ໃນຕອນບ່າຍຂອງວັນທີ 14 ສິງຫາ 2020, ຢູ່ຊັ້ນ 3 ປົກຄອງນະຄອນຫຼວງວຽງຈັນ ໄດ້ມີພິທີມອບ-ຮັບໜ້າທີ່ ລະຫວ່າງສະຫາຍ ແກ່ນຄໍາ ຫົດທິລາດ ກຳມະການພັກ ນວ ປະທານສະຫະພັນກຳມະບານ ນະຄອນຫຼວງວຽງຈັນ (ຜູ້ເກົ່າ) ແລະ ສະຫາຍ ດາວເພັດ ອາລຸນ ປະທານສະຫະພັນກຳມະບານ ນະຄອນຫຼວງວຽງຈັນ (ຜູ້ໃໝ່),
![](https://pakaad.com/wp-content/uploads/2020/08/fb_img_15978151619451920777870822858188.jpg)
ໂດຍໃຫ້ກຽດເຂົ້າຮ່ວມຂອງສະຫາຍ ບຸນທອງ ພົມມະຈັນ ຄະນະປະຈຳພັກ ນວ ຫົວໜ້າຄະນະຈັດຕັ້ງ ນວ ແລະ ສະຫາຍ ວັນຄໍາ ໄຊຍະຣັກ ຫົວໜ້າກົມຈັດຕັ້ງສູນກາງສະຫະພັນກໍາມະບານລາວ, ມີບັນດາຄະນະບໍລິຫານງານສະຫະພັນກຳມະບານ ນວ ແລະ ປະທານສະຫະພັນກຳມະບານ 9 ຕົວເມືອງ ພ້ອມດ້ວຍແຂກຖືກເຊີນລວມມີ 50 ສະຫາຍ, ຍິງ 17 ສະຫາຍ ເຂົ້າຮ່ວມເປັນສັກຂີພິຍານ.
ພິທີມອບ-ຮັບໜ້າທີ່ຄັ້ງນີ້ ຈັດຂຶ້ນໂດຍອີງຕາມມະຕິຕົກລົງສະບັບເລກທີ 655/ຄພ.ນວ; ລົງວັນທີ 10 ສິງຫາ 2020 ວ່າດ້ວຍການແຕ່ງຕັ້ງປະທານສະຫະພັນກໍາມະບານ ນະຄອນຫຼວງວຽງຈັນ.
![](https://pakaad.com/wp-content/uploads/2020/08/fb_img_15978151462673293628828243437699.jpg)
ດັ່ງນັ້ນ, ຄະນະປະຈໍາພັກນະຄອນຫຼວງວຽງຈັນ ຈຶ່ງໄດ້ຕົກລົງແຕ່ງຕັ້ງທ່ານ ດາວເພັດ ອາລຸນ ເປັນປະທານສະຫະພັນກໍາມະບານ ນະຄອນຫຼວງວຽງຈັນ; ສ່ວນທ່ານ ແກ່ນຄໍາ ຫົດທິລາດ ກໍາມະການພັກ ນວ ປະທານສະຫະພັນກໍາມະບານ ນວ (ຜູ້ເກົ່າ) ແມ່ນອອກພັກການ-ຮັບອຸດໜູນບໍານານ ຕາມມະຕິຕົກລົງ ຂອງຄະນະເລຂາທິການສູນກາງສະບັບເລກທີ 82/ຄລສພ, ລົງວັນທີ 29 ພຶດສະພາ 2020 ວ່າດ້ວຍການອະນຸມັດໃຫ້ພະນັກງານອອກພັກການ-ຮັບອຸດໜູນບໍານານ.
![](https://pakaad.com/wp-content/uploads/2020/08/fb_img_15978151487072448200628591227751-1024x518.jpg)
ໂອກາດດຽວກັນ ສະຫາຍ ບຸນທອງ ພົມມະຈັນ ຄະນະປະຈຳພັກ ນວ ຫົວໜ້າຄະນະຈັດຕັ້ງ ນວ ໄດ້ໃຫ້ກຽດໂອ້ລົມໂດຍໄດ້ກ່າວເນັ້ນວ່າ: ການມອບ-ຮັບໜ້າທີ່ໃນຄັ້ງນີ້ ແມ່ນກົດເກນ, ເປັນຫຼັກການ ໂດຍອີງຕາມຄວາມເຫັນດີຂອງຂັ້ນເທິງ ໃນການປັບປຸງຈັດຕັ້ງ ແລະ ສັບຊ້ອນ ຕາມຄວາມຮຽກຮ້ອງຕ້ອງການໃນແຕ່ລະໄລຍະ; ພ້ອມທັງກ່າວເຖິງທ່ານປະທານສະຫະພັນກຳມະບານ (ຜູ້ເກົ່າ) ທີ່ພັກການຮັບອຸດໜູນບໍານານ ກໍໃຫ້ເປັນແບບຢ່າງ, ຮັກສາສຸຂະພາບ; ສ່ວນທ່ານປະທານສະຫະພັນກຳມະບານ (ຜູ້ໃໝ່) ແມ່ນຕ້ອງເອົາໃຈໃສ່ສືບຕໍ່ຈັດຕັ້ງປະຕິບັດ, ມີຄວາມຮັບຜິດຊອບ, ເຮັດວຽກເປັນໝູ່ຄະນະ ແລະ ເອົາໃຈໃສ່ສຶກສາອົບຮົມການເມືອງແນວຄິດໃຫ້ພະນັກງານລັດຖະກອນ ໃຫ້ມີແນວຄິດອຸ່ນອ່ຽງ, ທຸນທ່ຽງ, ມີຄວາມສາມັກຄີຢ່າງແໜ້ນແຟ້ນ ເພື່ອເຮັດສໍາເລັດໜ້າທີ່ທີ່ຂັ້ນເທິງມອບໝາຍໃຫ້.