອນແດງສາກົນ ກໍຄືວຽກງານມະນຸດສະທຳໃນ 2 ປີຕໍ່ໜ້າ, ໃນກອງປະຊຸມໄດ້ຮັບຮອງເອົາຫຼາຍນະໂຍບາຍເປັນຕົ້ນ: ການສ້າງຄວາມເຂັ້ມແຂງໃຫ້ແກ່ອົງການ, ການຮັບມືຕໍ່ວຽກງານປ່ຽນແປງທາງດິນຟ້າອາກາດ ແລະ ສິ່ງແວດລ້ອມ, ການສ້າງຄວາມເຂັ້ມແຂງດ້ານວຽກງານອາສາສະໝັກ, ພ້ອມກັນນັ້ນໃນກອງປະຊຸມຍັງໄດ້ປ່ອນບັດຄັດເລືອກຕັ້ງເອົາປະທານ, ຮອງປະທານ ສະຫະພັນກາແດງ ແລະ ຊີກວົງເດືອນແດງ ແລະ ຄະນະກຳມາທິການຕ່າງໆ ຊຶ່ງປີນີ້ແມ່ນ ທ່ານ Francesco Rocca ໄດ້ຖືກເລືອກໃຫ້ສືບຕໍ່ດຳລົງຕຳແໜ່ງເປັນປະທານສະຫະພັນກາແດງ ແລະ ຊີກວົງເດືອນແດງສາກົນ ສະໄໝທີສອງ, ພິເສດກາແດງຈາກປະເທດອາຊີຕາເວັນອອກສ່ຽງໃຕ້ ກໍຄືກາແດງຊີກວົງເດືອນມາເລເຊຍ ໄດ້ຮັບເລືອກເຂົ້າເປັນໜຶ່ງໃນສະມາຊິກຂອງຄະນະກຳມາທິການບໍລິຫານ ຊຶ່ງຄະນະດັ່ງກ່າວຈະມີວາລະການເຮັດວຽກເປັນໄລຍະເວລາ 4 ປີ.

ໃນໂອກາດນີ້ ປະທານອົງການກາແດງແຫ່ງຊາດລາວ ໄດ້ຖືໂອກາດເຂົ້າພົບປະທານ, ເລຂາທິການໃຫຍ່ສະຫະພັນກາແດງ ແລະ ຊີກວົງເດືອນແດງສາກົນ ນັບທັງການພົບປະສອງຝ່າຍກັບບັນດາກາແດງເພື່ອນມິດຕ່າງໆເຊັ່ນ: ກາແດງຫວຽດນາມ, ຈີນ, ໄທ, ສະວິດ, ສິງກະໂປ, ມາເລເຊຍ, ຟີລິບປິນ, ສ ເກົາຫຼີ, ເພື່ອຍາດແຍ່ງການສະໜັບສະໜູນ, ຊ່ວຍເຫຼືອທັງເປັນການເພີ່ມທະວີການຮ່ວມມືສາຍພົວພັນໃຫ້ແໜ້ນແຟ້ນ ແລະ ໃນການພັດທະນາອົງການກາແດງແຫ່ງຊາດລາວໃຫ້ສາມາດບັນລຸໄດ້ຕາມແຜນຍຸດທະສາດທີ່ກຳນົດໄວ້ ແຕ່ນີ້ 2021-2030 ໃຫ້ປະກົດຜົນເປັນຈິງ.

(ຂ່າວ: ອົງການກາແດງແຫ່ງຊາດລາວ )