ສະຫະພັນນັກຮົບເກົາແຫ່ງຊາດລາວໄດ້ຈັດຕັ້ງກອງປະຊຸມໃຫຍ່ຂອງຜູ້ແທນນັກຮົບເກົ່າທົ່ວປະເທດສະໄໝທີ IV ຂຶ້ນທີ່ກະຊວງປ້ອງກັນປະເທດ ໃນວັນທີ 9 ພະຈິກ 2021. ເຊິ່ງວາລະການປະຊຸມດັ່ງກ່າວໄດ້ດໍາເນີນໄປໃນໜຶ່ງວັນ, ພາຍໃຕ້ການເປັນປະທານຂອງ ສະຫາຍ ພົນຈັດຕະວາ ສົມພອນ ແກ້ວມີໄຊ ປະທານສະຫະພັນນັກຮົບເກົ່າແຫ່ງຊາດລາວ ໃຫ້ກຽດເຂົ້າຮ່ວມກອງປະຊຸມຄັ້ງນີ້ ໂດຍ ສະຫາຍເລຂາທິການໃຫຍ່ ຄະນະບໍລິຫານຫານງານ ສູນກາງພັກ, ປະທານປະເທດແຫ່ງ ສປປ ລາວ, ມີ ສະຫາຍ ພົນເອກ ຈັນສະໝອນ ຈັນຍາລາດ ພ້ອມດ້ວຍຄະນະ, ມີປະທານສະຫະພັນນັກຮົບເກົ່າແຕ່ລະແຂວງ, ພະນັກງານທະຫານ, ຕໍາຫຼວດ ແລະ ພາກກ່ຽວຂ້ອງເຂົ້າຮ່ວມ.

ສະຫາຍ ພົນຈັດຕະວາ ຄໍາຫອມ ແສງບົວລົມ ຮອງປະທານສະຫະພັນນັກຮົບເກົ່າຂຶ້ນຜ່ານຮ່າງບົດສະຫຼຸບລາຍງານຕີລາຄາການຈັດຕັ້ງປະຕິບັດ ມະຕິກອງປະຊຸມໃຫຍ່ຂອງຜູ້ແທນນັກຮົບເກົ່າທົ່ວປະເທດຄັ້ງທີ III ໃນໄລຍະ 5 ປີຜ່ານມາ ( 2016-2020 ) ເຊິ່ງໄດ້ຍົກໃຫ້ເຫັນເຖິງພະລະບົດບາດຂອງນັກຮົບເກົ່າ, ຜ່ານມານັກຮົບເກົ່າໄດ້ຖືສໍາຄັນ ແລະ ເອົາໃຈໃສ່ເຮັດວຽກງານອົບຮົບການເມືອງ-ແນວຄິດ, ປຸກລະດົມສະມາຊິກນັກຮົບເກົ່າ ແລະ ເສີມຂະຫຍາຍມູນເຊື້ອປະຕິວັດ, ປະກອບສ່ວນເຂົ້າໃນພາລະກິດປົກປັກຮັກສາ ແລະ ພັດທະນາປະເທດຊາດດ້ວຍຄວາມເປັນເຈົ້າການ, ວຽກງານດັ່ງກ່າວແມ່ນໜ້າທີ່ການເມືອງທີ່ສໍາຄັນ ຂອງຄະນະສະຫະພັນນັກຮົບເກົ່າແຕ່ລະຂັ້ນ ແລະ ສະມາຊິກນັກຮົບເກົ່າທຸກຄົນ, ທັງເປັນອຸດົມການອັນສະເໝີຕົ້ນສະເໝີປາຍ, ຈິດໃຈບໍລິສຸດຕໍ່ພັກ,ຕໍ່ປະເທດຊາດຂອງຖັນແຖວນັກຮົບຕະຫຼອດມາ,

ນອກນັ້ນຍັງໄດ້ສົມທົບແໜ້ນ ກັບບັນດາອົງການຈັດຕັ້ງພັກ-ລັດຂັ້ນສູນກາງ ແລະ ຄະ ນະພັກ-ອົງການປົກຄອງທ້ອງຖິ່ນແຕ່ລະຂັ້ນສຸມໃສ່ປັບປຸງການຈັດຕັ້ງ ຕິດພັນກັບການຂົນຂວາຍ ເຕົ້າໂຮມນັກຮົບເກົ່າເຂົ້າເປັນສະມາຊິກ, ປັບປຸງແບບແຜນວິທີເຮັດວຽກ; ປະຕິບັດໜ້າທີ່ເປັນຕົວແທນແຫ່ງສິດຜົນປະໂຫຍດ ອັນຊອບທໍາ ຂອງນັກຮົບເກົາພາຍໃຕ້ການນໍາພາຂອງພັກໃຫ້ໄດ້ດີກວ່າເກົ່າ. ພ້ອມທັງເປັນເຈົ້າການປະສານສົມທົບ ກັບພາກສ່ວນທີ່ກ່ຽວຂ້ອງ ຄົ້ນຄວ້າ, ສ້າງກົດໝາຍວ່າດ້ວຍສະຫະພັນນັກຮົບເກົ່າລາວ ແລະ ພັດທະນານິຕິກໍາລຸ່ມກົດໝາຍສໍາເລັດຫຼາຍສະບັບ, ປະຕິບັດຫຼັກການ, ລະບຽບຕິດຕາມ, ກວດກາສະກັດກັ້ນຕ້ານປະກົດການຫຍໍ້າທໍ້ໃນຂົງເຂດວຽກງານນັກຮົບເກົາ. ພ້ອມນັ້ນທ່ານຍົກຫຼາຍບັນຫາທີ່ຄົງຄ້າງເຊັ່ນ:

