ໃນວັນທີ 26 ມັງກອນ 2022 ທີ່ສະໜາມບິນວັດໄຕສາກົນ .ພິທີມອບ-ຮັບ ວັກຊີນກັນພະຍາດໂຄວິດ-19 Pfizer ຈຳນວນ 1,698,840 ໂດສ ຈາກສະຫະລັດອະເມລິກາໃຫ້ແກ່ ສປປ ລາວ, ໂດຍການຈັດສົ່ງຜ່ານໂຄງການ COVAX facility ເຊິ່ງເປັນໂຄງການນຳພາຮ່ວມກັນໂດຍອົງການ Gavi, ສຳພັນທະມິດນະວັດຕະກຳການກຽມຄວາມພ້ອມຕໍ່ການລະບາດຂອງພະຍາດ, ອົງການອະນາໄມໂລກ WHO ແລະ ອົງການ UNICEF ທີ່ເປັນຄູ່ຮ່ວມງານສຳຄັນໃນການຈັດສົ່ງ. ສະເພາະເດືອນມັງກອນ ສປປ ລາວ ແມ່ນໄດ້ຮັບການຊ່ວຍເຫຼືອວັກຊີນ Pfizer ຄັ້ງນີ້ເປັນຄັ້ງທີ່2.

ເປັນກຽດເຂົ້າຮ່ວມ ແລະ ກ່າວຮັບຂອງ ພະນະທ່ານ ພັນຄຳ ວິພາວັນ ນາຍົກລັດຖະມົນຕີແຫ່ງ ສປປ ລາວ ແລະ ກ່າວມອບໂດຍທ່ານ ດຣ. ປີເຕີ ເຮມອນ ເອກອັກຄະລັດຖະທູດແຫ່ງສະຫະລັດອາເມລິກາ ປະຈຳ ສປປ ລາວ; ໂດຍມີ ປອ ດຣ. ບຸນແຝງ ພູມມະໄລສິດ ລັດຖະມົນຕີກະຊວງສາທາລະນະສຸກ, ຮອງລັດຖະມົນຕີກະຊວງຕ່າງປະເທດ, ອົງການ UNICEF, ອົງການອະນາໄມໂລກ WHO ປະຈຳ ສປປ ລາວ, ບັນດາທູດຕານຸທູດ ແລະ ອົງການຈັດຕັ້ງສາກົນ, ພະນັກງານທີ່ກ່ຽວຂ້ອງທັງສອງຝ່າຍ;

ໃນໂອກາດນີ້ ທ່ານນາຍົກລັດຖະມົນຕີໄດ້ກ່າວສະແດງຄວາມຂອບໃຈມາຍັງລັດຖະບານ ກໍຄືປະຊາຊົນຂອງສະຫະລັດອາເມລິກາທີ່ໃຫ້ການສະໝັບສະໜູນອັນລໍ້າຄ່ານີ້.

ການສະໜອງວັກຊີນເຫຼົ່ານີ້ຈະຊ່ວຍໃຫ້ພວກເຮົາສາມາດບັນລຸເປົ້າໝາຍໃນການສັກວັກຊີນກັນພະຍາດໂຄວິດ-19 ໃຫ້ໄດ້ 80% ຂອງປະຊາກອນໃນປີ 2022 ແລະ ສຳຄັນໄປກ່ວານັ້ນຈະເປັນການຊ່ວຍຊີວິດຂອງປະຊາຊົນອີກດ້ວຍ.

ວັກຊີນເຫຼົ່ານີ້ຈະມີບົດບາດສຳຄັນໃນການສັກໃຫ້ແກ່ໄວໝຸ່ມອາຍຸ 12-17 ປີ ໂດຍອີງໃສ່ແຜນປະຕິບັດການສັກວັກຊີນກັນພະຍາດໂຄວິດ-19 ແຫ່ງຊາດ.