ລັດຖະບານ ກຳນົດມາດຕະການປ້ອງກັນ ສະກັດກັ້ນ ແລະ ແກ້ໄຂ ການລະບາດພະຍາດໂຄວິດ ແຕ່ວັນທີ 31 ມີນາ 2022 ເປັນຕົ້ນໄປ
![](https://pakaad.com/wp-content/uploads/2022/04/photocollage_20220401_0919470775630064457589301587-1024x576.jpg)
ວັນທີ 31 ມີນາ 2022 ນີ້, ທ່ານ ນາງ ທິບພະກອນ ຈັນທະວົງສາ ຮອງລັດຖະມົນຕີ, ຮອງຫົວໜ້າຫ້ອງວ່າການສຳນັກງານນາຍົກລັດຖະມົນຕີ, ຮອງຫົວໜ້າຄະນະສະເພາະກິດ, ຜູ້ປະຈຳການ, ຫົວໜ້າກອງເລຂາ ໄດ້ຖະແຫລງຂ່າວກ່ຽວກັບມາດຕະການປ້ອງກັນ, ຄວບຄຸມ, ສະກັດກັ້ນ ແລະ ແກ້ໄຂ ການລະບາດຂອງພະຍາດ ໂຄວິດ-19 ໄລຍະແຕ່ວັນທີ 31 ມີນາ 2022 ເປັນຕົ້ນໄປ.
ທ່ານ ນາງ ທິບພະກອນ ຈັນທະວົງສາ ໄດ້ໃຫ້ຮູ້ວ່າ: ໂດຍໄດ້ຮັບມອບໝາຍ ຈາກທ່ານ ຮອງນາຍົກລັດຖະມົນຕີ, ຫົວໜ້າຄະນະສະເພາະກິດ, ໃນນາມຫົວໜ້າກອງເລຂາ ຂ້າພະເຈົ້າ ຂໍແຈ້ງມາຍັງ ພໍ່ແມ່ພີ່ນ້ອງ ປະຊາຊົນລາວ, ພະນັກງານ, ລັດຖະກອນ, ທະຫານ, ຕໍາຫລວດ, ຜູ້ປະກອບການຊາວຕ່າງດ້າວ ແລະ ຊາວຕ່າງ ປະເທດ ທີ່ອາໄສ ຢູ່ ສປປ ລາວ ຊາບທົ່ວເຖິງກັນວ່າ ປັດຈຸບັນ ການແຜ່ລະບາດຂອງພະຍາດໂຄວິດ-19 ຍັງສືບຕໍ່ມີການຕິດເຊື້ອເພີ່ມຂຶ້ນໃນແຕ່ລະວັນ ພ້ອມທັງ ແຜ່ລາມໃນຊຸມຊົນເປັນວົງກວ້າງ ຢູ່ເກືອບທຸກແຂວງ ເຊິ່ງສ່ວນໃຫຍ່ຕິດພັນກັບການເຄື່ອນໄຫວ ແລະ ການດຳລົງຊີວິດປະຈຳວັນ ຂອງບຸກຄົນ, ຂອງສັງຄົມ, ຄວາມບໍ່ເຂັ້ມງວດໃນການປະຕິບັດມາດຕະການປ້ອງກັນຂັ້ນພື້ນຖານ. ອີກດ້ານໜຶ່ງ ໃນສອງອາທິດຂ້າງໜ້າ ບຸນກຸດສົງການປີໃໝ່ລາວ ກໍຈະໝູນວຽນມາເຖິງ ເຊິ່ງເປັນປະເພນີອັນດີງາມ ທີ່ປະຊາຊົນລາວ ໄດ້ສືບທອດມາຍາວນານ ໂດຍປົກກະຕິແມ່ນມີການສະເຫລີມສະຫລອງອວຍພອນເຊິ່ງກັນ ແລະ ກັນ. ໃນເງື່ອນໄຂທີ່ມີການລະບາດ ຂອງພະຍາດລັດຖະບານ ໄດ້ຄົ້ນຄວ້າ ແລະ ຊີ້ນໍາ ການສະຫລອງປີໃໝ່ລາວ ພສ 2565 ເຊິ່ງມີໃນແຈ້ງການຫ້ອງວ່າການສໍານັກງານນາຍົກລັດຖະມົນຕີ ເລກທີ 367 ໂດຍໄດ້ມອບໃຫ້ຄະນະສະເພາະກິດ ກໍານົດມາດຕະການປ້ອງກັນ, ຄວບຄຸມ, ສະກັດກັ້ນ ແລະ ແກ້ໄຂການລະບາດຂອງພະຍາດໂຄວິດ-19.