ການສຶກສາອົບຮົບການເມືອງ-ແນວຄິດເຖິງວ່າຈັດຕັ້ງປະຕິບັດຫຼາຍຮູບແບບ ແຕ່ເມື່ອທຽບຕາມຄວາມຮຽກຮ້ອງແມ່ນຍັງບໍ່ທັນເລິກເຊິ່ງ, ພະນັກງານບາງຈໍານວນຍັງບໍ່ທັນກໍາແໜ້ນແນວທາງນະໂບບາຍຂອງພັກ, ກົດໝາຍຂອງລັດ ກໍ່ຄືມະຕິກອງປະຊຸມໃຫ່ຍກອງປະຊຸມຕ່າງໆ. ສະມາຊິກຈໍານວນໜຶ່ງຍັງຂາດສະຕິຕໍ່ການຈັດຕັ້ງອື່ນໆ; ພ້ອມນັ້ນກອງປະຊຸມຍັງໄດ້ວາງທິດທາງແຜນການໃນໄລຍະ 5 ປີຕໍ່ໜ້າ ( 2021-2025 ) ສຶບຕໍ່ສຶກສາອົບຮົບການເມືອງ-ແນວຄິດ, ຈັດຕັ້ງເຜີຍແຜ່ເຊື່ອມຊຶມແນວທາງນະໂຍບາຍ, ມະຕິ, ຄໍາສັ່ງຂອງພັກ, ລັດຖະທໍາມະນູນ ແລະ ກົດ ໝາຍຂອງລັດ ປັບປຸງການຈັດຕັ້ງແຕ່ລະຂັ້ນໃຫ້ໜັກແໜ້ນ, ເຂັ້ມແຂງ, ສາມາດປະຕິບັດພາລະບົດບາດເປັນຕົວແທນແຫ່ງສິດຜົນປະໂຫຍດ ອັນຊອບທໍາ ຂອງສະມາຊິກນັກຮົບເກົ່າ ຢ່າງແທ້ຈິງ, ຍົກສູງສະຕິລະວັງຕົວ ແລະ ປະຕິບັດລັດຖະທໍາມະນູນ, ກົດໝາຍຂອງລັດໃຫ້ໄດ້ດີ.

ໂອກາດດຽວກັນນີ້ກອງປະຊຸມຍັງໄດ້ຍັງຜ່ານມາຕິຕົກລົງຂອງຄະນະເລຂາ ທິການສູນກາງພັກວ່າດ້ວຍການອະນຸມັດລາຍຊືື່ບຸກຄະລາກອນເພື່ອພິຈາລະນາຮັບຮອງເຂົ້າໃນຄະນະບໍລິຫານງານສະຫະພັນນັກຮົບເກົ່າແຫ່ງຊາດລາວສະໄໝທີ IV ອີງຕາມກົດລະບຽບຂອງພັກປະຊາຊົນສະໄໝທີ XI, ອີງຕາມກົດໝາຍວ່າດ້ວຍສະຫະພັນນັກຮົບເກົ່າແຫ່ງຊາດລາວ ສະບັບເລທີ 42/ສພຊ, ລົງວັນທີ 13/06/2018.

ອີງຕາມການຕົກລົງໃນກອງປະຊຸມຄະນະເລຂາທິການສູນກາງພັກຄັ້ງວັນທີ 28 ກໍລະກົດ 2021, ອີງຕາມມະຕິຂອງຄະນະປະຈໍາສະພາແຫ່ງຊາດສະບັບເລກທີ 222/ຄປຈ ລົງວັນທີ 03/ ກັນຍາ 2021 ວ່າດ້ວຍການຍົກເວັ້ນການປະຕິບັດມາຕາ 20 ຂອງກົດໝາຍສະຫະພັນນັກຮົບເກົ່າລາວເພື່ອບົ່ງຕົວແຕ່ງຕັ້ງເອົາຄະນະບໍລິຫານງານສະຫະພັນນັກຮົບເກົ່າແຫ່ງຊາດລາວສະໄໝທີ IV.

ອີງຕາມໜັງສືສະເໜີຂອງຄະນະຈັດຕັ້ງສູນກາງພັກສະບັບເລກທີ 339/ຄຈສພ ລົງວັນທີ 05 ພະຈິກ 2021. ອະນຸມັດລາຍຊືື່ບຸກຄະລາກອນເພື່ອພິຈາລະນາຮັບຮອງເຂົ້າໃນຄະນະບໍລິຫານງານສະຫະພັນນັກຮົບເກົ່າແຫ່ງຊາດລາວສະໄໝທີ IVຈໍານວນ 27 ສະຫາຍ, ຍິງ 01 ສະຫາຍ. ຮັບຮອງເອົາປະທານ,ຮອງປະທານຄະນະບໍລິຫານງານ, ປະທານ, ຮອງປະທານກວດກາສະຫະພັນດັ່ງນີ້:

ສະຫາຍ ພົນໂທ ແສງນວນ ໄຊຍະລາດ ເປັນປະທານ, ສະຫາຍ ພົນຈັດຕະວາ ຄໍາຫອມ ບົວລົມ, ສະຫາຍ ພົນຈັດຕະວາ ລໍາພອນ, ສະຫາຍ ພົນຈັດຕະວາ ຄໍາໝັ້ນ ວັນນະວົງ, ສະຫາຍ ພົນຈັດຕະວາ ພອນໃຈ ພັນທະວົງ ເປັນຮອງປະທານ, ສະຫາຍ ພົນຈັດຕະວາ ຄໍາໝັ້ນ ວັນນະວົງ ເປັນປະທານກວດກາ, ສະຫາຍ ພັນເອກ ນ. ຄໍາພູ ສິດທິເສນ ເປັນຮອງປະທານກວດກາ.