ຄະນະສະເພາະກິດ ໄດ້ຄົ້ນຄວ້າ ແລະ ອອກແຈ້ງການ ສະບັບເລກທີ 370, ລົງວັນທີ 31 ມີນາ 2022 ເຊິ່ງໄດ້ກໍ່ນົດມາດຕະການ ສໍາລັບໄລຍະແຕ່ວັນທີ 31 ມີນາ 2022 ເປັນຕົ້ນໄປ. ລາຍລະອຽດຂອງແຈ້ງການ ມີດັ່ງນີ້: ໃຫ້ຄະນະສະເພາະກິດກະຊວງ, ອົງການ, ບັນດາແຂວງ ແລະ ນະຄອນ ຫລວງວຽງຈັນ ຊີ້ນຳໃນການກຳນົດຮູບແບບການສະເຫລີມ ສະຫລອງບຸນປີໃໝ່ລາວ ທີ່ອະນຸຍາດໃຫ້ສະເພາະກິດຈະກຳຕາມປະເພນີ ເຊັ່ນ: ການສັກກະລະບູຊາ, ສົງນໍ້າພະ ແລະ ບາສີສູ່ຂວັນພາຍໃນຄອບຄົວ ບົນຈິດໃຈປະຢັດມັດທະຍັດ, ບໍ່ຊຸມນຸມແອອັດ ເຮັດໃຫ້ເກີດມີການແພ່ລະບາດເປັນວົງກວ້າງ ຢ່າງເດັດຂາດ. ພ້ອມນັ້ນ, ຕ້ອງປະຕິບັດມາດຕະການປ້ອງກັນຂັ້ນພື້ນຖານ ຄື: ການຮັກສາໄລຍະຫ່າງ, ໃສ່ຜ້າອັດປາກ-ດັງ, ໝັ່ນລ້າງມື ດ້ວຍນໍ້າສະອາດ ໃສ່ສະບູ ຫຼື ເຈວລ້າງມື; ສຳລັບການຈັດປະຊຸມ ຄະນະຮັບຜີດຊອບ ຕ້ອງມີມາດຕະການຮອງຮັບ ເຊັ່ນ: ທຸກຄົນທີ່ເຂົ້າມາຮ່ວມຕ້ອງ ສັກວັກຊິນຄົບ ລວມທັງເຂັມກະຕຸ້ນ ເມື່ອຮອດກຳນົດ, ທຸກຄົນຕ້ອງມີຜົນກວດແບບໄວ (ATK) 24 ຊົ່ວໂມງກ່ອນປະຊຸມ ດ້ວຍຜົນລົບ ສໍາລັບກອງປະຊຸມທີ່ມີຜູ້ເຂົ້າຮ່ວມຫລາຍກວ່າ 100 ທ່ານ, ຕິດຕັ້ງເຄື່ອງວັດແທກອຸນຫະພຸມ, ໃສ່ຜ້າອັດປາກ-ດັງຕະຫລອດໄລຍະປະຊຸມ, ສະໜອງສະບູ ແລະ ເຈວລ້າງມື, ຈັດບ່ອນນັ່ງໂດຍຮັກສາໄລຍະຫ່າງ ໃນໄລຍະປະຊຸມ, ພັກດື່ມກາເຟ ແລະ ພັກທ່ຽງ ຖ້າກອງປະຊຸມສະໜອງອາຫານວ່າງ ຫລື ອາຫານທ່ຽງ ແມ່ນໃຫ້ເຮັດເປັນກ່ອງ ຫລື ຈັດສະຖານທີ່ ໂດຍຮັກສາໄລຍະຫ່າງ, ຖ້າຜູ້ໃດມີອາການຄ້າຍຄືເປັນຫວັດ ແມ່ນບໍ່ໃຫ້ເຂົ້າຮ່ວມກອງປະຊຸມ; ຄະນະສະເພາະກິດກະຊວງ, ອົງການ, ບັນດາແຂວງ ແລະ ນະຄອນຫລວງວຽງຈັນ ສາມາດຕີລາຄາ ສະພາບການລະບາດຂອງພະຍາດ ແລ້ວພິຈາລະນາ ມາດຕະການກ່ຽວກັບການມາເຮັດວຽກຕາມສະພາບຄວາມເປັນຈິງຂອງແຕ່ລະບ່ອນ; ໃຫ້ສືບຕໍ່ການຮຽນການສອນແບບເຊິ່ງໜ້າ ຂອງທຸກຊັ້ນ, ທຸກສາຍ ໃນສະຖານການສຶກສາ ໂດຍຮັບປະກັນການປະຕິບັດມາດຕະການປ້ອງກັນ ແລະ ຄວບຄຸມການຕິດເຊື້ອ, ແຕ່ໃຫ້ໂຈະສະເພາະໂຮງຮຽນທີ່ບໍ່ສາມາດປະຕິບັດຕາມເງື່ອນໄຂ ແລະ ມາດຕະການທີ່ຄະນະສະເພາະກິດໄດ້ວາງອອກ ແລະ ໃຫ້ຄະນະສະເພາະກິດແຕ່ລະຂັ້ນ ຕິດຕາມ ແນະນຳບັນດາໂຮງຮຽນຢ່າງໃກ້ຊິດ. ພ້ອມກັນນີ້, ກໍປຸກລະດົມນັກຮຽນ-ນັກສຶກສາ ຕາມເກນອາຍຸ ທີ່ກະຊວງສາທາລະນະສຸກກຳນົດໄວ້ ໃຫ້ໄປຮັບວັກຊິນກັນໂຄວິດ-19 ຕາມແຜນການ.
ໃຫ້ຄະນະສະເພາະກິດທຸກພາກສ່ວນ ກວດກາຕົວເລກການສັກວັກຊິນຂອງພາກສ່ວນຕົນ ແລະ ມາດຕະການຊຸກຍູ້ໃນຂັ້ນຕໍ່ໄປ ເພື່ອຮັບປະກັນໃຫ້ທຸກຄົນ ໄດ້ເຂົ້າເຖິງການສັກວັກຊິນ ແນໃສ່ການສ້າງພູມຄຸ້ມກັນໃຫ້ບຸກຄົນ ແລະ ສັງຄົມ. ພ້ອມນີ້, ກໍໃຫ້ສືບຕໍ່ການໂຄສະນາເຜີຍແຜ່ມາດຕະການປ້ອງກັນພະຍາດໂຄວິດ-19 ແລະ ປຸກລະດົມໃຫ້ທຸກຄົນມີຄວາມຕື່ນຕົວໃນການໄປຮັບວັກຊິນ; ໃຫ້ຄະນະສະເພາະກິດທຸກພາກສ່ວນ ຊີ້ນຳການກວດກາບັດສັກວັກຊິນ ຫລື QR Code Vaccine ID ຜ່ານແອບ LaoKYC ຂອງບຸກຄົນ ກ່ອນເຂົ້າສະຖານທີ່ເຮັດວຽກຂອງລັດ ແລະ ເອກະຊົນ ລວມທັງໂຮງຈັກໂຮງງານ; ໃຫ້ຄະ ນະສະເພາະກິດ ກະຊວງອຸດສາຫະກຳ ແລະ ການຄ້າ ສົມທົບກັບຄະນະສະເພາະກິດຂັ້ນແຂວງ ແລະ ນະຄອນຫລວງ ຊີ້ນຳການລົງຕິດຕາມ ກວດກາ ຮ້ານອາຫານ ແລະ ຮ້ານຄ້າຕ່າງໆ ໃຫ້ເຂັ້ມງວດໃນການກວດກາ ບັດສັກວັກຊິນ ຫລື QR Code Vaccine ID ຜ່ານແອບ LaoKYC ກ່ອນການເຂົ້າໃຊ້ບໍລິການ, ຖ້າພົບເຫັນຜູ້ປະກອບການໃດມີການລະເມີດ ຕ້ອງດຳເນີນການຕັກເຕືອນ ແລະ ປັບໄໝຕາມລະບຽບການ; ໃຫ້ຄະນະສະເພາະກິດກະຊວງໂຍທາທິການ ແລະ ຂົນສົ່ງ ຊີ້ນໍາພາກສ່ວນກ່ຽວຂ້ອງຂອງຕົນເອົາໃຈໃສ່ລົງຕິດຕາມການຂົນສົ່ງ (ເຮືອບິນ, ເຮືອໂດຍສານ, ລົດໄຟ ແລະ ລົດໂດຍສານ) ໃຫ້ຜູ້ປະກອບການມີມາດຕະການປ້ອງກັນຜູ້ໂດຍສານ, ສະໜອງສະບູ ຫລື ເຈວລ້າງມື ແລະ ມີຄວາມເຂັ້ມງວດໃນການກວດກາ ບັດສັກວັກຊິນ ຫລື QR Code Vaccine ID ຜ່ານແອບ LaoKYC ກ່ອນການເຂົ້າໃຊ້ບໍລິການ, ຖ້າພົບເຫັນຜູ້ປະກອບການໃດລະເມີດ ຕ້ອງດຳເນີນການຕັກເຕືອນ ແລະ ປັບໄໝຕາມລະບຽບການ; ໃຫ້ຄະນະສະເພາະກິດກະຊວງປ້ອງກັນປະເທດ ແລະ ກະຊວງປ້ອງກັນຄວາມສະຫງົບ ປະສານສົມທົບກັບຄະນະສະເພາະກິດຂັ້ນແຂວງ ແລະ ນະຄອນຫລວງວຽງຈັນ ສືບຕໍ່ເພີ່ມທະວີການຕິດຕາມກວດກາ ການເຂົ້າ-ອອກຕາມດ່ານຊາຍແດນ ເພື່ອຮັບປະກັນບໍ່ໃຫ້ມີການເຂົ້າ-ອອກແບບຊະຊາຍ ຫລື ມີການລັກລອບເຂົ້າ-ອອກ ບໍ່ຜ່ານດ່ານຊາຍແດນ.
ທ່ານ ນາງ ທິບພະກອນ ຈັນທະວົງສາ ຍັງໃຫ້ຮູ້ອີກວ່າ: ໃນສະພາບເງື່ອນໄຂ ທີ່ການລະບາດຍັງສືບຕໍ່ແພ່ລາມໃນວົງກວ້າງ, ພວກເຮົາມີຄວາມຈໍາເປັນ ຕ້ອງສືບຕໍ່ຕັ້ງໜ້າໃນການປະຕິບັດໜ້າທີ່ວຽກງານ, ດຳເນີນທຸລະກິດ ແລະ ທໍາມາຫາກິນ ດ້ວຍຄວາມລະມັດລະວັງ, ມີຄວາມຮັບຜິດຊອບ ໃນການປະຕິບັດບັນດາມາດຕະການ ປ້ອງກັນຂັ້ນພື້ນຖານ ທີ່ຄະນະສະເພາະກິດໄດ້ວາງອອກ ເປັນຕົ້ນ: ໃສ່ຜ້າອັດປາກ-ດັງ, ໝັ່ນລ້າງມືດ້ວຍນໍ້າສະອາດ ໃສ່ສະບູ ຫລື ເຈວລ້າງມື, ຮັກສາໄລຍະຫ່າງສິ່ງສໍາຄັນແມ່ນການໄປຮັບວັກຊິນໃຫ້ຄົບໂດສ ລວມທັງເຂັມກະຕຸ້ນ. ຖ້າເຮັດໄດ້ແນວນັ້ນ ຈຶ່ງຈະສາມາດສ້າງພູມຄຸ້ມກັນໝູ່ຮອບດ້ານ ຕ້ານເຊື້ອພະຍາດໂຄວິດ-19, ປ້ອງກັນຕົນເອງ ແລະ ຄອບຄົວ ໂດຍສະເພາະ ຜູ້ອາຍຸສູງ, ຜູ້ມີພະຍາດປະຈໍາຕົວ, ຕະຫລອດຮອດຊຸມຊົນທີ່ຕົນເອງດຳລົງຊີວິດຢູ່.
ນອກຈາກນີ້, ຂໍໃຫ້ຕິດຕາມຂໍ້ມູນຂ່າວສານຈາກແຫລ່ງຂ່າວທາງການ, ຕິດຕາມການຖະແຫລງຂ່າວປະຈຳວັນຂອງຄະນະສະເພາະກິດ ເຊິ່ງນອກຈາກຈະແຈ້ງສະຖິຕິການຕິດເຊື້ອ ແລະ ການເສຍຊີວິດ ທັງພາຍໃນ ແລະ ຕ່າງປະທດແລ້ວ, ຍັງໃຫ້ມີຂໍ້ແນະນຳທາງດ້ານການແພດ, ນິຕິກຳ ແລະ ມາດຕະການຕ່າງໆ ທີ່ຂະແໜງການ ຫລື ທ້ອງຖິ່ນວາງອອກ. ພ້ອມກັນນີ້, ຂໍທຸກຄົນໃຫ້ມີສະຕິໃນການບໍລິໂພກຂໍ້ມູນຂ່າວສານ ແລະ ບໍ່ໃຫ້ສົ່ງຕໍ່ຂໍ້ມູນທີ່ບໍ່ມີຄວາມຈິງ ຫລື ບິດເບືອນຄວາມຈິງ.
![](https://pakaad.com/wp-content/uploads/2022/04/fb_img_16487794137225487646562838179151.jpg)
.
![](https://pakaad.com/wp-content/uploads/2022/04/fb_img_16487794156202581767522218098538.jpg)
.
![](https://pakaad.com/wp-content/uploads/2022/04/photocollage_20220401_0919470771739295233609695336-1024x576.jpg)